ଶରତ ଚନ୍ଦ୍ର ମହାପାତ୍ର: ଭାରତୀୟ ବିଚାରପତି ଓ ଲେଖକ

ଶରତ ଚନ୍ଦ୍ର ମହାପାତ୍ର ୧୯୩୩ ମାର୍ଚ୍ଚ ୨୪ରେ ଢେଙ୍କାନାଳ ଜିଲ୍ଲା ଇଚ୍ଛାବତୀପୁର ଶାସନରେ ଜନ୍ମଗ୍ରହଣ କରିଥିଲେ ୤ ବ୍ରଜନାଥ ବଡ଼ଜେନା ଉଚ୍ଚବିଦ୍ୟାଳୟରୁ ମାଟ୍ରିକ ପାସ କରିବା ପରେ ବାରିପଦା ଏମପିସି କଲେଜରେ ଆଇଏସସି ପଢ଼ିଥିଲେ ୤ ପରେ ସେ ଫକୀରମୋହନ ମହାବିଦ୍ୟାଳୟରୁ ସ୍ନାତକ ଓ ମଧୁସୂଦନ ଆଇନ ମହାବିଦ୍ୟାଳୟରୁ ଆଇନରେ ସ୍ନାତକ ଉପାଧି ହାସଲ କରିଥିଲେ ୤

ସେ ଓଡ଼ିଶା ଉଚ୍ଚ ନ୍ୟାୟାଳୟର ଭୂତପୂର୍ବ ମୁଖ୍ୟ ବିଚାରପତି ସ୍ୱର୍ଗତ ଗତିକୃଷ୍ଣ ମିଶ୍ରଙ୍କ ସହକାରୀ ଭାବେ ଓକିଲାତି ଆରମ୍ଭ କରିଥିଲେ ୤ ୧୯୮୪ ମସିହାରେ ଓଡ଼ିଶା ଉଚ୍ଚନ୍ୟାୟାଳୟର ବିଚାରପତି ଭାବେ ଦାୟିତ୍ୱ ଗ୍ରହଣ କରିଥିଲେ ୤ ୧୯୯୪ ମସିହାରେ ଆଲ୍ଲାହାବାଦ ଉଚ୍ଚ ନ୍ୟାୟାଳୟକୁ ତାଙ୍କର ବଦଳି ହୋଇଥିଲା ୤ ୧୯୮୯ରୁ ୧୯୯୩ ପର୍ଯ୍ୟନ୍ତ ରାଜ୍ୟ ଖାଉଟି ରିଡ୍ରେସାଲ କମିଶନ ସଭାପତି ଭାବେ, ୧୯୯୫ ମସିହାରେ ଓଡ଼ିଶା ପ୍ରଶାସନିକ ନ୍ୟାୟାଧିକରଣ (ସ୍ୟାଟ) ଅଧ୍ୟକ୍ଷ, ୨୦୦୩ରୁ ୨୦୦୮ ପର୍ଯ୍ୟନ୍ତ ଓଡ଼ିଶା ଲୋକପାଳ ଭାବେ ଦାୟିତ୍ୱ ନିର୍ବାହ କରିଥିଲେ ୤ ସ୍ୱାମୀ ଲକ୍ଷ୍ମଣାନନ୍ଦ ସରସ୍ୱତୀ ଓ ତାଙ୍କର କେତେକ ସହଯୋଗୀଙ୍କୁ ୨୦୦୮ ଅଗଷ୍ଟ ମାସରେ ହତ୍ୟା କରାଯିବା ପରେ କନ୍ଧମାଳରେ ବ୍ୟାପକ ଦଙ୍ଗାଗୋଳ ଲାଗିଥିଲା ୤ ଏହି କନ୍ଧମାଳ ଦଙ୍ଗା ଘଟଣାର ତଦନ୍ତ ଲାଗି ରାଜ୍ୟ ସରକାର ତରଫରୁ ଗଠିତ ଜଣିକିଆ କମିଶନର ମୁଖ୍ୟ ଦାୟିତ୍ୱରେ ଥିଲେ୤

ଜଷ୍ଟିସ ମହାପାତ୍ର ମାସାଧିକ କାଳ ଅସୁସ୍ଥତା କାରଣରୁ ଭୁବନେଶ୍ୱରର ଏକ ଘରୋଇ ନର୍ସିଂହୋମରେ ଚିକିତ୍ସିତ ହେଉଥିଲେ ୤ ସେ ସେପ୍ଟିସେମିଆ ସହ ବିଭିନ୍ନ ଅଙ୍ଗପ୍ରତ୍ୟଙ୍ଗ ଜନିତ ରୋଗରେ ଆକ୍ରାନ୍ତ ଥିଲେ୤ ୧୨ ମଇ ୨୦୧୨ ମସିହା, ଶନିବାର ସକାଳ ୭ଟା ବେଳେ ତାଙ୍କର ଦେହାନ୍ତ ହୋଇଥିଲା ୤ ପୁରୀ ସ୍ୱର୍ଗଦ୍ୱାରଠାରେ ତାଙ୍କର ଶେଷକୃତ୍ୟ ସମ୍ପନ୍ନ କରାଯାଇଥିଲା ୤