Końskowola

Es situat dins la comuna (en polonés gmina) de Końskowola e lo destrech (en polonés powiat) de Puławski, qu'es una subdivision administrativa dau Voivodat de Lublin.

Lo vilatge foguèt probable fondat au sègle XIV sota lo nom de Witowska Wola. Lo nom actuau data dau sègle XIX.

Końskowola èra un important mercat alimentari. Se i trobava pereu de manufacturas nombrosas de textil. Pron de personas provenent d'autrei regions de Polonha mai tanben de Saxònia emigrèron dins la vila.

Dempuei, son istòria es estada liada an aquela de tota la region. Après la tresena division de Polonha en 1795, la vila foguèt annexada per Àustria. En 1809, faguèt partida dau ducat de Varsòvia e finalament dau Reiaume de Polonha en 1815. Après la revòuta de genier, en 1870, Końskowola perdèt definitivament l'estatut de vila. Pendent la Revolucion Russa de 1905, de nombrosei manifestacions e grèvas de solidaritat i foguèron organizadas. En 1918, Końskowola foguèt reïntegrada a Polonha.

Lo 15 de setembre de 1939, Końskowola foguèt presa per lei tropas alemandas que l'ocupèron fins au 25 de julhet de 1944. Lei nazis i installèron un camp de presoniers e un autre de trabalhs forçats. Lo premier foguèt lèu sarrat, mai lo segond restèt actiu fins a 1943. Tanben s'i establiguèt un guèto poblat subretot de josieus originaris d'Eslovaquia. En octobre de 1942, la populacion dau guèto (de 800 a 1000 personas), comprés lei fremas e leis enfants, foguèt liquidada.

Son de remarcar lei glèisas dau sègle XVII. I son enterrats lei poètas Franciszek Dionizy Kniaźnin e Franciszek Zabłocki.

• (pl) Istòria de la vila