Guilhèm Iv De Tolosa

Es lo filh de Ponç, comte de Tolosa, e d’Almòdis de la Marcha.

Succedís a son paire en 1060 e erita de la màger part de sos bens, son fraire Raimon qu'a pas que los comtats de Sant Gèli, de Nimes, de Narbona. Çaquelà, sembla que Raimon parteja amb el lo títol de comte de Tolosa, coma o indica una carta de 1088 que li atribuís entre autres aquel títol. En 1065, a la mòrt de lor cosina Berta, comtessa de Roergue, Raimon s’empara de son comtat e mai del marquesat de Gotia e del ducat de Narbona sens que Guilhèm faga qué que siá per lo n'empachar. Contràriament a son paire e a son fraire, es un òme pauc ambiciós e pauc portat sus las armas.

Guilhèm esposa en primièras nòças una Matilda, puèi en segondas nòças (en 1080) Emma de Mortain, filha de Robert de Conteville, comte de Mortain e de Mathilde de Montgomery. Aquesta darrièra dona naissença a :

• Ponç, mòrt jove
• Felip († 1117), maridada en 1094 a Guilhèm IX lo Trobador (1071 † 1127), duc d'Aquitània, de Gasconha e comte de Peitieus.

Guilhèm morís en 1094 probablament al cors d'un pelegrinatge en Tèrra Santa. Lo testament de son paire especificava que se Guilhèm defuntava sens filhs, sas tèrras vendrián a son filh cabdet Raimon, que li succediguèt jol nom de Raimon IV. Mas dos decennis pus tard, Guilhèm d'Aquitània reivindica lo comtat de Tolosa e cèrca de lo conquerir.

Precedit per	Guilhèm IV de Tolosa	Seguit per
Ponç	comte de Tolosa 1060-1094	Raimon IV

• Jean-Luc Déjean. Les comtes de Toulouse (1050-1250). Fayard. ISBN 2-213-02188-0. 
• Foundation for Medieval Genealogy : Ponç e Guilhèm IV de Tolosa

•   Portal de Lengadòc
•   Portal de l'istòria