Capitol
Los capitols èran pendent tota l'Edat Mejana e fins a 1789 los oficièrs municipals de la vila de Tolosa.
L'establiment del Parlament de Tolosa al sègle XIV, redusèt fòrça lor autoritat. Lo 17 de novembre de 1400, los Capitols de Tolosa obtenguèron del rei Carles VI d'èsser tornarmai del nombre de dotze. Amb la Revolucion Francesa, lo capitol es dissolgut al meteis temps que lo Parlament de Tolosa.
Istoric
Aquesta institucion data del comte Anfós Jordan, lo filh de Raimon IV de Tolosa. Los conselhièrs del comte forman amb los jutges del comte lo capitol dich lo capitolum. Aqueste capitol al temps de las crosadas jutja los procèsses entre mercands. Los membres d'aqueste collègi municipal adòptan lo títol de «cònsols», puèi de «capitols».
En 1147, Anfós Jordan redigís los privilègis e fixa a 24 lo nombre dels cònsols. En 1188, los capitols profitan d'una guèrra entre Raimon V de Tolosa e los reis d'Anglatèrra e d'Aragon per obténer l'autonomia.
Tre 1190, compran una seria d'ostals per ne far l'ostal comun, lo capitòli que pòrta encara aqueste nom uèi.
En 1438, la vila es devesida en uèit capitolats. Los capitols son elegits lo 25 de novembre e aquò per un an. En 1645, lo rei nomena dempuèi París los capitols malgrat las remostrancas de la vila qu'estima que pòt elegir soleta sos magistrats. En 1692, lo rei vol impausar de capitols perpetuals mas en 1700 lo sistèma torna a son organizacion tradicionala.
Lo 14 de setembre de 1789, los capitolats son remplaçats per quinze seccions e los capitols son suprimits. L'assemblada novèla compòrta çaquelà de nòbles e de borgeses. Es Joseph de Rigaud qu'es elegit (primièr) cònsol lo 28 de febrièr de 1790.
Los capitolats
La vila es devesida en uèit capitolats e cada Capitol arborava una color en foncion del quartièr que representava :
- Lo quartièr de la Daurada en verd e blanc,
- Lo quartièr Pèire Sant Geraud en negre,
- Lo quartièr de Sant Estève en violet,
- Lo quartièr de la Dalbada en incarnat,
- Lo quartièr del Pont Vièlh en irange,
- Lo quartièr de Sant Sarnin en jaune,
- Lo quartièr de Sant Pèire de las Cosinas en blau,
- Lo quartièr de Sant Bartomieu en amaranta.
This article uses material from the Wikipedia Occitan article Capitol, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Lo contengut es disponible jos licéncia CC BY-SA 4.0 levat mencion contrària. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Occitan (DUHOCTRUNGQUOC.VN) is an independent company and has no affiliation with Wiki Foundation.