Saint Swithîn 'tait un êvêque dé Winchester en Angliétèrre.
Ch't' articl'ye fut c'menchie en Jèrriais |
Duthant sa vie, i' sembl'ye qu'i' n'fît qu'un mithacl'ye: eune vielle femme avait laîssi tchaie eune pann'lée d'oeux. L'saint fît l'sîngne d'la Crouaix au d'ssus d's oeux crutchis et il' èrd'vîntent entchièrs.
Mais Saint Swithîn est mus connu pouor chein tch'arrivit auprès sa mort en l'an 862. Humbliément, l'saint avait c'mandé qu'san corps dév'thait êt' entèrré dans l'chînm'tchiéthe d'la cathédrale - pas dans eune pliaiche d'hounneu en d'dans - à seule fîn qu'sa tombe pûsse êt' arrouôsée par la plyie du ciel.
Mais tchiques années pus tard, nou décidit d'transféther l'corps du saint dans la cathédrale pouor la vénéthâtion des pélérîns. Lé corps fut r'mué lé tchînze dé Juilet, mais i' c'menchit à tchaie d'la plyie et la plyie continnuit pouor quarante jours.
Nou prînt chenna pouor un sîngne du ciel qu'lé saint n'aimit pon qu'nou-s'eûsse èrmué san corps, et don l'saint fut èrentèrré dans san chînm'tchiéthe préféthé.
Né v'là coumme tchi qu'la légende entouor la Saint Swithîn appathut - mais i' sembl'ye qu'lé saint changit d'avis pus tard, pa'ce qué san corps fut èrmué dans la cathédrale où'est i' 'tait vénéthé jusqu'à la R'formâtion quand sa sépultuthe fut bûchie et ses r'liques fliantchis hors.
Lé tchînze dé Juilet est la Saint Swithîn, et y'a eune crianche entouor lé temps:
Nou dit s'lon la vielle couôteunme qu'lé temps qu'i' fait à la St. Swithîn s'en va duther pouor les préchains quarante jours.
This article uses material from the Wikipedia Nouormand/Normaund article Saint Swithîn, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Le contenu est disponible sous licence CC BY-SA 4.0 sauf mention contraire. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Nouormand/Normaund (DUHOCTRUNGQUOC.VN) is an independent company and has no affiliation with Wiki Foundation.