Nos seut appeler école de Sienne ou co' école siennaise un mouvement de peinteure italien qui se développit ent'e les sièc'es XII et XVI à l'entou' de la chité de Sienne en Touscane.
L'école siennaise se dénoquit à ras de la sienne à Fleurenche, et i' y eut eune manière de rivalité ent'e les deux chités, tant dans chu doumaine coume dans bien d'aut'es.
L'école siennaise soulait se démarquier par un goût raffiné des couleu's, des modèles et des jeux imagiers, échaites de l'art des icoûnes byzantènes. Les couleu's dont nos soulait faire usage à Sienne quéraient à douner une moûtranche reide caude : orangiés, rouges bien vi's, verts amande, doré. La peinteure siennaise 'tait bien espéciale itout coume cha qu'a' faisait fèn' usage de contrastes ent'e les caudes couleu's pis les eunes freides ; mais co' qu'a' développit la maîtrise du verdas (verdaccio), eune féchon de pein're les figueures et les mains qui fit la glouère d'un mouché' de grands peint'es siennais coume Simone Martini. Eun aut'e trait bien siennais 'tait la manière de faire senti' la narration : bien des schènes de la vie ès saints n'avaient mèche de modèle icounographique, i' fallut don' que les peint'es siennais n-en engignissent des nouvelles. De même, les Siennais eût'ent aveure le souchi d'encorser à leur art les modes d'espression gothiques. Pa' lo, i' se démarquît'ent enco' des principes que nos attribue à la peinteure de la R'naîté italienne, qui trachait putôt à se dépren're des herses de l'art gothique.
Les grands maît'es les pus couneus et les pus conséquents de l'école siennaise feût'ent Duccio – lequié' sieusait co' d'excès l'art byzantin, sen pupi' Simone Martini, les frères Pietro et Ambrogio Lorenzetti qui eût'ent bellement d'avision, les cousins Domenico et Taddeo di Bartolo, Il Sassetta et Matteo di Giovanni.
This article uses material from the Wikipedia Nouormand/Normaund article École siennaise, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Le contenu est disponible sous licence CC BY-SA 4.0 sauf mention contraire. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Nouormand/Normaund (DUHOCTRUNGQUOC.VN) is an independent company and has no affiliation with Wiki Foundation.