ߡߟߊ߬ߘߐ߫ ߞߊ߬ߓߊ߫

ߡߟߊ߬ߘߐ߫ ߞߊ߬ߓߊ߫

ߡߐ߱

ߖߊ߲߬ߕߌ߰ߦߊ	ߡߏ߬ߛߏ
ߝߊ߬ߛߏ߬ߦߊ߬ ߖߡߊ߬ߣߊ߫	ߖߌ߬ߣߍ߫
ߡߏߦߌ߫ ߕߎߡߊ	߂߂ ߕߙߊߓߊ 1971
ߡߏߦߌ߫ ߦߌߟߊ	ߡߏ߲ߙߏߝ߭ߌ߬ߦߊ߫
ߞߊ߲	ߝߊ߬ߙߊ߲߬ߛߌ߬ ߞߊ߲
ߓߊ߯ߙߘߊ	ߓߘߍ߬ߓߘߍ߬ߟߌ߬ߟߊ, ߡߊ߬ߞߐ߬ߙߐ߲߬ߞߐ߬ߙߐ߲߬ߠߌ߲߬ߠߊ
ߗߋߘߊ	ߖߌ߬ߣߍ߫ ߣߊ߲߬ߝߟߏ߬ߦߊ߬ߟߌ ߞߏߕߌ߮
ߞߊ߬ߙߊ߲߬ ߦߌߟߊ	ߔߊ߬ߙߌ߬ ߖߊ߯ߓߘߊ (߁߈߉߆-߁߉߆߈)
Affiliation string	Faleme Advisory Consulting
ߊ߬ ߕߘߍ߬ߒ߬ߘߐ߬ߟߌ ߟߎ߫	Global Conference 2020

ߊ߬ߟߋ ߟߋ߬ ߞߍ߫ ߘߊ߫ ߡߛߏ߬ ߝߟߐ ߘߌ߫߸ ߡߍ߲ ߞߍ߫ ߘߊ߫ ߖߌ߬ߣߍ߫ ߡߊ߬ߞߐ߬ߙߐ߲߬ߞߐ߬ߙߐ߲߬ߠߌ߲ ߣߴߊ߬ ߣߊ߲߬ߝߟߏ߬ߦߊ߬ߟߌ ߞߏߕߌ߮ ߘߌ߫ ߂߀߁߅ ߣߌ߫ ߂߀߁߈ ߠߎ߬ ߕߍ߫. ߊ߬ߟߋ ߟߋ߬ ߦߋ߫ ߖߌ߬ߣߍ߫ ߞߊ߲ߓߍ߲ ߢߎߡߍߞߏ ߣߌ߫ ߖߌ߫ ߛߊߣߌ߲ߡߊ߲ ߞߎߘߎ߲ ߡߙߊ߬ߘߊ߫ ߛߊ߲ߘߐ ߟߊ߬ߟߌ߰ߟߌ ߞߊ߲ߕߌ߮ ߘߌ߫ ߞߊ߬ߦߌ߯ ߂߀߁߉ ߟߊ߫.

ߡߟߊ߬ߘߐ߫ ߞߊ߬ߓߊ ߥߟߏ߫ ߘߊ߫ ߁߉߇߁ ߕߙߊߓߊ ߂߂ ߟߋ߬ ߟߊ߫ ߡߐ߲ߕߑߛߋ߬ߙߊߘߏ ߞߐ߲ߕߋ߬߸ ߡߏ߲ߙߏߝ߭ߌ߬ߦߊ߫߸ ߟߌߓߋߙߌߦߊ߫. ߊ߬ ߛߐ߬ߘߐ߲ ߞߊߙߏ߫ ߛߊ߬ߓߊ ߟߋ߬ ߕߏ߫ ߘߊ߫߸ ߊ߬ ߡߏߦߌߓߊ߮ ߟߎ߬ ߥߊ߫ ߘߊ߫ ߝߊ߬ߙߊ߲߬ߛߌ߫߸ ߞߊ߬ ߥߴߊ߬ߟߎ߫ ߡߊߖߌ߰ ߔߊ߬ߙߌ߫. ߊ߬ ߞߵߊ߬ ߟߊ߫ ߘߋߣߍ߲ߦߊ ߣߴߊ߬ ߟߊ߫ ߛߙߎߓߊ߲ߦߊ ߓߍ߯ ߟߊߕߊ߬ߡߌ߲߫ ߔߊ߬ߙߌ߫ ߣߌ߫ ߔߊ߬ߙߌ߫ ߕߌ߲߬ߞߎߘߎ߲ ߠߋ߬ ߘߐ߫. ߡߟߊ߬ߘߐ߫ ߞߊ߬ߓߊ߫ ߞߵߊ߬ ߟߊ߫ ߞߊ߬ߙߊ߲ ߞߍ߫ ߟߌ߬ߛߋ ߤߣߏߙߋ߫ ߘߋ߬ ߓߊߟߑߖ߭ߊߞ ߟߋ߬ ߟߊ߫ ߔߊ߬ߙߌ߫߸ ߊ߬ ߞߵߊ߬ ߟߊ߫ ߓߊߘߎ߲ߧߊ ߡߊߛߐ߬ߘߐ߲߫ ߦߋ߲߬ ߠߋ ߁߉߈߉ ߟߊ߫.

ߊ߬ ߦߋ߫ ߔߊ߬ߙߌ߫ ߖߊ߯ߓߘߊ ߣߊ߲ߕߍߙ ߖߐ߲ߓߐ߲ߕߌ߮ ߘߏ߫ ߟߋ߬ ߘߌ߫߸ ߡߍ߲ ߘߐ߫ ߣߌ߫ ߞߊ߬ߙߊ߲ ߛߊ߲ߘߐߕߊ ߖߐ߲ߓߐ߲ ߠߋ߬ ߦߴߊ߬ ߓߟߏ߫ ߡߊ߬ߞߐ߬ߙߐ߲߬ߞߐ߬ߙߐ߲߬ߠߌ߲ ߛߓߊ߬ߕߌ ߘߐ߫ ߁߉߉߅ ߟߊ߫߸ ߊ߬ ߣߌ߫ ߡߊ߲߬ߕߏ߲߬ߕߍ ߡߊ߬ߞߐ߬ߙߐ߲߬ߞߐ߬ߙߐ߲߬ߠߌ߲ ߝߣߊ߫ ߝߊ߰ߡߎ߲߬ߠߌ߲ ߕߊ ߦߴߊ߬ ߓߟߏ߫߸ ߏ߬ ߡߍ߲ ߝߣߊ߫ ߛߐ߬ߘߐ߲߬ ߘߊ߫ ߁߉߉߄ ߠߊ߫. ߊ߬ ߦߋ߫ ߊߟߏߡߊ߲ ߝߣߊ߫ ߖߐ߲ߓߐ߲ߕߌ߮ ߟߋ߬ ߘߌ߫ ߞߊ߬ ߝߘߊ߫ ߜ߭ߏߋߕߋ߫ ߘߋ߬ߙߌ߬ߘߊ ߟߊ߫.

ߡߟߊ߬ߘߐ߫ ߞߊ߬ߓߊ߫ ߞߵߊ߬ ߟߊ߫ ߓߟߏߡߞߊ ߝߏ߲߬ߝߏ߲ ߘߊߡߌ߬ߣߊ߬ ߁߉߉߅ ߟߋ߬ ߟߊ߫ ߘߏ߯ߝߊߘߋ߲ ߘߌ߫ ߝߊ߬ߙߊ߲߬ߛߌ߫ ߣߝߊ߬ߢߐ߰ߦߊ ߞߏߕߌ߯ߘߊ ߟߊ߫. ߊ߬ ߞߵߊ߬ ߘߐߞߕߌ߫ ߁߉߉߆ ߟߊ߫ ߞߴߊ߬ ߦߋ߫ ߣߊ߬ ߖߌ߬ߣߍ߫ ߞߊ߬ ߣߊ߬ ߓߊ߯ߙߊ߫ ߝߏߣߌ߲ߞߋ߫ ߟߊ߬ߟߌ߰ߟߌ߬ߟߊ ߘߌ߫ ߣߊ߲߬ߝߟߏ߬ߦߊ߬ߟߌ ߞߏߕߌ߮ ߟߊ߫ ߛߓߍߘߊ ߟߊ߫߸ ߊ߬ ߣߴߏ߬ ߞߐ߫ ߝߊ߲߬ߝߘߊ ߣߌ߫ ߣߝߊ߬ߢߐ߰ߦߊ ߝߣߊ߫ ߁߉߉߆ ߣߌ߫ ߁߉߉߉ ߟߎ߫ ߕߍ߫ ߞߐߣߊߞߙߌ߫.

߁߉߉߉ ߟߊ߫߸ ߡߟߊ߬ߘߐ߫ ߞߊ߬ߓߊ߫ ߘߏ߲߬ ߘߊ߫ ߋߙߐߔߎ߬ ߟߐ߲߬ߞߋ߬ߟߊ ߘߐ߫߸ ߊ߬ ߓߊ߯ߙߊ߫ ߘߊ߫ ߡߊ߬ߞߐ߬ߙߐ߲߬ߞߐ߬ߙߐ߲߬ߠߌ߲ ߣߌ߫ ߟߘߊ߬ߙߏ߬ߟߌ ߟߐ߬ߘߎ߮ ߘߐ߫ ߖߊ߬ߕߋ߬ߘߐ߬ߛߌ߮ ߟߎ߬ ߘߐ߫ ߛߊ߲߬ ߁߅ ߣߌ߫ ߞߐ߫ ߞߘߐ߫. ߊ߬ ߟߊ߫ ߓߊ߯ߙߊ ߞߐߞߟߏߡߊ ߞߍ߫ ߘߊ߫ ߡߊ߬ߞߐ߬ߙߐ߲߬ߞߐ߬ߙߐ߲߬ߠߌ߲ ߟߊߞߊ߬ߝߏ߬ߣߍ߲ (macro-économie)߸ ߋߙߐߔߎ߬ ߘߍ߭ ߗߋߘߋ߲ ߠߎ߬ ߟߊ߫ ߛߓߊ߬ߕߌ ߖߊ߬ߕߋ߬ߘߐ߬ߛߌ߮ ߡߙߊ߬ߟߌ ߘߐ߫ ߖߌ߬ߣߍ߫߸ ߗ߭ߡߊߌߞߊ߬߸ ߊ߬ ߣߌ߫ ߥߙߏ߬ߘߎ߰ ߊߝߙߌߞߌ߬. ߊ߬ ߞߊ߬ ߖߊ߬ߕߋ߬ߘߐ߬ߛߌ߮ ߏ߬ ߦߟߌߣߐߞߏ߲ߘߏ߫ (portefeuille) ߘߍ߬ߜߍ ߟߋ߬ ߡߙߊ߬ ߘߊߞߎ߲߫ ߓߐߣߍ߲ߢߐ߲߰ߡߊ ߟߎ߬ ߘߐ߫ ߦߏ߫ ߝߘߏ߬ߓߊ߬ ߣߊ߲ߝߟߏߦߊߟߌ ߡߙߊ߬ߟߌ߸ ߝߘߏ߬ߓߊ߬ ߓߘߍߓߘߍߟߌ߸ ߞߍ߲ߘߍߦߊ߸ ߟߊ߬ߞߟߏ߬ߞߟߏ߬ߟߌ ߣߌ߫ ߕߊ߲ߓߊ߲ߓߐߟߌ ߟߎ߫. ߡߟߊ߬ߘߐ߫ ߞߊ߬ߓߊ ߞߊ߬ ߊߝߙߌߞߌ߬ ߣߌ߫ ߋߙߐߔߎ߬ ߘߍ߭ ߟߊ߫ ߘߊߘߐߖߊߥߏ ߟߊߓߊ߬ߕߏ߬߸ ߞߊ߬ ߓߍ߲߬ ߞ-߂߀ «» ߓߊ߯ߙߊ߫ ߞߙߎ ߡߊ߬ ߞߊ߬ ߓߍ߲߬ ߥߙߎߞߌ ߡߊ߬߸ ߊ߬ ߣߌ߫ ߞߣߐߟߊ ߛߐ߬ߘߐ߲߬ߝߋ߲ ߠߎ߬ ߘߟߊߘߍ߭ ߣߌ߫ ߝߛߎߞߎ ߟߊߖߊ߲ߠߌ߲ ߠߎ߬.

߂߀߁߄ ߥߊ߬ߛߌ߬ߥߙߊ ߟߊ߫߸ ߡߟߊ߬ߘߐ߫ ߞߊ߬ߓߊ߫ ߕߊ߬ ߘߊ߫ ߦߏ߫ ߞߊ߬ߝߏ ߗߋߕߌ߮ ߞߏߟߊߘߍ ߘߐ߫ «ߊߝߙߌߞߌ߬ ߞߎ߲߬ߠߊ߬ߛߌ߰ߟߌ ߟߊߝߟߐߟߌ» ߡߍ߲ ߛߌ߲ߘߌ߫ ߘߊ߫ ߓߙߌߕߊ߲ߓߊ߫ ߞߏߕߌ߯ ߝߟߐ߫ ߞߘߐ߫ ߕߏߣߌ ߓߑߟߍߙ ߓߟߏ߫. ߊ߬ ߞߊ߬ ߓߊ߯ߙߊ߫ ߛߘߍ ߘߏ߫ ߞߎ߲߬ߠߊߛߌ߰ ߡߍ߲ ߞߵߊ߬ ߕߏ߫ ߊ߫ ߛߋ߫ ߘߊ߫ ߞߐߡߊߓߌ߲ߓߌ߲ߠߌ߲ ߞߍ߫ ߟߊ߫߸ ߊ߬ ߣߌ߫ ߞߊ߬ ߞߎ߲߬ߕߌ߮ ߟߎ߬ ߣߌ߫ ߞߎ߲߬ߠߊ߬ߛߌ߮ ߟߊ߫ ߗߋߘߊߕߌ߯ ߛߊ߲ߘߐ ߟߎ߬ ߟߊߟߌ߫߸ ߊ߬ ߣߌ߫ ߝߘߏ߬ߓߊ߬ ߞߎ߲߬ߠߊ߬ߛߌ߰ߟߌ ߟߎ߬ ߝߣߊ߫ ߖߎ߬ߓߌߟߊ ߟߎ߬ ߟߊ߫ ߞߏ߫ ߟߊ߫߸ ߜߟߐߡߌ߲ ߣߌ߫ ߋߓߏߟߊ ߝߎ߬ߖߎ߯ߖߎ ߟߎ߬ ߘߐ߫. ߛߘߍ ߡߍ߲ ߠߎ߬ ߞߊ߬ ߋߓߏߟߊ (ߛߊߦߌߘߊ߲ߜߊ) ߞߐߝߍߟߊ ߘߊߘߐߓߍ߲ߠߌ߲ ߠߎ߬ ߞߍ߫ ߖߌ߬ߣߍ߫߸ ߡߟߊ߬ߘߐ߫ ߞߊ߬ߓߊ߫ ߕߘߍ߬ ߦߴߏ߬ ߛߌ߲߬ߝߏ߲ ߠߋ߬ ߣߴߊ߬ ߞߐߞߟߏ ߟߋ߬ ߘߌ߫߸ ߡߊ߬ߞߐ߬ߙߐ߲߬ߞߐ߬ߙߐ߲߬ߠߌ߲߬ ߛߘߍ ߡߍ߲ ߞߊ߲ߓߍ߲ ߞߊ߲ߕߌ߮ ߓߟߏ߫߸ ߊ߬ ߕߘߍ߬ ߦߴߏ߬ ߞߟߊ߬ߕߌ߮ ߟߋ߬ ߘߌ߫.

ߞߊ߲ߕߌ߯ ߊߟߌߝߊ߫ ߞߐ߲ߘߍ߫ ߞߊ߬ ߡߟߊ߬ߘߐ߫ ߞߊ߬ߓߊ߫ ߕߐ߯ߦߊ߫ ߞߵߊ߬ ߞߍ߫ ߡߊ߬ߞߐ߬ߙߐ߲߬ߞߐ߬ߙߐ߲߬ߠߌ߲ ߣߌ߫ ߣߊ߲߬ߝߟߏ߬ߦߊ߬ߟߌ ߟߎ߫ ߞߏߕߌ߮ ߘߌ߫. ߞߵߊ߬ ߕߏ߫ ߞߏߕߌ߯ߘߊ ߏ߬ ߞߎ߲߬ߠߊ߫߸ ߊ߬ ߞߊ߬ ߡߊ߲߬ߕߏ߲߬ߕߍ ߣߊ߲߬ߝߟߏ߬ߞߏ ߞߘߐߛߌ ߟߊ߫ ߢߍߥߟߊ ߘߏ߫ ߛߊߞߍ߫ ߞߏ߫ ߈߲ ߞߎ߲߬ߝߊ߰߸ ߏ߬ ߟߋ ߞߍ߫ ߘߴߊ߬ ߛߋ߲߬ߧߊ߬ ߝߟߐ ߘߌ߫ ߖߌ߬ߣߍ߫ ߘߐ߬ߝߐ ߘߐ߫ ߞߵߊ߬ ߝߐ߫ ߞߏ߫ ߛߊߞߍߟߌ߫ ߕߎ߲߰ߣߍ߲߬ߢߐ߲߰ߠߊ ߘߏ߫ ߦߋ߫ ߞߎ߲߬ߝߊ߰.

߂߀߁߇ ߟߊ߫߸ ߊ߬ ߞߊ߬ ߕߍ߯ߝߐ߫ ߞߍ߫ ߍߝ.ߍߡ.ߌ ߝߍ߬ ߢߍߥߟߊ߫ ߞߎߘߊ߫ ߘߝߐ߬ߡߊ ߘߏ߫ ߟߊ߫ ߞߏ߫ ߟߊ߫߸ ߏ߬ ߡߍ߲ ߞߵߊ߬ ߕߊ߰ߛߌ߫ ߞߊ߬ ߘߟߊ ߞߋ߲߬ߥߟߎ߫ ߆߅߀ ߘߐ߲ߘߐ߫ (non concessionnaire) ߞߊ߬ߝߏ ߡߊ߬. ߊ߬ ߞߊ߬ ߛߊ߲߬ ߝߌ߬ߟߊ߫ ߖߊ߬ߣߍ߲ ߞߍ߫ ߘߐ߬ߛߘߊ߬ߟߌ ߛߙߊߕߌ ߘߏ߫ ߟߎ߫ ߟߊ߫ ߛ߭ߌߣߌ߲߬ (ߗߊ߯ߣߋ߬) ߍߞߛߌߡߑߓߊ߲ߞ ߝߍ߬ ߛߴߏ߬ ߘߌ߫ ߊߡߍߙߞߌ߫ ߘߟߊ ߥߟߎ߬ߡߊ߫ ߁ ߣߌ߫ ߞߐ߫ ߣߊ߲߬ߝߟߏ߬ߦߊ߫ ߖߌ߬ߣߍ߫ ߖߌߓߊߟߊ߲ (ߓߊ߬ߙߊߗ߭) ߠߎ߬ ߘߐ߫ ߓߟߋ߬ߓߟߋ߫ ߟߐ߬ ߞߊ߲ ߡߊ߬ (ߛߎߥߊߔߕߌ ߞߊ߬ߣߌ߲߬).

ߊ߬ ߟߊ߫ ߞߐߝߟߌ ߣߴߊ߬ ߟߊ߫ ߞߍߟߌ ߟߎ߬ ߘߐ߫ ߌ ߞߐ߫߸ ߊ߬ ߕߘߍ߬ ߦߋ߫ ߛߐ߲ߞߐߟߐ߲ߧߊ߫ ߝߙߋߞߋߣߍ߲ ߘߐ߫ ߊߡߍߙߞߌ߫ ߘߟߊ ߥߟߎ߬ߡߊ߫ ߞߋߟߋ߲߫ ߞߊ߬ߝߏ ߟߐ߬ߟߌ߬ߝߋ߲߫ ߠߎ߬ ߢߍߥߟߊ߫ ߓߟߋߓߟߋ ߟߎ߬ ߘߐ߫߸ ߣߊ߲߬ߝߟߏ߬ߦߊ߬ߟߌ ߢߊ߬ߕߣߐ߬ߡߊ ߛߙߊߕߌ ߟߊ߫ ߂߀߁߇ ߟߊ߫. ߡߟߊ߬ߘߐ߫ ߞߊ߬ߓߊ߫ ߓߊ߯ߙߊ߫ ߘߊ߫ ߖߡߊ߬ߣߊ ߝߛߎߞߎߞߏ ߘߐߞߣߍߦߊߟߌ ߘߐ߫ ߝߘߏ߬ߓߊ߬ ߛߎ߯ߝߍ ߣߘߍ߬ߖߍ߯ߙߍ ߞߐߝߟߌ ߟߎ߬ ߟߊߥߊ߲߬ߞߊ߬ߟߌ ߘߐ߫ ߂߀߁߆ ߟߊ߫߸ ߡߍ߲ ߠߎ߬ ߕߊ߬ߡߌ߲߬ ߘߊ߫ ߂߀߁߃ ߣߌ߫ ߂߀߁߄ ߠߊ߫߸ ߊ߬ ߣߌ߫ ߂߀߁߅ ߛߊ߲߬ߕߟߊ߬ ߝߟߐ ߟߊ߫, ߊ߬ ߣߴߊ߬ ߕߏ߫ ߘߊ߫ ߓߊ߯ߙߊߢߐ߲߯ߦߊ ߓߍ߲߬ߘߐ߫ ߞߍߣߍ߲ ߠߎ߬ ߛߙߍߘߍ߫ ߟߎ߬ ߓߍ߯ ߟߊߥߊ߲߬ߞߊ߫ ߟߊ߫ ߣߊ߲߬ߝߟߏ߬ߦߊ߬ߟߌ ߞߏߕߌ߯ߘߊ ߟߊ߫ ߓߟߐߟߐ߫ ߞߍߦߙߐ ߟߊ߫ ߛߐ߲߬ ߞߎߘߊߌ߫. ߂߀߁߇ ߞߏ߲ߓߌߕߌ߮ ߟߊ߫߸ ߊ߬ ߛߋ߫ ߘߊ߫ ߖߌ߬ߣߍ߫ ߕߐ߮ ߛߙߍߘߍߦߊ߫ ߟߊ߫ ߟߊ߲߬ߓߏ߲߬ ߝߌߟߊߣߊ߲ ߘߐ߫ ߞߊ߬ߝߏ߬ ߛߎߡߊ߲ߣߍ߲ ߠߎ߬ ߘߐ߫ ߞߐ߲߬ߔߊߞߕ ߥߌߕߝ ߊߝߙߌߞߊ߬ «Compact with Africa» ߟߊ߫ ߖߎ߬ߓߐ߬ߟߌ ߘߐ߫ ߡߍ߲ ߠߊߥߟߌ߬ ߘߊ߫ ߊߟߏߡߊ߲ ߠߎ߬ ߟߊ߫ ߞߊ߲ߕߌ߮ ߓߟߏ߫ ߞ߂߀ «G20» ߠߎ߬ ߢߍ߫߸ ߊ߬ ߣߌ߫ ߡߍ߲ ߣߐ߬ ߦߋ߫ ߊߝߙߌߞߌ߬ ߟߊ߫ ߛߊ߬ߡߊ߲߬ߠߌ߲ ߛߎߡߊ߲߫ ߠߊ߫ ߘߎ߲߬ߘߎ߬ߡߊ߬ ߣߊ߲߬ߝߟߏ߬ߟߊ߬ߓߊ߯ߙߊ ߡߊ߬ߘߎ߮ ߘߐ߫. ߞߵߊ߬ ߕߊ߬ ߂߀߁߈ ߠߋ߬ ߡߊ߬ ߛߊ߫߸ ߊ߬ ߞߊ߬ ߛߊ߲߬ߕߟߊ߬ߟߊ߬ߞߊ ߟߊߥߊ߲߬ߞߊ߬ߟߌ ߘߊߡߌ߬ߣߊ߬ ߊ߬ ߕߎ߬ߡߊ ߢߍ߫߸ ߞߊ߬ ߞߏ߲߬ߘߏ ߕߊ߬ߛߓߍ (bons) ߟߎ߫ ߓߌ߬ߟߊ߬ ߓߟߏ߫ ߟߊ߫ ߞߎ߲߬ߠߊ߬ߛߌ߮ ߓߟߏ߫߸ ߞߵߏ߬ ߟߊߥߟߌ߬ ߞߏ߲߬ߘߏ ߞߣߐ߫ ߣߊ߲ߝߟߏ ߟߎ߬ ߡߙߊ߬ ߢߊ ߟߊߢߊ߬.

߂߀߁߈ ߠߊ߫߸ ߞߊ߬ߓߊ ߞߊ߬ ߛߋߒߞߏߟߦߊ ߟߊ߬ߤߘߌ ߘߏ߫ ߛߐ߬ߘߐ߲߬ ߍߝ.ߍߡ.ߌ ߟߊ߫ ߡߍ߲ ߞߵߊ߬ ߕߏ߫ ߓߍ߲߬ߡߊ߬ߞߊ߲߫ ߖߛߎ߬ߟߊ߬ߕߌ߰ߕߊ ߛߐ߬ߘߐ߲߬ ߘߊ߫ ߢߍߥߟߊ߫ ߞߎߘߊ ߛߊߞߍߟߌ ߘߐ߫ ߡߍ߲ ߞߐߞߘߐߘߍ߬ߡߍ߲߬ ߘߊ߫ ߍߝ.ߍߡ.ߌ ߟߊ߫ ߖߎ߬ߟߎ (crédit) ߘߐ߬ߣߐ߰ߦߊ߬ߟߌ߫ ߦߙߌߥߊߣߍ߲ ߠߊ߫.

ߡߟߊ߬ߘߐ߫ ߞߊ߬ߓߊ߫ ߞߊ߬ ߟߊ߬ߞߎ߬ߘߦߊ߬ߟߌ ߘߏ߫ ߟߎ߫ ߓߌ߬ߟߊ߫ ߛߋ߲߬ߠߊ߫ ߡߍ߲ ߣߐ߬ ߦߋ߫ ߞߏ߲߬ߘߏ ߖߊ߬ߕߋ߬ߘߊ߫ ߞߎ߲߬ߞߋߟߋ߲ ߓߌ߬ߟߊ߬ ߞߏ ߛߎߡߊ߲߫ ߠߊ߫߸ ߊ߬ ߣߌ߫ ߞߊ߬ ߞߣߐߟߊ ߖߎ߬ߟߎ ߘߍ߰ߜߍ ߝߍߙߍ߲ߝߍߙߍ߲߫ ߞߵߊ߬ ߓߍ߲߬ߛߋ߲߬ߡߊ. ߊ߬ ߞߊ߬ ߓߊ߯ߙߊߢߐ߲߯ߦߊ ߛߌߟߊ ߟߊߞߊ߬ ߊ߬ ߣߴߊ߬ ߓߏߢߏ߲߯ߞߏ ߟߎ߬ ߕߍ߫ ߜߙߋ ߞߊ߲߬ ߦߊ߲߬߸ ߊ߬ ߣߌ߫ ߛߌ߰ߢߐ߲߰ ߕߌ߲ߞߎߘߎ߲ ߘߋ߬ߙߌ߬ߘߊ ߟߎ߫ ߝߣߊ߫ ߦߏ߫ ߎߋߡߏߊ «UEMOA-titres»߸ ߛߊ߫ ߞߊ߬ ߖߎ߬ߟߎ ߟߊߣߍ߰ߣߍ߬ ߢߊ ߟߊߢߊ߬. ߊ߬ ߞߍߕߐ ߞߍߣߍ߲ ߢߍߥߟߊ߫ ߣߕߊ߬ߡߊ ߟߎ߫ ߘߊߡߌ߬ߣߊ߬ ߟߊ߫ NTIC ߟߊߛߓߊ߬ߕߌ߫ ߞߊ߲ߡߊ߬ ߊ߬ ߟߊ߫ ߞߏߕߌ߯ߘߊ ߟߊ߫߸ ߡߟߊ߬ߘߐ߫ ߞߊ߬ߓߊ ߞߊ߬ ߘߐ߬ߛߙߋ ߟߎ߬ ߢߊߓߐߟߌ ߞߎ߲߬ߕߊ߮ ߟߊߛߎ߬ߘߎ߲߬ߧߊ߫ ٪߉߂ ߟߊ߫ ߂߀߁߅ ߣߌ߫ ߂߀߁߈ ߠߎ߬ ߕߍ߫. ߊ߬ ߟߊ߫ ߟߐ߲߬ߞߋ߬ߟߊ ߞߎ߲߬ߕߊ߮ ߡߎ߰ߡߍ ߞߘߐ߫߸ ߊ߬ ߞߍ߫ ߘߊ߫ ߥߊߟߌߘߊ ߟߋ߬ ߘߌ߫ ߛߍ߬ߘߏ߲ ߘߊߞߘߐ߫ ߦߙߎ߬ߞߎ߬ߦߙߎߞߎ ߞߍ߬ߟߍ ߘߐ߫߸ ߞߊ߬ ߞߏߢߊߓߐߗߏ ߟߢߊ߬ߟߌ ߛߌ߲߬ߝߏ߲߬ߧߊ߫ ߞߵߊ߬ ߞߍ߫ ߖߋߞߎ߫ ߊ߬ ߟߊ߫ ߝߘߏ߬ߓߊ߬ ߗߋߘߊ ߛߎ߯ߦߊ ߘߐ߫ ߡߌ߬ߙߌ߲߬ߘߌ ߡߊ߬ߞߏ߬ ߢߊ ߡߊ߬.

߂߀߁߈ ߞߏߟߌ߲ߞߏߟߌ߲ ߠߊ߫߸ ߡߟߊ߬ߘߐ߫ ߞߊ߬ߓߊ߫ ߘߏ߲߬ ߘߊ߫ ߊߝߙߌߞߍ߲ ߥߏߡߍ߲ ߟߌߘߊߛ߭ߌߔ ߝߐ߲ߘ «African Women Leadership Fund» ߓߐߒߡߊߟߌ ߟߊ߬ߟߌ߰ߟߌ ߘߐ߫߸ ߏ߬ ߡߍ߲ ߠߊߥߟߌ߬ߣߍ߲߫ ߦߋ߫ ߡߏ߬ߛߏ ߟߎ߬ ߟߊ߫ ߖߘߍ߬ߛߊ߬ߙߌ߬ߦߊ߬ߕߌ߰ߦߊ (ߖߘߍ߬ߡߊ߬ߛߐߘߐ߲) ߡߊ߬ ߡߊ߬ߞߐ߬ߙߐ߲߬ߞߐ߬ߙߐ߲߬ߠߌ߲ ߘߐ߫. ߌߞߐ߫ ߕߎ߲߯ ߂߀߁߉ ߞߏߟߌ߲ߞߏߟߌ߲ ߠߊ߫߸ ߊ߬ ߘߏ߲߬ ߘߊ߫ ߡߊ߲߬ߕߏ߲߬ߕߍ ߝߛߎߞߎ ߞߏߟߊߘߍߢߐ߲߯ߦߊ ߞߎ߲߬ߠߊ߬ߛߌ߰ߟߌ ߟߊ߬ߟߌ߰ߟߌ ߘߐ߫.

ߡߟߊ߬ߘߐ߫ ߞߊ߬ߓߊ߫ ߕߐ߯ߦߊ߫ ߘߊ߫ ߂߀߁߉ ߘߓߊ߬ߕߊ ߂߈ ߠߊ߫ ߞߵߊ߬ ߞߍ߫ ߞߎ߲߬ߠߊ߬ߛߌ߯ ߡߍ߲ ߦߋ߫ ߝߘߏ߬ߓߊ߬ ߗߋߘߊ ߘߐߛߌ߰ߟߌ ߢߎߡߍ߫ ߣߌ߫ ߖߌ߫ ߛߊߣߌߡߊ߲ ߘߊߞߘߐ߫߸ ߊ߬ ߞߍ߫ ߘߴߏ߬ ߞߊ߲ߕߌ߮ ߘߌ߫.

߂߀߂߀ ߠߊ߫߸ ߡߟߊ߬ߘߐ߫ ߞߊ߬ߓߊ߫ ߕߐ߯ߦߊ߫ ߘߊ߫ ߞߴߊ߬ ߞߍ߫ ߊ߬ߡߎ߬ߖߊߌ߫ ߟߌߘߊ߬ (Amujae leader) ߘߌ߫ ߂߀߂߀ ߘߊߦߟߍ߬ߟߌ ߝߍ߬ ߡߏ߬ߛߏ ߟߎ߬ ߟߊ߫ ߞߊ߲ߕߌ߯ߘߊ ߕߊ߲ߓߊ߲ ߘߐ߫ ߛߓߊ߬ߕߌ ߞߊ߲ߡߊ߬߸ ߏ߬ ߕߘߍ߬ ߦߋ߫ ߢߍߥߟߊ ߘߏ߫ ߟߋ߬ ߢߊ ߘߌ߫ ߡߍ߲ ߓߌ߬ߟߊ߬ ߘߊ߫ ߛߋ߲߬ߠߊ߫ ߞߊ߲ߕߌ߯ ߋߟߍ߲߫ ߖߐ߲ߛߐ߲߬ ߛߊ߯ߙߑߟߌߝ ߓߟߏ߫. ߊ߬ߡߎ߬ߖߊߌ߫ ߏ߬ ߟߊ߫ ߡߙߌߦߊ߫ ߛߎߡߊ߲ߣߍ߲ ߕߘߍ߬ ߦߋ߫ ߡߍ߲ ߘߌ߫߸ ߏ߬ ߟߋ ߕߘߍ߬ ߦߋ߫ ߡߏ߬ߛߏ ߟߎ߬ ߟߐ߬ߘߎ߮ ߞߘߐߕߊ߭ ߘߌ߫ ߝߘߏ߬ߓߊ߬ ߞߎ߲ߠߊߛߌ߯ߟߌ (leadership public) ߘߌ߫.

߂߀߂߂ ߘߓߊ߬ߕߊ ߟߊ߫߸ ߡߟߊ߬ߘߐ߫ ߞߊ߬ߓߊ߫ ߕߐ߯ߦߊ߫ ߘߊ߫ ߞߵߊ߬ ߞߍ߫ ߣߊ߲߬ߕߊ߲߬ ߞߏߟߊߘߍ ߣߌ߫ ߡߏ߬ߛߏ ߟߎ߬ ߟߊ߫ ߓߏߟߏ߲ߝߘߊ ߞߎ߲߬ߠߊ߫ ߊߝߙߌߞߌ߬ ߥߙߎߞߌ߫ ߜߍߓߏ߲ (ߓߊߘ «BAD») ߠߊ߫. ߊ߬ ߕߐ߯ߦߊ ߞߵߊ߬ ߓߌ߬ߟߊ߬ ߗߋߘߊ ߏ߬ ߞߎ߲߬ߠߊ߫߸ ߏ߬ ߞߍ߫ ߘߊ߫ ߂߀߂߂ ߥߊ߬ߛߌ߬ߥߙߊ ߁߆ ߟߋ߬ ߡߊ߬.

• ߂߀߁߇ ߞߏߟߌ߲ߞߏߟߌ߲ ߠߊ߫߸ ߊ߬ ߕߐ߯ߦߊ߫ ߘߊ߫ ߊߝߙߌߞߌ߬ ߣߊ߲߬ߝߟߏ߬ߦߊ߬ߟߌ ߞߏߕߌ߯ ߢߣߊ߫ ߁߀ ߠߎ߬ ߘߐ߫ ߝߊ߬ߌߣߊ߲߬ߛߌߦߊߟߑߊߝߙߌߞ (FinancialAfrik) ߓߟߏ߫.

• ߞߎ߲߬ߠߊ߬ߛߌ߰ߟߌ߬ ߓߘߍ ߣߌ߫ ߝߘߏ߬ߓߊ߬ ߞߎ߲ߠߊߛߌ߯ߟߌ ߟߎ߫ ߖߍ߬ߝߙߍ߬ߕߌ߮ ߂߀߁߉ ߟߊߖߍ߲߬ߛߍ߲߬ߠߌ߲ ߊߥߊ ߓߟߏ߫߸ ߊߝߙߌߞߊ ߥߏߡߍ߲ߛ ߊ߬ߖߍ߲ߘߊ߬ «Africa Women's Agenda».