Breath Of The Wild: Dataspel frå 2017

Spelet er det nittande i The Legend of Zelda-serien og går føre seg på slutten av Zelda-tidslina. Spelaren kontrollerer Link, som vaknar etter å ha lege hundre år i dvale for å nedkjempa Calamity Ganon og atterreisa kongeriket Hyrule.

The Legend of Zelda: Breath of the Wild
Utviklar(ar)	Nintendo EPD
Utgjevar(ar)	Nintendo
Distributør	Nintendo eShop
Kreativt ansvarleg(e)	Hidemaro Fujibayashi
Produsent(ar)	Eiji Aonuma
Programmerar(ar)	Takuhiro Dohta Kenji Matsutani Hiroshi Umemiya
Forfattar	Akihito Toda
Komponist(ar)	Manaka Kataoka Yasuaki Iwata Hajime Wakai
Serie	The Legend of Zelda
Spelmotor	Havok
Siste versjon	1.6.0, 1.5.0
Plattform(er)	Nintendo Switch Wii U
Utgjeving	3. mars 2017
Sjanger	Action-eventyr
Spelemodus	Einspelar
Aldersgrense	PEGI 12
Nettstad	https://www.zelda.com/breath-of-the-wild/, https://www.nintendo.co.jp/zelda/botw/
Del av serien The Legend of Zelda⠀
←The Legend of Zelda: Tri Force Heroes  · The Legend of Zelda: Link's Awakening, The Legend of Zelda: Tears of the Kingdom→

Til liks med det originale The Legend of Zelda frå 1986, får spelarar få føresegner og kan utforska spelverda fritt. Oppgåver femner innsamling av ulike emne og utstyr for å hjelpa med ulike mål som å løysa gåter og sideoppdrag. Verda i spelet er ustrukturert og designa for å oppmoda til utforsking og eksperimentering, og hovudoppdraget kan fullførast på ein ikkje-lineær måte.

Utviklinga av Breath of the Wild gjekk føre seg over fem år, etter responsar frå nokre fans som ønskte seg ei større spelverd å utforska. Nintendo freista å tenkja nytt i høve konvensjonane i serien, og introduserte element som ei open verd og ein detaljert fysikkmotor. Monolith Soft, som er kjend for sitt arbeid på Xenoblade Chronicles-serien, hjelpte til med å designa landskapa og topografien i spelet. Breath of the Wild hadde opphavleg planlagd utgjeving i 2015 som ein Wii U-eksklusiv tittel, men vart utsett to gonger. Det vart utgjeve 3. mars 2017, som ein lanseringstittel til Nintendo Switch og som det siste Nintendo-publiserte spelet til Wii U. To omgangar med nedlastbart innhald vart utgjevne i løpet av 2017 som del av ei betalt utvidingspakke for spelet.

Breath of the Wild fekk hyllester frå pressa for den frie strukturen og detaljnivået i spelverda. Kritikarar kalla det ein milepåle i open verd-design, sjølv om det fekk mild kritikk for korleis spelet yta under utgjevinga. Det vann fleire «Årets spel»-prisar og har sidan vorte rekna som eit av dei mest framståande dataspela gjennom tidene. Innan utgangen av 2021 hadde det selt over 26 millionar kopiar, som gjer det til eit av dei mestseljande dataspela noko sinne. Ein spin-off-tittel, Hyrule Warriors: Age of Calamity, vart utgjeven i 2020. Oppfølgjaren Tears of the Kingdom kom ut den 12. mai 2023.

Breath of the Wild finn stad på slutten av Zelda-tidslina i kongeriket Hyrule. 10 000 år før byrjinga av spelet hadde den eldgamle Sheikah-klanen utvikla Hyrule til ein avansert sivilisasjon, verna av fire enorme, dyreliknande maskiner kalla «Divine Beasts» og ein armé av autonome våpen kalla «Guardians». Når den vonde Calamity Ganon manifesterte seg og truga kongeriket, vart fire krigarmeistrar valde ut, kvar av dei pilotar for ein av dei fire Divine Beasts for å svekkja Ganon, medan prinsessa, ein etterkomar av gudinna, og den utnemnde riddaren hennar kjempa og vann over Ganon ved å forsegla han.

 

 

10 000 år seinare har kongeriket Hyrule gått attende til ein mellomalderleg sivilisasjon. Etter å ha lese profetiane frå forfedrane, kjende innbyggjarane i Hyrule att teikna på at Ganon ville venda attende og grov dermed ut omliggjande område for å avdekkja dei fire Divine Beasts og arméen av Guardians. I løpet av denne tida, trena prinsesse Zelda hardt på å vekkja magien ho treng for å kunna forsegla Ganon, samstundes som ho prøver å oppretthalda den personlege forskinga si. I mellomtida vart ein riddar utnemnd for å passa på henne, hovudpersonen Link, som vart vald på grunn av evna si til å bruka det magiske sverdet Master Sword, også kjent som «sverdet som forseglar mørkeret». Dei mest framståande krigarane frå dei ulike rasane i Hyrule – Daruk, ein krigar av goronane frå fjellet; Mipha, ei prinsesse av dei vasslevande zoraene; Revali, ein bogeskyttar av dei fugleliknande ritoane; og Urbosa, høvding av gerudoane frå ørkenen – gjekk saman for å styra dei fire Divine Beasts (respektive Vah Rudania, Vah Ruta, Vah Medoh og Vah Naboris) medan dei dålevande Zelda og Link kjempa mot Ganon. Men Ganon tok seg inn i maskinene til dei allierte, tok kontrollen over dei og vende dei mot Hyrule. Kong Rhoam og dei fire krigarmeistrane vart drepne i krigen, byen ved slottet øydelagd og Link alvorleg skadd medan han forsvarte den siste skansen til den hyruleanske arméen, fort Hateno. Zelda bringa Link til ein trygg stad slik at han kunne koma seg, gøymde Master Sword i skogen Lost Woods i verja til det store dekutreet og brukte magien sin til å forsegla seg sjølv og Ganon i Hyrule-slottet. Denne kataklysmiske tragedien vart gjennom tidene kjend som «Great Calamity».

100 år etter å ha vorte bringa til eit underjordisk kammer for å lækjast, vaknar Link opp med minnetap i eit no krigsherja Hyrule. Han møter ein gamal mann, som openberrar seg som den dvelande anden til kong Rhoam. Rhoam forklarer at Ganon, forsegla i Hyrule-slottet, har vakse seg sterk og kongen bed Link nedkjempa Ganon før han bryt seg laus og legg verda øyde.

Link ferdast gjennom Hyrule og returnerer til stadene frå fortida si og vekkjer minna sine att. Med hjelp frå rasane i Hyrule, kjem han seg om bord i dei fire Divine Beasts og reinsar dei for monstera til Ganon, frigjer sjelene til dei tidlegare krigarmeistrane og lèt dei styra dei fire Divine Beasts nok ein gong. Etter å ha fått tak i Master Sword frå Lost Woods, går Link inn i Hyrule-slottet og nedkjempar Ganon med hjelp frå dei fire Divine Beasts og lysbogen til prinsesse Zelda. Zelda får forsegla Ganon, som atter bringar fred til Hyrule og lét sjelene til kong Rhoam og krigarmeistrane gå vidare til livet etter døden. Link og Zelda merkar nærværet deira og smiler kjærleg.

Dersom spelaren har funne alle dei tretten minna i oppdraget «Captured Memories», låser dei opp ein løynd sluttscene der prinsesse Zelda innser at Hyrule må byggjast opp att, og at ho og Link må starta prosessen sjølve. Medan Link og Zelda undersøkjer Hyrule og går i gang med å atterreisa landet sitt, innrømmer prinsessa at ho kanskje ikkje har overnaturlege krefter lenger, men at ho likevel har forsona seg med den lagnaden.

 

Verda i Breath of the Wild inneheld mellom anna fjell, sletter, skogar, ørkenar og ruinar som spelaren kan utforska. Biletet viser panoramautsikt over ei alpeeng i Frankrike.

 

Breath of the Wild er eit action-eventyrspel som går føre seg i ei open verd der spelarar kan utforska kongeriket Hyrule medan ein styrer hovudpersonen Link. Spelaren kontrollerer Link i eit tredimensjonalt miljø, sett frå eit perspektiv i tredjeperson. Spelet er strukturert på ein ikkje-lineær måte og spelaren får få føresegner, slik at områda i spelet kan utforskast fritt, utan nokon definerte inn- og utgangar. Breath of the Wild introduserer ein realistisk fysikkmotor, som lèt spelarane løysa puslespel på ulike måtar. Spelmotoren definerer dei fysiske eigenskapane til dei fleste objekta og styrer korleis dei interagerer med spelaren og med kvarandre. Samansetnaden og designen resulterer i ei ustrukturert og interaktiv verd som lønnar eksperimentering og lèt ein fullføra oppdrag på ein ikkje-lineær måte.

Spelaren kan reisa gjennom verda ved å springa, klatra, symja, glideflyga eller ri på hesteryggen, sjølv om nokre av metodane er avgrensa av det fysiske uthaldet til Link. Han kan få tak i ulike emne frå miljøa i spelet, inkludert våpen, mat og andre ressursar. Til skilnad frå tidlegare Zelda-spel, slit ein ut dei fleste våpena etter kvart som ein bruker dei. Nokre av tinga har fleire bruksområde; våpen av trevyrke kan brukast som faklar og skjold kan brukast som provisoriske snøbrett. Spelarar kan få tak i matingrediensar ved å jakta på dyr, samla viltveksande frukt eller plukka opp eterlatne kroppsdelar frå nedkjempa fiendar. Ved å varma opp ulike kombinasjonar av ingrediensar, kan spelaren laga matretter og eliksirar som kan restituera helsa og uthaldet til Link, eller gje han mellombels statusoppgraderingar, som auka styrke eller betre evne til å smyga seg innpå fiendar.

Eit viktig verktøy i arsenalet til Link er «Sheikah Slate», ei magisk steintavle som kan brukast til å markera landemerke på eit kart og til å ta bilete av miljøa i spelet. Link kan òg oppgradera tavla til å kunna mana fram fjernstyrte bomber, manipulera metalliske objekt, laga ispillarar på vassoverflater eller frysa objekt fast i tid. I kamp kan spelaren låsa ein markør fast på fiendar, slik at Link angrip meir presist, medan einskilde knappekombinasjonar lèt ein gjera avanserte offensive og defensive manøvrar.

 

Nintendo EPD, ei intern avdeling i Nintendo, utvikla Breath of the Wild til spelkonsollane Nintendo Switch og Wii U. Ifølgje serieprodusenten Eiji Aonuma hadde utviklingsteamet som mål å «ta konvensjonane i Zelda til ny vurdering». Utviklinga starta like etter utgjevinga av The Legend of Zelda: Skyward Sword (2011). Aonuma fekk kommentarar frå spelarar som ønskte å sjå eit meir samankopla kart for å utforska lokalitetane mellom speleområda. I 2013 eksperimenterte Nintendo med ein ikkje-lineær spelestruktur i The Legend of Zelda: A Link Between Worlds, som det fekk positiv mottaking for frå fleire hald. Under E3 2014 sa Aonuma at han planla å reformera katakombar og gåter i spelet, to av dei mest sentrale elementa i Zelda-spela, og redesigna spelet slik at det tillèt spelarar å koma fram til slutten utan å vera nøydde til å gå gjennom heile historia. Av di Nintendo aldri tidlegare hadde utvikla eit moderne open verd-spel i skalaen til Breath of the Wild, såg dei på The Elder Scrolls V: Skyrim for å læra meir om utfordringane med å laga eit moderne, storstilt open verd-spel. For den kunstnarlege stilen i spelet, henta utviklarane inspirasjon frå ulike japanske animar som dei hadde sett då dei var yngre. Hovudpersonen i serien, Link, vart designa til å ha eit meir kjønnsnøytralt uttrykk i spelet, ifølgje Aonuma for å gjera det lettare for spelarar å relatera seg til han.

Før utviklinga kom i gang for fullt, designa utviklarane ein spelbar 2D-prototype lik det opphavlege Zelda for å eksperimentera med fysikkbaserte puslespel. Den endelege utgåva av spelet bruker ein modifisert versjon av fysikkmotoren Havok. Under Game Developers Conference i 2017 heldt kreativt ansvarleg Hidemaro Fujibayashi, teknisk ansvarleg Takuhiro Dohta og kuntnarisk ansvarleg Satoru Takizawa ein presentasjon titulert «Change and Constant – Breaking Conventions with The Legend of Zelda: Breath of the Wild», der dei viste fram ein demo av prototypen. Aonuma kalla fysikkmotoren i Breath of the Wild ei stor utvikling for Zelda-serien, og sa at han «underbyggjer alt i verda» og får ting til å fungera på ein «logisk og realistisk måte», som lèt spelarar handsama puslespel og problem på ulike måtar. Han greidde ut om utfordringane med å utvikla dette systemet, og kom i hug korleis han ein dag under utviklinga gjekk inn i eit område i spelet og fann ut at alle tinga hadde vorte blåsne vekk av vinden. Ettersom tidlegare Zelda-spel auka mengda handlingar Link kunne gjera, innsåg utviklarteamet at å ha for mange handlingar tilgjengelege ville gjera kontrollane kompliserte, så i staden for å leggja til fleire mogelege handlingar, auka dei heller talet på tilfelle som spelaren kan interagera med i verda.

Spelet vart bygd rundt og demonstrert ved trykkskjerm-funksjonane til Wii U, men utviklarane fann ut at «å flytta blikket mellom Gamepaden og TV-skjermen» distraherte ein frå spelet. Funksjonane vart fjerna då spelet gjekk over til å verta utvikla i tospann mellom Switch og Wii U. Wii U-gamepaden påverka òg animasjonen; sjølv om Link tradisjonelt er venstrehendt, er han høgrehendt i dette spelet for å passa med kontrolloppsettet for GamePaden, som har knappane der ein utfører sverdslag på høgresida. Switch-utgåva av spelet yter betre enn Wii U-utgåva når ein speler i «docked» modus over TV-skjermen, men køyrer båe i same oppløysning når Switch er brukt i berbar modus. Switch-utgåva har òg bakgrunnslydar av høgare kvalitet. Aonuma konstaterte at den kunstnarlege stilen var inspirert av gouache og friluftsmåleri for å hjelpa med å identifisera den store spelverda. Takizawa sa at Jōmon hadde vore ein inspirasjon for dei gamle Sheikah-teknologiane og -arkitekturen i spelet, på grunn av mystikken rundt den perioden. Landskapet i spelet var basert på stader i og rundt Kyoto, heimbyen til kreativt ansvarleg Hidemaro Fujibayashi, og var delvis designa av Monolith Soft, som hjelpte til med å formgje topografien i spelet. Området spelaren byrjar spelet i var gjort til eit platå slik at spelaren kan sjå dei vidstrekte landskapa i verda.

Breath of the Wild var det første hovudspelet i Zelda-serien der karakterane snakkar i mellomsekvensane, sjølv om Link held fram som ein stille hovudperson. Aonuma vart gripen den første gongen han høyrde ein karakter med røyst i spelet, og ville gje spelarane eit liknande inntrykk. Utviklarteamet sette seg føre å ta opp røyster for alle mellomsekvensane, ikkje berre hovudsekvensane som opphavleg planlagt. Nintendo sytte for røyster og undertekstar på åtte ulike språk. Opphavleg kunne ikkje spelarane blanda og bytta språka og undertekstane, men Nintendo gav ut ei oppdatering i mai 2017 som lét ein velja språket på røystene. Etter ein utviklingsperiode på fem år, var spelet klart til å publiserast den 3. februar 2017. I samband med utgjevinga av spelet i Taiwan og Sør-Korea tidleg i 2018, gav Nintendo ut ei oppdatering av Nintendo Switch-utgåva som la til omsetjingar på tradisjonelt og forenkla kinesisk og koreansk.

Det originale lydsporet var komponert av Manaka Kataoka, Yasuaki Iwata og Hajime Wakai. Kataoka og Wakai hadde tidlegare arbeidd høvesvis med Zelda-spela Spirit Tracks og The Wind Waker. Lydsporet var hovudsakleg skrive og framført på eit piano, med fokus på ambient musikk og lydar i staden for melodiøs og optimistisk musikk som i tidlegare Zelda-spel. Ifølgje Wakai, hjelpte dette med å gje «autentisitet» til miljøa i spelet og vart teke som ei utfordring av resten av lydteamet.

 

Aonuma ymta opphavleg at eit nytt Zelda-spel var under utvikling til Wii U i januar 2013 under ein Nintendo Direct-presentasjon. Han hevda at spelet ville utfordra konvensjonane i serien, som kravet til at spelarar må fullføra katakombar i ei fastsett rekkjefølgd. Året etter introduserte Nintendo den visuelle stilen til spelet, med HD-oppløysning og cel-shading, i form av videoklipp frå spelet under pressekonferansen til selskapet under E3 2014. Opphavleg hadde spelet planlagd utgjeving i 2015, men vart utsett tidleg det året og syna seg ikkje under E3 2015. Shigeru Miyamoto, skaparen av Zelda-serien, stadfesta på nytt at spelet framleis var planlagt utgjeve til Wii U, trass i at den neste Nintendo-konsollen, Nintendo Switch, var under utvikling. Spelet vart utsett att i april 2016 på grunn av problem med fysikkmotoren. Nintendo lét publikum spela Wii U-versjonen av spelet under E3 2016, der dei òg kunngjorde undertittelen, Breath of the Wild. CNET hevda at framvisinga ville «ta pusten frå ein», og Breath of the Wild var det mest omtalte spelet under E3 2016 på sosiale medium ifølgje Brandwatch, ei plattform som overvakar aktiviteten på sosiale medium. Det var òg med på ei liste over dei beste spela ved E3 av Eurogamer, GameSpot, og GamesRadar+. Under ein Nintendo-presentasjon i januar 2017 vart ein trailer vist fram som annonserte at spelet ville koma ut som ein lanseringstittel til Switch.

Breath of the Wild vart utgjeve for både Wii U og Switch den 3. mars 2017. Det var det siste Nintendo-spelet utgjeve til Wii U. Switch-versjonen var tilgjengeleg i utgåver i avgrensa opplag, «Special Edition» og «Master Edition», som båe inkluderte ein «Sheikah Eye»-mynt, eit kart over spelverda, ein CD med lydspor frå spelet og ei bereveske for Switch-konsollen. «Master Edition» inkluderte i tillegg ein skulptur av sverdet Master Sword. Ein «Explorer's Edition» av spelet vart utgjeven til Switch den 23. november 2017, som inneheldt eit dobbeltsidig kart og ei bok på hundre sider med historie frå spelet. Spelet har ulike bilete på omslaget mellom dei nordamerikanske og europeiske utgåvene. Ein samlepakke på fem CD-ar, med 211 lydspor frå spelet, vart utgjeven i Japan den 25. april 2018.

Nedlastbart innhald

Den 30. juni 2017 gav Nintendo ut eit «season pass» for to pakker med nedlastbart innhald (DLC): The Master Trials og The Champions' Ballad. The Master Trials legg til spelmodusar, funksjonar og hjelpemiddel. I «Trial of the Sword»-utfordringa står spelaren ovanfor tre prøvingar, som femner høvesvis tolv, seksten og tjuetre rom. Kvart rom er fylt med fiendar som spelaren må nedkjempa før ein kan gå vidare. Kvart rom må fullførast før spelaren kan henta premien sin. Spelaren startar utan noko utstyr og vil mista all progresjonen dersom Game Over-skjermen kjem til syne. Ved slutten av kvar prøving vil Master Sword verta oppgradert, slik at det kan valda meir skade og får eit sterkare blåskin. Når spelaren greier den tredje og siste prøvinga vil Master Sword få dobla åtaksstyrke og vil lysa blått. Den nedlastbare pakken legg òg til ein meir utfordrande vanskegrad, kalla «Master Mode», som mellom anna gjer fiendane ein rang sterkare. Fiendane vil vera meir kjenslevare når Link smyg nært dei og vil sakte regenerera helsa si under kamp. Nye, svevande plattformer vil koma til syne ulike stader i verda, med fiendar ein kan kjempa mot og skattekister som premie. Funksjonen «Hero's Path» teiknar opp vegen spelaren har gått på kartet over spelverda, for å hjelpa ein å finna stader ein ikkje har utforska enno. Spelaren kan òg finna ein medaljong som lagrar den noverande plasseringa til Link og seinare kan transportera han til den same plasseringa til ei kvar tid. Nye hjelpemiddel femner korok-maska, som varslar spelaren når ein korok er i nærleiken, og andre kostyme knytte til tidlegare Zelda-spel.

The Champions' Ballad vart utgjeven 7. desember 2017. Pakken legg til ein ny katakombe, meir historie, nytt utstyr og ekstra utfordringar, i tillegg til Master Cycle Zero, eit framkomstmiddel likt ein motorsykkel som Link kan ri på etter å ha greidd dei naudsynte oppdraga.

Ein «Complete Edition» av spelet med all DLC på spelbrikka vart utgjeven i Japan den 8. oktober 2021.

Aggregat av omtalar
Aggregat	Poengsum
Metacritic	(Switch) 97/100 (Wii U) 96/100
Omtalar
Publikasjon	Poengsum
Destructoid	10/10
Edge	10/10
Electronic Gaming Monthly	9.5/10
Eurogamer	Essential
Famitsu	40/40
Game Informer	10/10
Gamer.no	6/10
Game Revolution
GameSpot	10/10
GamesRadar
IGN	10/10
Nintendo Life
NRK
Nintendo World Report	9.5/10
Polygon	10/10
VideoGamer.com	9/10

Breath of the Wild vart utgjeve til kritikarros, der fleire kalla spelet eit meisterstykke og eit av dei mest framståande dataspela noko sinne. Ved kritikkaggregatet Metacritic var Breath of the Wild det høgst rangerte dataspelet i 2017 og har det høgste talet på omtalar med «perfekt» poengsum av noko spel nokon gong. Publikasjonar innan dataspelindustrien inkluderte IGN, GameSpot, Polygon, Entertainment Weekly, Eurogamer, Electronic Gaming Monthly, GamesRadar+, og Game Informer rangerte Breath of the Wild som det beste spelet frå 2017. Ifølgje Metacritic toppa Breath of the Wild 18 lister over dei beste spela frå det førre tiåret, meir enn noko anna spel frå 2010-åra.

Spelet fekk ros for dei open verd-baserte spelemekanikkane. Jose Otero i IGN skildra det som «eit meisterstykke i open verd-design» og «ei vedunderleg sandkasse full av mystikk, dusin på dusin av lokkande ting føre deg som berre tryglar om å utforskast.» GameSpot kalla det det mest imponerande spelet Nintendo har laga, og skreiv at det «tek opp utformingar og mekanismar gjorde perfekte i andre spel og arbeider dei om for sine eigne føremål for å skapa noko heilt nytt, men som framleis kjennest typisk som eit Zelda-spel … Det er både ei atterkome til gamal form og eit sprang inn i eit uutforska territorium, og det overgår forventningane på båe frontar.» Edge skreiv at verda i spelet var «ei absolutt og ubroten glede å gå seg vill i» og at «magien med å få tak i alle verktøya i byrjinga er kunnskapen om at løysninga på kvart problem allereie er til din disposisjon, og at du alltids kan endra taktikk». Ifølgje Digital Trends gav evna til å klatra på alle overflater og å glideflyga langs kartet spelarar ein rørslefridom som «opna opp sjangeren, og tvinga utviklarane til å tenkja nytt om korleis spelarane interagerer med verda» og «visa ekstra omtanke for vertikal design.» I kontrast til «Ubisoft-aktige» spel som fyller kartet med punkt av interesse og mål, oppmodar den frie utforskinga i Breath of the Wild spelarane til å setja sine eigne mål, der ein markerer kartet med sine eigne oppdagingar som fungerer som «eit register over kva spelarane har oppnådd.»

Ifølgje Kyle Orland i Ars Technica, «etter å ha brukt ei veke heilt nedsøkkt i den open verd-baserte nyvinninga av den velkjende Zelda-formularen, er det vanskeleg å gå attende til dei meir regelfaste tidlegare spela i serien». Journalistar kommenterte uventa interaksjonar mellom elementa i spelet, der utrulege augeblikk vart populære på sosiale medium. Chris Plante i The Verge spådde at medan tidlegare spel med open verd hadde ein tendens til å innehalda føreskrivne utfordringar, ville Zelda påverka ein ny generasjon av spel med open problemløysning. Digital Trends skreiv at nivået av eksperimentering i spelet lèt spelarar samhandla med og utnytta miljøet på kreative måtar, som resulterer i ulike «triks» som framleis vert oppdaga år etter utgjevinga.

Kritikarar roste detaljnivået og innlevingsevna. Kotaku rådde til å skru av UI-elementa til ros av dei indirekte signala som kontekstuelt indikerer same informasjon, som at Link skjelv i kulda og at punkt på kartet dukkar opp når ein bruker kikkerten. Kritikarar kommenterte òg dei uventa kombinasjonsvonene av interaksjonar mellom Link, innbyggjarar, kjæledyr og fiendar, der mange av dei vart delt mykje på sosiale medium. Ei hyllest til den tidlegare Nintendo-presidenten Satoru Iwata, som døydde medan spelet var utvikla, fekk òg positiv mottaking.

Jim Sterling var meir kritisk enn dei fleste og gav Breath of the Wild sju av ti mogelege poeng. Omtalaren kritiserte vanskegraden, varigskapen til våpena og nivådesignen, men roste den opne verda og variasjonen av innhald. Anna kritikk fokuserte på den ujamne biletfrekvensen og den låge oppløysninga på 900p; seinare oppdateringar av spelet bøtte på nokre av desse problema.

Sal

Breath of the Wild sette nye salsrekordar for ein Nintendo-lanseringstittel i fleire regionar. I Japan selde Switch- og Wii U-versjonane 230 000 kopiar samanlagd den første veka etter lanseringa, der Switch-versjonen vart det mestseljande spelet utgjeve den veka. I Storbritannia var Breath of the Wild det andre mestseljande spelet i handelen veka det kom ut, bak Horizon Zero Dawn, og vart det tredje mestseljande Zelda-spelet etter The Wind Waker og Twilight Princess. I USA var Breath of the Wild det andre mestseljande spelet månaden det kom ut, etter Tom Clancy's Ghost Recon Wildlands. Nintendo rapporterte at Breath of the Wild selde meir enn éin million kopiar i USA den månaden, 925 000 av dei til Switch – ein såkalla «attach rate» på 100%. I april 2017 rapporterte Nintendo at spelet hadde selt 3,84 millionar kopiar verda over innan slutten av mars, 1,08 millionar til Wii U og 2,76 millionar til Switch, som overgjekk det globale salet av Switch-konsollar på 2,74 millionar i same perioden. Nintendo-president Tatsumi Kimishima sa at «attach raten» til Breath of the Wild for Switch var «makelaus». Innan mars 2019 hadde spelet selt 14,27 millionar kopiar globalt, 12,77 til Switch og 1,61 til Wii U, som gjer Breath of the Wild til det mestseljande spelet i Zelda-serien. Totalt sal av Switch-versjonen nådde 25,80 millionar per 31. desember 2021. Spelet har selt 1,69 millionar kopiar til Wii U.

Æresprisar

Etter demonstrasjonen av spelet under E3 i 2016, fekk Breath of the Wild fleire utmerkingar frå Game Critics Awards og frå publikasjonar som IGN og Destructoid. Det var oppført som eit av dei beste spela ved E3 av Eurogamer, GameSpot, og GamesRadar+. I slutten av 2016 fekk Breath of the Wild to prisar under Gamescom, og vann prisen for mest etterlengta spel under The Game Awards 2016.

Etter utgjevinga har Breath of the Wild vunne fleire prisar ved The Game Awards 2017, mellom anna for årets spel og beste action-eventyrspel, og var nominert til beste musikk og beste lyddesign. Under 21st Annual D.I.C.E. Awards i 2018 vann det prisen for årets spel i tillegg til andre prisar.

Kort tid etter utgjevinga av Breath of the Wild diskuterte journalistar og personar frå dataspelindustrien om korleis det ville påverka framtidige spel med open verd og Zelda-serien. Benjamin Plich, designar av Assassin's Creed: Unity og For Honor, sa at han trudde utviklarar ville henta inspirasjon frå fokuset på eksperimentell speling, og PC Gamer skreiv at spelet «[sette] ein standard resten av sjangeren burde leva etter.»

I åra etter utgjevinga har fleire spel og utviklarar sitert Breath of the Wild som ein inspirasjon. Desse inkluderer Genshin Impact, Ghost of Tsushima, Immortals: Fenyx Rising, Telling Lies og Halo Infinite. Likskapar har også vorte noterte mellom Breath of the Wild og andre open verd-titlar sidan lanseringa, inkludert Pokémon Legends: Arceus, Sonic Frontiers og Horizon Forbidden West. Ifølgje Digital Trends, har Breath of the Wild vorte eit populært samanlikningspunkt for spel med opne verder, som «nærmar seg «It's the Dark Souls of...» nivåar av klisjé.»

Suksessen til spelet vekte auka interesse for Wii U-emulatoren Cemu, ettersom Cemu-utviklarane raskt oppdaterte programvara til å køyra spelet med ein jamn biletfrekvens berre nokre veker etter lanseringa.

I september 2020 annonserte Nintendo Hyrule Warriors: Age of Calamity, eit hack and slash-spel i stil med Dynasty Warriors-serien, etter Hyrule Warriors frå 2014. Age of Calamity er ein «spin-off» av Breath of the Wild, med historia sett til 100 år tidlegare. Spelet vart utgjeve 20. november 2020 til Nintendo Switch.

Oppfølgjar

Ein oppfølgjar til Breath of the Wild vart annonsert under E3 2019. Oppfølgjaren vart unnfanga då ein planlagde det nestlastbare innhaldet til Breath of the Wild; utviklarane kom opp med fleire idéar, derav nokre kunne ikkje implementerast på grunn av tekniske avgrensingar. Dei sette seg då føre å bruka desse idéane i eit nytt spel. Ifølgje Aonuma vil oppfølgjaren byggja på verda i originalen, med ei ny historie og nye spelelement, og er delvis inspirert av Red Dead Redemption 2. Fujibayashi vil halda fram i rolla som kreativt ansvarleg. Under E3 2021 var spelet annonsert til å koma ut i 2022, men i mars 2022 vart det utsett til våren 2023. Undertittelen på oppfølgjaren, Tears of the Kingdom, vart avduka i september 2022 saman med endeleg utgjevingsdato den 12. mai 2023.