Flodhest: Pattedyrart

Flodhest
Flodhest under vatn
Utbreiing og status
Status i verda: Sårbar Kart som viser tidlegare (raudt) og noverande (grønt) utbreiingsområde for flodhest.
Systematikk
Underrekkje:	Virveldyr Vertebrata
Klasse:	Pattedyr Mammalia
Overorden:	Paraxonia
Orden:	Klauvdyr Artiodactyla
Familie:	Flodhestar Hippopotamidae
Underfamilie:	Hippopotaminae
Slekt:	Hippopotamus
Art:	Flodhest H. amphibius
Vitskapleg namn
Hippopotamus amphibius von Linné, 1758

Flodhesten fanst tidlegare i Afrika heilt nord til Nilen og i Jordanelva i Asia. I dag lever ville flodhestar berre i Afrika sør for Sahara. Dyra er rekna som sårbare av IUCN.

Flodhestar er kraftige, tjukkhuda og nesten hårlause dyr. Vaksne dyr har vanlegvis ei skulderhøgd på rundt 1,4 meter og ei lengd på 3,3–3,5 meter, men kan nå opptil 4,5 meter. Hannar er større enn hoer og veg gjerne mellom 1600 og 3200 kg, medan hoer kan bli opptil 650-2350 kg. Nyfødde flodhestar er 25-5 kg tunge.

Dyra har store hovud med kraftige kjevar og store tenner. Fortennene og hjørnetennene veks livet gjennom. Beina er korte og dei har fire tær på kvar fot. Tærne kan sprika og har symjehud.

Flodhesten er tilpassa eit liv der han er mykje nedsenkt i vatn, med auge, øyre og nasebor på oversida av hovudet. Nasebora kan lukkast.

Flodhestar lever i og ved elver, sjøar og sumper. Dei held til i flokkar som typisk omfattar 10-15 individ, men kan også danna større flokkar på opptil 150 dyr. Flodhesthannar kan vera særs aggressive mot kvarandre.

Dei er planteetarar som hovudsakleg et plantar som veks ved vatnet dei held til i. Som regel går dei på land og beiter om natta.

 

Flodhest har blitt jakta på for kjøt, feitt, skinn og tenner. Særleg dei store nedre hjørnetennene er blitt brukt som kjelde til elfenbein. Sidan 1900 har talet på ville flodhestar gått tilbake grunna jakt og habitattap.

Flodhestar kan drepa menneske. Dei kan også gjera stor skade på avlingar i jordbruket.