Fame'e Nono Nihalö

Si to'ölö ba nöri Laraga, lafalua ia sahari fatua lö alua walöŵa. Owulo ndra ina sino muhalö ba lafe'e ni'owalu. Ba fatua ua lö lafe'e, ba so ginötö wamotu. Ösi wame'e nono nihalö andre ya'ia fangona safuria khö ndra satuania, talifusönia, ba ira sibayania. Na no aefa dania lafe'e, ba ero so dalifusö si tohare, ba möi nono nihalö mangona, italagui mbagi dalifusönia, ba ilau mangona.

Ba ginötö wame'e, ba labe'e baulu nono nihalö, moroi ba mbete'enia, no lafonöu ia nukha safusi, lafedadao ia ba gotalua ndra ina sino owulo . Ba samösa zatua ndra ina i'ondrasi nono nihalö, italagui mbagi nono nihalö ba ilau mangenu, möi ia bakha ba nöu ni'owalu. Ngenu-ngenu ni'anunösinia sindruhunia ngenu-ngenu dödö nono nihalö. Ina-ina sotalagui ya'ia hulö isalahini ni'owalu.

Huuu... Ina...
hana izumaigö ndra'o khömi ina
wa mi'ohe ndra'o ba gotalua zatua mbanua ina
Huuu... ina....
hadia zalagu si no ufalua
wa mifabali ndra'o yomo khömi ina
wa mibözi garamba famofanögu ina
wa mitema mbawi sebua
awö mböwö soya ina...
huuu ina...
hiza dania na mofanödo
haniha dania ngoni-ngonimö ina
sangai idanö na mofökhö'ö ina
solului halöŵö na so domeda le ina...
Huuuuu ina....
hiza mbanua nirugigu dania le ina
no to'ölö ira wombambaya halöŵöra
alai dania na nihede-hede'ö ndra'o ina
me ambö fangi'ilagu wö ina
Huuuu ina....
alai na fangeherai ninagu ndra'o
wa fangeherai mbanuada he ina
me lö nekhe-nekhegu wö ina
me lö sifaguru ndra'o
ba lala halöŵö
huuuu ina....
huuuu ina....