अरबी भाषा

अरबी भाषा वा अरबी भासा हलिंया दकलय् व्यापक रूपं ल्हाइगु सेमेटिक भाषा ख। नापं, हलिमय् दकलय् आपा ल्हाइगु भासय् छगू भासा ख। थ्व भाय् ४६७ मिलियन स्वया अप्व मनूतेसं ल्हाइ। थ्व भाय् आपालं अरब हलिमय् ल्हाइगु जुसां थ्व भाय् इरान, तर्की, चाड , माली, सेनेगल, इरिट्रिया, इथियोपिया, दक्षिण सूडान थें न्याःगु मेमेगु देसय् नं ल्हाइगु या। हलिंया दकलय् अप्व मनूतेसं ल्हाइगु भासाया धलखय् थ्व भाय् ५गू थासय् ला। नापं, हलिंया थीथी देसय् आधिकारिक भाषाया मान्यता दूगु धलखय् थ्व भाय् स्वंगु थासय् ला। थ्व भाय्यात २७गू देसं आधिकारिक भाषाया रूपय् मान्यता बियातःगु दु अरबी भाषा मुस्मांतेगु धर्म भाषा ख। मुस्मांतेगु ग्रन्थ कुरान थ्व हे भासय् च्वयातःगु दु। नापं, मुस्मांतेगु प्रार्थना, पूजा व धार्मिक अनुष्ठानय् याइगु इस्लामी कृत्य थ्व हे भासय् जुइ। अरबी अरब हलिंया इसाइ चर्चया नं मू भाषा ख। नापं, मध्य युगय् यक्व महत्वपूर्ण यहूदी धार्मिक व बौद्धिक च्वखँ थ्व हे भासय् च्वयातःगु दु। अरब साम्राज्यं थीथी देसय् इस्लामया प्रसार याःबिले अरबी भाषाया स्थिति बांलाना वन। मुस्मांतेसं शासित देसय् यक्व शताब्दि तक थ्व भाय् राजनीति, विज्ञान व साहित्यया भाषा जुयाच्वन। अरबी भाषा इस्लामी हलिंया मेमेगु भाषात दसु तर्कीश, फारसी, तमाजाइट, कुर्दिश, उर्दू, भासा मलय, इन्दोनेशियन, अल्बानियन व अन्य अफ्रीकी भाषात दसु हौसा, स्वाहिलीइ नं प्रत्यक्ष व अप्रत्यक्ष प्रभाव दयेकूगु दु। तिगरि, अम्हारिक, व सोमाली नापं छुं यूरोपियन भासय्, विशेष रूपं भूमध्यसागरीय भासा, दसु स्पेनिश, पोर्चुगिज, माल्तिज व सिसिलियन भासय् अरबी भासाया त्या खँग्वः आया इलय् नं खनेदु। थ्व भाय्या छुं खँग्वः अंग्रेजी व मेमेगु भासाय् दुथ्याधुंकूगु दु। अंग्रेजी खँग्वः दसु एडमिरल, त्यारिफ, अल्कोहल, अल्जेब्रा थ्व हे भाय्या खँग्वलं बुयावःगु खँग्वः ख। थ्व भासायात इस्लामिक देय् व अरब हलिंया सीमानाय् दूगु अफ्रिकन देसय् आधिकारिक वा अनौपचारिक रूपं स्यनेगु या।