Wörpdaal

Wapen/Flagg	Koort
Basisdaten
Bundsland: Neddersassen Landkreis: Oosterholt Gemeen: Worpsweed
Inwahners:
Postleettall:	27726
Vörwahl:	04792
Geograafsche Laag:	53° 13′ N, 8° 54′ O

Wörpdaal (hoochdüütsch Wörpedahl) is en lütt Dörp in de Gemeen Worpsweed in’n Landkreis Oosterholt, Neddersassen. Binnen de Gemeen höört de Oort to de polietsche Oortschop Worpsweed.

De Oort liggt in dat Düvelsmoor in’n Süüdwesten von’n Weyerbarg. Dat Water ut dat Rebeed flütt över’n Wörpdaler Graven na de Hamm hen af.

De Naveröörd sünd Worpsweed in’n Noordoosten, Oostendörp in’n Oosten, Süüdweed in’n Süüdoosten, Noordweed in’n Süden, Waakhusen in’n Süüdwesten un Weyermoor in’n Noordwesten.

Wörpdaal is 1756 in’n Rahmen von de findörpsche Moorkolonisatschoon as Moorkolonie in dat Düvelsmoor grünnt worrn. De Kolonie harr blots en Grött von 37 Hektar, opdeelt op söven Hoffsteden.

In’n Tweten Weltkrieg sünd twee Soldaten ut Wörpdaal fullen oder vermisst.

Verwaltungsgeschicht

In de Franzosentied hett de Oort toeerst 1810 bet 1811 binnen dat Königriek Westfalen to de Mairie Worpsweed in’n Kanton Leendaal höört un denn von 1811 bet 1814 to dat Franzöösche Kaiserriek ünner Napoleon un dor ok wedder to de Mairie Worpsweed in’n Kanton Leendaal.

De Oort hett vör 1852 to de Vaagdie Worpsweed von dat Amt Oosterholt tohöört un denn von 1852 bet 1885 to dat Amt Leendaal. Na 1885 weer dat in’n Kreis Oosterholt, de 1932 mit’n Kreis Blomendal to’n ne’en grötteren Kreis Oosterholt tohoopgahn is.

De Oort weer fröher en egenstännige Gemeen. Düsse Gemeen is an’n 1. April 1929 mit Weyermoor, Noordweed, Süüdweed un Worpheim to de ne’e Gemeen Worpheim tohoopleggt worrn. Düsse Gemeen hett denn blots bet to’n 1. Oktober 1936 bestahn, as de Gemeen Worpheim Deel von de Gemeen Worpsweed worrn is. De Gemeen Worpsweed is mit de Gemeenreform in Neddersassen an’n 1. März 1974 noch wedder grötter worrn. Siet 1974 is Wörpdaal binnen de Gemeen Worpsweed Deel von de Oortschop Worpsweed, de en egen Oortsvörsteiher hett.

Inwahnertall

Religion

Wörpdaal is evangeelsch-luthersch präägt un höört to dat Kaspel von de Zion-Kark in Worpsweed. Bevör de Kark in Worpsweed 1759 anleggt worrn is, hett de Oort to dat Kaspel von de Willehadi-Kark in Scharmbeek höört.

För de Kathoolschen gifft dat in Worpsweed de Maria-Freden-Kapell, de to de Goden-Hirt-Kark in Leendaal höört. De Goden-Hirt-Kark höört siet 1. September 2012 to de Karkengemeen von de Hillige-Familie-Kark in Oosterholt-Scharmbeek.

Gedenktafeln för de Fullenen ut de twee Weltkrieg’ hängt in Worpsweed in de Kark.

Verkehr

An Wörpdaal langs löppt de Kreisstraat 11, de in’n Noordoosten in Worpsweed in de Landsstraat 153 münnt un in’n Süüdwesten över Waakhusen un Viehland na de K 9 bi Oosterholt-Scharmbeek un Hu’e löppt. De L 153 föhrt von Worpsweed in’n Noorden na Huttenbusch un in’n Süden na Leendaal.

De nächste Autobahn is de Autobahn 27 (Afsnidd Bremerhoben–Bremen). De Opfohrt 17 Bremen-Industriehavens liggt so 15 Kilometer in’n Süüdwesten von Wörpdaal an de Hu’er Heerstraat.

De nächste Bahnhoff is so bi teihn Kilometer wied weg in’n Westen de Bahnhoff Oosterholt-Scharmbeek an de Bahnlien Bremen–Bremerhoben. Von 1911 bet 1978 hett dat ok Personenverkehr op de Bahnlien Stood–Oosterholt-Scharmbeek geven. De Bahnhoff Weyermoor leeg in disse Tied üm un bi een Kilometer in’n Noordwesten von Wörpdaal.

Scholen

Wörpdaal harr fröher en egen Volksschool. Vör 1853 hett dat Scholen in Weyermoor un in Noordweed geven. In dat Johr sünd de beiden Scholen aver oplööst worrn un de Öörd hebbt tohoop en ne’e School boot, de nu in Wörpdaal stahn dee. De School is bet Oostern 1956 bestahn bleven, as se denn dichtmaakt worrn is.