Logik (ooldgreeksch ἡ λογική τέχνη hē logikḗ téchnē, plattdüütsch de Kunst vun’n Denken) is de Lehr vun de vernünftigen Slüss in dat Denken.
De Logik unnersöcht, ob Argumenten richtig bruukt weert. Dorbi is dat egol, wo dat üm geiht. De Logik kickt bloß to, dat de Argumenten passlich sünd. Een snackt ok vun „formale“ Logik in düssen Tosamenhang. De Logik warrt as en Twieg vun de Philosophie, man ok vun de Mathematik un vun de Informatik ankeken.
Dat Woort „Logik“ warrt in Grekenland in de öllere Stoa un in den öllern Peripatos bruukt för de „Lehr vun de Argumenten“ oder de „Lehr vun de vernünftigen Slüss“. Vun dat 1. Johrhunnert v. Chr. af an gifft dat dor Belegen för. De antike Stoiker Zenon vun Kition hett dat Woort al bruukt.
In de düütsche (un plattdüütsche?) Sprake warrt dat Woort „Logik“ in dat 18. un 19. Johrhunnert faken an de Stäe vun Kennistheorie, Ontologie oder vun allgemeene Dialektik bruukt. So is dat jedenfalls bi Immanuel Kant un bi G. W. F. Hegel.
Vun dat 20. Johrhunnert af an warrt tomeist „symboolsche Logik“ as „Logik“ ankeken. Düsse Logik is up en Kunstspraak upboot un bruukt Slussregeln, de streng verafreedt sünd. Annere Wöör för symboolsche Logik sünd „mathematische Logik“ oder „formale Logik an sik“.
In de Ümgangsspraak warrt en Argument as „logisch“ ankeken, wenn dat, wat seggt warrt, övertüügt un keen dumm Tüüch snackt warrt.
This article uses material from the Wikipedia Plattdüütsch article Logik, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Der Inhalt ist verfügbar unter CC BY-SA 4.0, sofern nicht anders angegeben. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Plattdüütsch (DUHOCTRUNGQUOC.VN) is an independent company and has no affiliation with Wiki Foundation.