Klindworth Fruchtsäft

De Fruchtsaft von Klindworth warrt nich in’n Detailhannel verköfft. He warrt blots in de Gastronomie verdreven.

De Ümsatz leeg 1999 bi 31 Millionen Mark. In dat Johr hett Klindworth mit üm un bi 60 Lüüd in Lohn 250.000 Hektoliter Saft produzeert.

Diedrich Klindworth hett 1935 en Appelmosteree in Zittens grünnt. He hett Appels von de Hööv ut de Ümgegend un ut Oolland to Appelsaft verarbeidt. Later hett dat Ünnernehmen ok en Bedriev in de Horbörger Straat in Buxthu apenmaakt.

Von 1954 bet 1968 hett dat Ünnernehmen op dat Gelänn von de fröhere Poppeerfabrik Winter bi Ooldklooster in’n Süden von Buxthu produzeert.

In dat Johr 1968 is dat Klindtworth-Wark in Buxthu von dat Ünnernehmen Granini övernahmen worrn.

Klindworth Fruchtsäft is en Familienünnernehmen bleven, bet 1992 de Hero-Grupp 75 % von dat Ünnernehmen köfft hett. To’n 1. April 1998 hett de Broeree Karlsberg den Andeel von de Hero-Grupp övernahmen.

2004 sünd de Fruchtsaftfirmen von Karlsberg (blangen Klindworth ok noch de Merziger Fruchtgetränke GmbH) mit de Niehoffs-Vaihinger Fruchtsäfte GmbH tohoopgahn un hebbt de Tucano-Holding billt. Disse Holding is 2008 denn an’n Mineralbrunnen Überkingen-Teinach verköfft worrn.

Vondaag produzeert dat Ünnernehmen in dat Wark an de Straat Westerböhmen/Lindenstraat in Zittens.

• Websteed von dat Ünnernehmen (hoochdüütsch)