Juni

De Juni, ok as Braakmaand bekannt, is in’n Gregoriaanschen Klenner de sösste Maand in dat Johr. De Juni hett 30 Daag un tellt to de Sommermaanden.

In’n Juni liggt de Sommersünnwend, de an den 21. Juni is, dör de Himmelsmechanik ober ok an 20. oder 22. Juni wesen kann. Dat is de längste Dag in dat Johr, wat ok to glieke Tiet de Anfang vun’n Sommer is. De Naam stammt von de röömsch Göddin Juno af, de Fru von Jupiter un Göddin vun de Ehe.

En ollen hoochdüütschen Naam för den Maand is Brachet oder Brachmonat, as dat in dat Middelöller in de Dreefellerweertschop de Tiet weer, wo de Brach (d. h. Braak) anfüng. Bi de Goorners snackt man ok von’n Rosenmaand, as de Rosenbleih dor ehrn Hööchpunkt hett. In den röömschen Klenner weer dat de veerte Maand. Dor harr he blots 29 Daag.

De Maanden Juni und Juli höört sik teemlich gliek an, dorüm warrt to’n Juni mitünner ok Juno seggt – as de Göddin, wona de Mannod jo ok nöömt is. Den Juli nöömt man denn Julai, dormit man dat nich mehr verwesseln kann.

Dat gifft in een Johr keen annern Maand, de mit den glieken Wekendag anfangt as de Juni. Man de Februar vun’t nächst Johr, de fangt mit den glieken Dag an.