Grinnen: Oort in’n Landkreis Veern, Neddersassen

Wapen/Flagg	Koort
Basisdaten
Bundsland: Neddersassen Landkreis: Veern Gemeen: Langwedel
Inwahners:
Postleettall:	27299
Vörwahl:	04235
Geograafsche Laag:	52° 59′ N, 9° 5′ O

Grinnen (hoochdüütsch Grinden) is en lütt Dörp in de Gemeen Langwedel in’n Landkreis Veern, Neddersassen. Binnen de Gemeen höört de Oort to Hagen-Grinnen un to de polietsche Oortschop Ädelsen.

De Oort liggt in de Masch twüschen de Werser un de Ole Aller. In’n Noorden von’n Oort löppt vondaag de Slüsenkanaal Langwedel langs.

De Naveröörd sünd Bauen in’n Noorden, Ädelsen un Koppeln in’n Noordoosten, Hagen in’n Oosten, Intschen un Meierwiede in’n Süüdoosten, Heemhude un Schogrinnen in’n Süden, Ahsen in’n Süüdwesten un Streek in’n Westen.

Verwaltungsgeschicht

In de Franzosentied hett de Oort toeerst 1810 bet 1811 binnen dat Königriek Westfalen to de Mairie Hagen-Grinnen in’n Kanton Achem höört un denn von 1811 bet 1814 to dat Franzöösche Kaiserriek ünner Napoleon un dor to de Mairie Bauen in’n Kanton Achem.

De Oort hett vör 1852 to de Oostvaagdie von dat Gogericht Achem tohöört, dat 1852 denn to dat Amt Achem worrn is. Na 1885 weer dat in’n Kreis Achem. 1932 is de Kreis Achem mit’n Kreis Veern tohoopgahn un hett den ne’en un grötteren Kreis Veern billt.

De Oort höört von öllers to de Buurschop un later de Gemeen Hagen-Grinnen mit bi. De Gemeen Hagen-Grinnen is an’n 1. Juli 1968 Deel von de Gemeen Ädelsen worrn, de an’n 1. Juli 1972 mit de Gemeenreform in Neddersassen Deel von de Gemeen Langwedel worrn is. Sietdem höört Grinnen binnen de Gemeen to de Oortschop Ädelsen, de en egen Oortsraad un Oortsbörgermeester hett.

Inwahnertall

Religion

Grinnen is evangeelsch-luthersch präägt un höört to dat Kaspel von de Kark to’n goden Heer in Ädelsen. Düsse Kark is 1965 trech worrn. Vörher hett de Oort to dat Kaspel von de Cosmas-un-Damian-Kark in Lunsen höört.

För de Kathoolschen is de St.-Josef-Kark in Veern tostännig.

För dat Dörp sett sik de Dörpvereen Ädelsen–Cluvenhagen–Hagen-Grinnen in, de sik an’n 12. Dezember 1991 grünnt hett.

För Grinnen is de freewillige Füürwehr Cluvenhagen mit tostännig.

Bi Schogrinnen is ok de Fähr twüschen Hagen-Grinnen un Ahsen-Ötzen. De Fähr dükert in dat 18. Johrhunnert toeerst in de Oorkunnen op un is bet 1959 föhrt. 2001 hett sik en Fährvereen grünnt, de nu wedder en Fähr för Footgängers un Fohrradfohrers bedrifft.

Verkehr

Von Grinnen geiht en Straat na Hagen un von dor de Kreisstraat 7 in’n Noorden wieder na Ädelsen an de Landsstraat 158, de in’n Noordwesten över Bauen na Achem un na Bremen rin föhrt un in’n Süüdoosten över Cluvenhagen un Dauben na Langwedel un in Daulsen na de Bundsstraat 215.

De nächste Autobahn is de Autobahn 27 (Afsnidd Bremen–Wasra). De Opfohrten 24 Achem-Oost un 24b Langwedel doot all beid so negen Kilometer wied weg liggen.

De nächste Bahnhoff is so bi veer Kilometer wied weg in’n Noordoosten de Bahnhoff Ädelsen an de Bahnlien Wunsdörp–Bremen.