Film De Tweeling

Titel: Die Zwillinge) is de Titel vun en nedderlännsch Speelfilm un de Verfilmen vun den Roman mit den lieken Naam vun Tessa de Loo. Dorin geiht dat üm twee Froen, Tweeschen, de as Kinner uteneen brocht warrt, de sik in en belgschen Kuroort wedderdrapen doot un sik to’n drütten un letzten mol mit jemehr Vergangenheit uteneen sett. De Hööftrullen weern mit Nadja Uhl un Thekla Reuten besett. In Düütschland keem de Film an’n 7. Oktober 2004 in de Kinos.

Kort nadem jemehr Vadder dood blifft, warrt de jungen Tweeschen Lotte un Anna op greesige Oort vunenanner trennt. Lotte, de de Tuberkoloos hett, kummt na Verwandte in de Nedderlannen, wo se ünner gote Ümstännen un best ümsorgt opwassen deit. Anna, de gesund is, warrt vun de düütschen Verwandten ut Bamberg mitnahmen, wo se sik op jemehrn Buernhoff Dag un Nach schinnen mutt. Un na School dröff so ok nich, wiel se sonst nich noog arbeiden deit. As Anna een Dag mit en jungen SA-Mann anbannelt, krigg se vun ehrn Onkel Heinrich, de wat gegen Nazis hett, en greesig Dracht Slääg un warrt dorbi meist doodslahn. Se warrt dorophen wegbrocht un versöcht sik na en Utbilln as Deenstmagd dörtoslahn. So kummt se op den Gootshoff vun de natschonalsozialistische Graafsche Charlotte vun Falkenau, de Anna goot behanneln deit.

In de Twüschentiet findt Lotte rut, dat all de Breven, de se in de vergangen Johren an ehr Süster schreven hett gor nich afschickt worrn sünd. Se is mit een jüdschen Musiker verlövt. Se finnt rut, woneem in Düütschland ehr Süster nu leeft un besöcht ehr. Wieldat de Situatschoon in Düütschland dör den Tweeten Weltkrieg aver jümmers sworer un unsekerer warrt blifft de beiden nich veel Tiet för dat Drapen. Bi’n Afscheed maakt Anna, ahn sik dorbi groot wat to denken, en antisemitisch Anmarken Lotte gegenöver, wiel se dat in Düütschland dör de Nazis eenfach so wennt is. Lotte brickt dorophen den Kontakt to Anna för en ganze Tiet af.

Denn kummt de Krieg ok na de Nedderlannen. Lottes Verlöften David warrt 1942 op’n Slag as Jud fastsett un na Buchenwald versleept un later na Ausschwitz, wo he ümbrocht warrt. Lotte dröpt dat hart, se lohnt nu allens af, wat mit Düütschland to doon hett, un will nich mol mehr Düütsch snacken. In de Twüschentiet hett sik Anna mit en SS-Mann Martin verheiraad un leeft bi sien Öllern in Wien. Se kriggt em aver kuum mol to sehn, wiel he in’n Krieg mit ran mutt. He överleeft de Oostfront, aver kort vör Kriegsend fallt he bi en Fechten mit de Amerikaner.

Anna un Lotte draapt sik erst 1947 wedder, as Anna versöcht, ehr Süster in Holland to finnen. Lotte is in de Twüschentiet mit Bram verheiraad, den Broder vun David, de ut dat Konzentratschoonslager nich mehr torüch kamen is. Se hett mit Bram en Dochter. Dat bruukt en ganze Tiet, bit sik Lotte wedder op ehr Süster inlaten deit. As se denn aver in Annas Koffer dör en Tofall dat Hochtietsbild vun Anna und Martin in sien SS-Uniform sütt, warrt se vun de Raasch grepen un se sütt root. Se smitt ehr Süster ut’t Huus in den Gloven, dat se ok en Nazi weer un an’n End gor mit de Möörders vun ehrn Verlöften David gemeen Saak maakt harr. Se seht sik för mehrere teihn Johren nich wedder.

• Lexikon vun’n internatschonalen Film: Trotz Redundanzen und Längen ein bewegendes Drama, getragen von der eindrucksvollen Kameraarbeit und hervorragenden Hauptdarstellerinnen.

• Gong: Ein großartiges Werk mit subtiler Dramaturgie, treffenden Dialogen, feiner Kamera und glänzenden Darstellern.

De Film hett internatschonal grote Achten funnen, wat sik ok in eenige Utteken un Nomineeren kennteken deit. So weer „De Tweeling“ 2004 för den Oscar in de Kategorie Best frömdsprakig Film nomineert un för ölven wietere Priesen. Uttekend worrn is de Film opletzt mit fief Priesen:

• 2002 mit den nedderlannschen Golden Film
• 2003 mit den nedderlännschen Platin Film
• 2003 mit de Sülvern Pogg vun dat poolsch Camerimage-Festival för Piotr Kukla
• 2004 mit den Emden Filmpries (2. Platz) för Ben Sombogaart
• 2004 mit dat Goldene Kalf vun’t Nedderlännsch Filmfestival för Hanneke Niens un Anton Smit in de Kategorie Best lange Speelfilm

• De Tweeling in de Internet Movie Database (engelsch)
• Offiziell Websteed vun’n Film op hoochdüütsch