Kopzeerte

WIKIPEDIA kan der nit vöär instån dat de inhold van artikels kloppet. As jy wat mankeret, kün jy et beste eaven by een dokter angån.

Iederene hef wel es last van kopzeerte, mer as t langer duurt kan t oek n symptoom ween veur meer of minder arnstige ziektes. As n kopzeerte niet deur aandere dingen kan koemen, mut der medies onderzeuk edaon wörden. In Nederlaand is t volksziekte nummer ene.

Kopzeerte zit niet in de harsens. De zeningen rond de harsens wörden bie n kopzeerte te veule eprikkeld. Soms verwiejen de bloedvatten in t harsenvlieze zich. Oek kunnen de zeninguuteinden verschillende stofjes aofgeven, die n steriele ontstekingsreaksie op gang brengen. Dit is n ontsteking zonder bakteriën of virussen. Dit leit tot t ophopen van vocht en nog meer uutscheiding van disse stofjes, die de kopzeerte argerder maken.

• De meeste soorten kopzeerte vallen onder 'spanningskopzeerte', waorvan de oorzaak niet goed begrepen wördt. Der is gien dujelike lichamelike oorzaak.

Kopzeerte kan daornaost veroorzaakt wörden deur:

• Ziekte - zo as griep, migraine en bieholteontsteking, hoge bloeddrok, vergiftiging
• oogklachten
• Ingespannen kieken bie min locht
• Langdurige inspanningen
• Niet genog slaap
• Trauma an de kop
• Alkoholmisbruuk, de zogenaamde 'kater'
• Botse temperatuurdaoling (ieskopzeerte)

Kopzeerte as symptoom kan verhölpen wörden deur:

• Genog te slapen
• Genog te eten en drinken
• Genog lichaamsbewegige en frisse lucht
• Niet te veule alkohol en kofjes drinken

Medisienen

Der bin n antal medisienen um kopzeerte tegen te gaon. De bekendste bin:

• Parasetamol
• Aspirine

Bie t gebruuk van medisienen tegen kopzeerte mu'j je waoren veur medisienaofhankelike kopzeerte. Bie disse vorm van kopzeerte is der n verslaving op-etrejen of bi'j gewoon ewend eraakt an t medisien. Hierdeur vermindert t medisien de kopzeerte niet meer, mer wördt de kopzeerte argerder as t medisien niet in-eneumen wördt. t Ontwennen van medisienaofhankelike kopzeerte kan n langdurig en pienlik proses ween. In tegenstelling tot wat veule luui denken, kan t oek veurkoemen a'j n lange tied of te veule parasetamol of aspirine innemen.

• a'j boven de vuuftig jaor bin en veur t eerst kopzeerte kriegen
• n eerste migraineanval boven t veertigste jaor
• kopzeerte bie pasiënten jonger as 6 jaor
• ouwer volk mit plaotselike oppervlakkige kopzeerte an de slapen
• zwangeren mit n veur hulen onbekende kopzeerte
• meer last van kopzeerte nao n ongeval
• hevige kopzeerte bie iezelig hoge bloeddrok
• bots naore kopzeerte kriegen
• kopzeerte mit koortse en der minder mit de kop bie ween
• kopzeerte en zeerte in de nekke bie t bugen van de kop
• kopzeerte mit funksiestoornissen van zeningstelsel (kracht in de narms en benen, sprake en der minder mit de kop bie ween)
• smarnens spiejen, spiejen niet samenhangend mit kopzeerte
• kopzeerte mit veraandering van de persoonlikheid
• kopzeerte mit achteruutgang van prestasie op schoele
• migraine mit aura* de heeltied an de zelfde kaante

Bie disse gevallen wördt der an-eraojen naor n dokter te gaon.

[disse mal bewarken]

Dit artikel is eskreaven in et westveluwske dialekt van Nunspeet, in de Algemene Nedersaksiese Schriefwieze.