Totonno 'E Quagliarella

• Parole 'e: Giovanni Capurro
• Museca 'e: Francesco Buongiovanni
• Anne 'e nascita:

Facite comm'a me, senza timore:
cufféjo pure 'a morte e 'a piglio a risa...
Io só' cuntento meglio 'e nu signore
pecché tengo una faccia e una cammisa...

E quanno metto 'a lengua 'into ppulito,
che ne facite 'a lengua 'e nu paglietta!?
Embé, quanto stimate 'a palla 'e vrito,
chi vò' stá buono, ha da sapé 'a ricetta!

Si ll'ommo tutte cchiacchiere
vulesse sentí dicere,
quanta fasule e cícere
se mettarría a scartá!

E si tenite 'a freve,
lassáte stá 'o cchinino...
Addó' sta 'o mmeglio vino,
'o gghiate a pigliá llá!

Ce steva nu scarparo puveriello,
chiagneva sempe ca purtava 'a croce...
'A sciorte lle scassaje 'o bancariello
e pe' se lamentá...perdette 'a voce!

Quann' è 'a staggione, vaco ascianno sulo
na bona fritta 'e puparuole forte...
Nu piezze pane, 'nziem'a nu cetrulo,
e 'o riesto, 'o vvotto dinta capa 'e morte!

Che tengo 'e figlie o aggia penzá ô pesone?
I' faccio ogne arte e ghièsco pa campata!
Si è pa lucanna, sott'a nu bancone,
se dorme frisco e puó' passá 'a nuttata...

Riguardo ô ttaffiatorio,
mma scorcio bona 'a máneca
e addó' se vénne 'agliáneca,
truvate sempe a me!

Menammo tutto a buordo
fintanto ca se campa:
Dimane, forze, 'a lampa
se putarría stutá...

Che brutta cosa ch'è a tirá 'a carretta
quanno nisciuna mano vótta 'a rota!
Nun sèntere cunziglie, nun dá retta,
ca senza ll'uoglio chella nun avota!

Pe' spartere aggio avuto quacche botta
ma nun mme sóngo miso maje paura!
na vota, 'int'a n'incendio a Foregrotta,
salvaje, 'a dinto ffuoco, na criatura...

Quann'i' só' muorto, ll'hanna aizá 'sta crapa!
Nisciuno chiagne, manco po mumento...
Ll'esequie è bello e pronto: 'ncapa e 'ncapa
e vaco â sala e Ricanuscimento!

Quann'è fernuta ll'opera,
pezzente o miliunario,
s'ha da calá 'o sipario
e s'ha da arricettá...

Pe' chesto, 'o servo vuosto
Tatonno 'e Quagliarella,
'o ccisto 'inta garsèlla,
nun so ffa maje mancá...

E quanno 'o libbro mio sarrá fernuto,
nisciuno diciarrá si è bello o brutto...
Ma, primma 'e ve dá ll'urdemo saluto,
ne voglio n'atu litro...'e chell'asciutto!

• Dialettando - Totonno 'e quagliarella