Giuseppe Impastato, ditto Peppino (Cinisi, 5 'e jennaro 1948 - Cinisi, 9 'e majo 1978), fuje nu giurnalista, attivista e pueta siciliano.
Nascette 'a na famiglia 'e mafiuse ('o pate Luigi fuje mannato ô cunfino all'ebbreca 'e Musullino, 'o zio e ati pariente pure erano mafiuse e 'o cainato d'o pate era 'o boss d'a mafia Cesare Manzella, acciso cu na' giulietta 'mbuttunata 'e tritolo 'o 1963).
Quanno era guaglione se scuntraje ch'o pate ca 'o cacciaje 'e casa, e accussì accummenciaje n’attività politico-culturale contro 'a mafia. 'O 1965 facette 'o giornale L’Idea socialista e trasette int'o PSIUP e accummenciàje a fa parte, comm'a diriggente, all'attività d'e gruppe 'e Nuova Sinistra.
S'aunette ê lotte d'e zappature ca êvano avuto 'e tterre cunfiscate p'a costruzione d'a terza pista ell’aeroporto 'e Paliermo. 'O 1975 mettette assieme 'o gruppo Musica e Cultura, ca faceva cineforum, musica, triato, discussione, ecc.; 'o 1976 arapette Radio Aut, na radio libera a spese soje, addò accummenciaje a sbrevugna' 'e malefatte e 'e malaffare d'e mafiuse 'e Cinisi e Terrasini, primma 'e tutte d'o capomafia Gaetano Badalamenti, ca era nu capintesta d'o traffico internazionale 'e droga, pecché cummannava pure int'all'aeroporto. 'A trasmissiona ca avette cchiù pubblico fuje Onda pazza, addò se sfuttevano mafiuse e gente 'e guverno. 'O 1978 se appresentaje all'elezione int'a lista 'e Democrazia Proletaria p'o Comune.
Murette acciso int'a nottata 'ntra l’8 e 'o 9 'e majo d'o 1978, int'a campagna elettorale, cu na carica 'e tritolo piazzata sotto a isso n'copp e binarie d'o treno. 'A ggente 'e Cinisi 'o votajeno e fuje eletto ô Cunziglio comunale.
'E giurnaliste, 'e gguardie e 'e giudice dicetteno ca era stato 'n "atto terroristico" addo' isso fuje l’attentatore ca era rummaso acciso cu 'e manne soje; po' se truvaje pure na lettera 'e tanto tiempo primma addo' se puteva pensa' ca se vuleva accidere. 'Ell'assassinio o, comme se vulette fa credere, l'incidente, nun se ne parlaje assaje pure pecché int'a chilli juorne fuje acciso pure Aldo Moro.
L'anno appriesso a morte 'e Peppino fuje organizzata d'o Centro siciliano di documentazione cu Democrazia Proletaria, 'a primma manifestazione taliana contr'a mafia.
This article uses material from the Wikipedia Nnapulitano article Giuseppe Impastato, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Cuntenute suggiette a licienza 'e auso CC BY-SA 4.0 se nun fuje ritto atro. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Nnapulitano (DUHOCTRUNGQUOC.VN) is an independent company and has no affiliation with Wiki Foundation.