باو اتا ساسانی شازده بییه که تبرستون دله باوندیون سلسله ره بساته.
باوندی اسپهبد باو | |
---|---|
عنوان: | باو |
حکومت زمون: | ۶۶۵ تا ۶۸۰ میلادی |
۱۵ سال | |
چلّهی ِنوم: | کاووسیون |
پییر نوم: | فیروز |
معروف ِکَس و خِشون: | کیوس |
بمردِن ِگادِر: | ۶۸۰ (میلادی) |
قبلی: | - |
بعدی: | سرخاب اول |
وه فیروز وَچه و کیوس ِوچهزا بییه. کیوس هم شیروون بِرار هسته.
وه شه جوونی دوره دله ایران و روم جنگ دله شرکت هکرده که اونجه خوسرو پرویز ونه زیلی ره وینه و وره آذربایجان حاکم کنه. وه بعد ایکه خوسروپرویز شیرویه شه ریکا دس جا بکوشت بونه شیرویه دس جا اینتا وسر که خوسروپرویز ره وفادار بیه زندونی بونه. بعد ایکه آذرمیدوخت خوسروپرویز کیجا شه برار ره کشنه و ئیران شابانو بونه دستور دنه تا اونایی ره که ونه برار زندونی هکرده ره آزات هکنن و باو زندون جا در انه و شابانو وره ئیران ارتش فرموندهی مقام ره پیشنهاد کنه ولی وه اینتا وسر که آذرمیدوخت اتا زنا بیه قبول نکنه و شیراز دله اتا تشکده دله گوشه گیر بونه. بعد ایکه یزدگرد سووم ایران شا بونه ونه جا خوانه که وره کومک هکنه و وه هم قبول کنه ئو ونه پلی شونه.
عربون حمله موقع وه یزدگرد جا اجازه گیرنه و انه مازرون دله تا کوسان تشکده ره که ونه جد وره درست هکرده ره زیارت هکنه. وه قرار بیه که گورگان دله یزدگرد ره بوینه ولی مازرون دله ونه بکوشتن خور ره اشنونه. همینتا وسر باو که نارحت بونه شه سر ره تاشهنه ئو کوسان دله ای گوشه گیری کنه.۲۴ سال که گذرنه تورکون مازرون ره حمله کننه و اینجه ره خراب کننه. مازرون مردم هم که شه وسر اتا شا دمبال دینه باو جا خوانه تا وشون شائی ره قبول هکنه باو هم وشون جا وفاداری سوگند گیرنه و تورکون جا جنگ کنه ئو وشون ره شکست دنه تا وشون ره مازرون جا درکنه.
وه باوندیون سلسله ره درست کنه و ۱۵ سال حوکومت کنه .ونه آخرای حوکومت دله ولاش که گته مازرون حوکومت ونه شهنه شورش هکرده و باو ره جنگ دله اتا تیکه کلوخ جه بکوشته.
This article uses material from the Wikipedia مَزِروني article باو, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). محتوا جه تحت CC BY-SA 4.0 دسترسی دارنی، مگر اینکه ونه خلاف ثابت بَواشه. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki مَزِروني (DUHOCTRUNGQUOC.VN) is an independent company and has no affiliation with Wiki Foundation.