ကျောက်စိမ်းစေတီတော်

ကျောက်စိမ်းစေတီတော်သည် မြန်မာနိုင်ငံ၊မန္တလေးတိုင်းဒေသကြီး၊ အမရပူရမြို့နယ်၊ ဆင်နွယ်ကျေးရွာ အုပ်စု ကွင်းအမှတ်(၆၂၈)၊ ရန်ကုန်-မန္တလေး အမြန်လမ်းမကြီး၏ မိုင်တိုင် (၃၆၁) အနောက်ဘက် ပေ (၆၀၀)ခန့်နှင့် စစ်ကိုင်း-မြစ်ငယ်ကားလမ်း၏ မိုင်တိုင် (၄/၇) တောင်ဘက် ပေ(၁၀၀၀)ခန့်အကွာတွင် တည်ရှိသည်။ ရန်ကုန်-မန္တလေး အမြန်လမ်းမကြီး၏ အထက် ၉'မြင့်ပြီး ၅-ဧက အကျယ်အဝန်းရှိ ကုန်းမြေပေါ်တွင် တည်ထားခြင်း ဖြစ်သည်။

စေတီတော်၏ အလှူရှင် မိသားစုမှာ သီဟသုဓမ္မမဏိဇောတဓရ ဦးစိုးနိုင်၊ ဒေါ်အေးအေးခိုင် (အေးအေးခိုင် ကျောက်မျက်ကုမ္ပဏီ) မိသားစု ဖြစ်သည်။ စေတီတော်သာမက ဘုရားဝတ္တကမြေ အလှူရှင်လည်း ဖြစ်သည်။ စေတီတော်ကြီး တည်ထားပူဇော်နိုင်ရန် ၂၅-နှစ်ကျော် ကာလတိုင်အောင် ကျောက်စိမ်းများကို စုဆောင်းခဲ့ရသည်။ ဘုရားဒါယကာ ဦးစိုးနိုင်သည် ကျောက်စိမ်းဒီဇိုင်းများနှင့် ပန်းပုပုံများ ထုဆစ်ရာတွင် ကိုယ်တိုင်စီမံခန့်ခွဲ၍ မြန်မာမှု ပညာရှင်များက တာဝန်ယူ ထုလုပ်ပူဇော်ခဲ့ကြသည်။

စေတီတော်မြတ်ကြီး၏ အတိုင်းအတာ ပမာဏမှာ ထီးတော်မပါ ဉာဏ်တော်အမြင့် ၇၅'၆"၊ လုံးပတ်တော် ၁၇၆'၊ ပန်းတင်ခုံအလျား ၅၂'၆"၊ အနံ ၅၂'၆"၊ အမြင့် ၁၂'၊ ငှက်ပျောဖူးအမြင့် ၈'၆"၊ ထီးတော်အမြင့် ၇' အသီးသီးရှိသည်။ ပန်းတင်ခုံအတွင်း၌ မုခ်ဦးလေးခုရှိပြီး ကျောက်စိမ်းရုပ်ပွားတော်များ ပူဇော်ထားရှိသည်။ အရှေ့အနောက် ပူဇော်ထားရှိသော ကျောက်စိမ်းရုပ်ပွားတော်မှာ ဉာဏ်တော် ၃၁"စီ ရှိသည်။ တောင်ဘက်မုခ်ဦးရှိ ရုပ်ပွားတော်မှာ ဉာဏ်တော် ၄၉"နှင့် မြောက်ဘက်မုခ်ဦးရှိ ရုပ်ပွားတော်မှာ ဉာဏ်တော် ၅၀"ခွဲ ရှိသည်။

၂၀၁၂-ခု၊ ဒီဇင်ဘာလ၊ ၂၁-ရက်နေ့တွင် မြေသန့်မဟာ မင်္ဂလာ ကျင်းပပြီး အဆင့်ဆင့် ဆောင်ရွက်ခဲ့ရာ ၂၀၁၅-ခုနှစ်၊ ဇွန်လ၊ ၅-ရက်နေ့တွင် ထီးတော်တင် မင်္ဂလာကို အောင်မြင်စွာ ကျင်းပပြီးစီးခဲ့သည်။ စေတီတော်ကြီးတည်ထားသောအခါ အရည်အသွေး စံချိန်မီ ကျောက်စိမ်း တန်ချိန် တစ်ထောင်ကျော်ကို အသုံးပြုခဲ့သည်။