Un Troll , an calon de la anterneta, ye ua pessona cun un cumportamiento que ten siempre l oujetibo de dar cuonta dua çcusson, porbocar i anrabiar las pessonas ambolbidas neilha.
La palabra apareciu na Usenet, deribada de la spresson trolling for suckers (botando l isco pa ls trouxas), eidenteficado i atrebuído al(s) causador(es) de las sistemáticas flamewars.
L cumportamiento de l troll puode ser ancarado cumo un teste de rutura de la eitiqueta, ua mais-balie de las sociadades ceblizadas. Delantre las porbocaçones ansistentes, las bítimas puoden (ó nó) perder la cunduta ceblizada i ambolber-se an agressones pessonales.
Hai de todo l tipo, zde l mais eignorante i rudo que chama denomes i proboca flods, até l mais sabido anteletualmente que çcursa cul oujetibo de le dar cabo de la cabeça al anterlocutor i lhebá-lo a la rábia para depuis l çqualeficar, dando cuonta de ls sous argumientos i mexendo cula sue reputaçon nun fórun. Pa l troll, la reaçon a un comentairo polémico ye cunsidrado un adbertimiento, un modo de sacar prazer cula eirritaçon de las pessonas i ouserbar l sou zeiquilíbrio eimocional i mental.
Hai bárias eideias zambolbidas por trolls para atuar nun fórun de Anterneta, antre eilhas:
L que motiba un troll a cumportar-se assi ye: outo-afirmaçon, eideologie, fanatismo, çacanaige ó solo passatiempo. An anterbistas na Usenet, trolls afamados cunfessórun que solo andában a saber dun cachico d'atençon i a matar l fastiu de l die a die. L mais deilhes tamien tenie algua caratelística mal-resolbida de personalidade, cumo trauma, fracasso financeiro i amoroso i até malinas psiquiátricas.
Alguns trolls que gústan dun cierto assunto atúan an grupo, que muita beç son numarosos. Andrento esse grupo uns ténen un papel na argumentaçon, outros na redicularizaçon i outros solo na cuncordáncia, metendo miedo al adbersairo eimocionalmente i quaije siempre l lhebando a salir de la çcusson. Ye mui defícele cumbater trolls an grupo, fazendo falta un Moderador pa ls botar pa la rue an causo de persisténcia.
An ciertos fóruns esses fulanos puoden ser acaçados por ua sola pessona, respundendo por bárias pessonas birtuales defrentes para ambadir la sue própia oupenion. Esse recurso ye coincido cumo clone i la sue eificácia depende de l'eifeciéncia de l Moderador dun fórun que puode facelmente eidentificar clones por númaros IP.
Hai causos dun moderador se ajuntar a un grupo de trolls i atraíren bítimas a apresentar la sue oupenion i çcordáncia quanto als temas an çcuçon, mas lhougo a seguir son massacrados por todos. Esso trai l sentimiento de sastifaçon a todos ls que fázen parte de quemunidade. Todo esto ye hai mui pouco tiempo ouserbado an blogues i quemunidades sociales, adonde ls moderadores/outores atuan por meio de l'antoleráncia, percunceito i porbocaçon (çfraçados d'oupenion) i juntos fórman ua cadena de auto-afirmaçon.
Para cumbater trolls cumo debe de ser, pa ls que úsan i ándan por quemunidades solo hai ua grande regra que resulta: Nun alimente ls trolls. (de l anglés Don't feed the trolls). Quier dezir eignorar cumpletamente alguien que se cumporta cumo troll mesmo que la gana de respunder seia grande. Un troll nun ten nada a perder, el siempre bai a tornar i a anquemodar - el percisa d'atençon para sacar prazer i ser bien sucedido. Eignorando un troll ls outerizadores nun solo le méten miedo al que faç cumo tamien le porbócan un zgusto mui grande i frustraçon. Esso nin siempre ye fácele i a las bezes eisige muito sfuorço de la quemunidade por muitos meses mas l metodo dá resultado. Se abselutamente naide le dá atençon al troll, el ziste d'atuar por zgusto de nun cunseguir repuosta a las sues porbocaçones.
Ne l causo de blogues i quemunidades de trolls, solo eignorar i eibitar la frequéncia al lhocal. Por mais que séian rebolbantes an cuntenido, la perséncia solo de trolls uns cuncordando cun outros pon an xeque la credeblidade de l blogue/quemunidade i este deixa de ser lhebado a sério. Nas redes sociales cumben tamien denunciar la quemunidade a l'eiquipa de l sítio.
Pa ls moderadores de quemunidades hai modos de eibitar que un troll faga stragos, i las recomendaçones son las seguintes:
Hai muitos temas que son campo d'atuaçon de trolls. Al ampeço de l fenómeno na Usenet éran ouserbados ambates d'oupenion subre tecnologie: cumputadores, sistemas ouperatibos i ampresas de tecnologie i até hoije esse ye un grande motibador pa ls nerds i geeks que hai an quemunidades. La palabra naciu nesse meio i inda ye ende que ye mais coincida i spalhada.
An fóruns mais generalistas, la çcusson política i de temas polémicos ye mui grande, ambolbendo un grande númaro de pessonas i oupeniones. Atualmente l fenómeno puode ser bido an redes sociales de quemunidades de l Neoliberalismo i Marxismo. Hai tamien trolls que se únen an eideologies cundanables i creminales, cumo apoio al nazismo, racismo, houmofobie, abuso sexual de menores i difamaçon a la mulhier.
Hai tamien an menos quantidade mobimientos trolls de relegion, medecina, cinema i música (mais, an special, l Rock).
A la par de l'eibeluçon de las técnicas de trolling, tamien las contra-medidas eibeluírun.
This article uses material from the Wikipedia Mirandés article Troll (anternete), which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Cuntenido çponibelizado ne ls termos de la CC BY-SA 4.0, salbo andicaçon an cuntrairo. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Mirandés (DUHOCTRUNGQUOC.VN) is an independent company and has no affiliation with Wiki Foundation.