Puonte

Las puontes son custruídas para permitiren la passaige subre l'oustaclo a traspor, de pessonas, outomobles, camboios, ancanhamientos ó cundutas d'auga (alcadutes).

Quando ye custruída subre un curso d'auga, l sou tabuleiro ye frequentemente situado la altura calculada de forma a possibelitar la passaige de ambarcaçones cun sigurança sob la sue strutura. Quando custruída subre un meio seco questuma-se chamar las puontes de biadutos, cumo ua forma d'apelidar puontes an meios ourbanos. De l cuntrairo nun puode ser ousado, yá qu'un biaduto ye ua puonte que bisa nun anterromper l fluxo rodobiairo ó ferrobiairo, mantendo la cuntenidade de la bie de quemunicaçon quando esta se depara i ténen que traspor un oustaclo natural custituído por depresson de l terreno (stradas, rues, acidentes geográficos, etc.), cruzamientos i outros sin qu'este seia oustruído.

Biadutos son mui quemuns an grandes metrópoles, adonde l'antenso tráfego de beiclos normalmente de grandes abenidas ó bias spressas nun puoden ser lhigeiramente anterrompidos. Para alhá de cidades que possuen muitos acidentes geográficos, adonde l biaduto sirbe para lhigar dous puntos mais altos dua detreminada region i relebo.

La palabra Puonte probén de l Lhatin Pones que por sue beç çcende de l Etrusco Pont,  que senefica "strada". An griego πόντος (Póntos), deribe talbeç de la raiç Pent que senefica ua açon de caminar.