သဓီု ဒပ်ဒစဵုဒၞာညးဍုင်ကွာန်

တင်အဓိက ပရေင်ချဳဓရာင် ဒပ်လွပ်လွဟ်ဝွံဂှ် သွက်ဂွံပလီု ပရေင်ပကင်ရင် အလဵုအသဳပၞာန်တုဲ အရာမဆေင်ကဵုကမၠောန်သၟိင်တၠ ဗီုကဵုဘာဗတောန်လိက်၊ ရုင်အုပ်ဓုပ်ဍုင်ကွာန်၊ ရုင်မဗလးကဵုပၟတ်လလဳတအ် သီုဖအိုတ်ဂှ် စွံလဝ် ပွန် သွက်ဂွံပလီုဖအိုတ်ရ။ ဟိုတ်ဂှ်ရ ပ္ဍဲကဵု ဂိတုမာတ် ၁၄၊ ၂၀၂၂ ဂှ် နကဵု ဂကောံဏအ် လလောင်တြးလဝ် နကဵုညးဍုင်ကွာန်တအ် ညံင်ဂွံမံင်ကဵု သတိ၊ ဒၞာဲမၞိဟ်ကောံဂှ် လ္ပအာ၊ တုဲပၠန် ရုင်သၟိင်ဂမၠိုင် ဗီုကဵု ရုင်အုပ်ဓုပ်ကွာန်၊ ဗဒါဲသၞေဟ်က္ၜင်ကျာ၊ ဗဒါဲၝောအ်ခန်ဍုင်၊ ဗဒါဲရုင်စၟတ်သမ္တီမၞိဟ် (လဝက)၊ ဗဒါဲရုင်ဓါတ်လလဳ၊ ဗဒါဲသ္ၚိ ကောန်ကမၠောန်သၟိင်ဂမၠိုင်တအ်ဂှ် ဝေင်ပါဲ မံင်သ္ၚောဲသ္ၚောဲ၊ ကောန်ဇာတ်ဇကုလေဝ် လ္ပကဵုဝေင်မ္ၚးသ္ၚိ ကဵုမံင် အပ္ဍဲသ္ၚိ မြဴသာ်ဝွံ ကဵုလဝ် ဓဝ်သတိ ပ္ဍဲမုက်လိက်ဝှုက်ၜံက် ညးတအ်ရ။

နကဵု ဒပ်ပဳဒဳအေပ်-သဓီုဂှ် လလောင်တြး ဒဒှ်ရ ပ္ဍဲဂိတုမာတ် ၂၀၊ ၂၀၂၂ ဂှ် ပန်ဂစိုတ်ထောအ် မၞိဟ်နူကဵုဌာနာပလိုတ်ပၟတ် (မီးသတ်ဌာန) ၄ တၠ။

ပ္ဍဲ ဂိတုမာတ် ၂၂၊ ၂၀၂၂ အခိင်ဗတံ ၉း၄၀ ဂှ် နကဵု ကောန်ဒပ်ဏအ် အာပန်သ္ၚိ ဦးကျော်မြင့် ပ္ဍဲဝင်စိင် ကွာန်တၟိ၊ ပွိုင်ဍုင်သဓီု ညးမဒှ်ကောန်ကမၠောန် ရုင်ဓါတ်လလဳ ဟိုတ်နူကဵု ဗက်သြန်ခရိတ်ပၟတ်လလဳ နူကဵု ရဲမကေတ်လဝ်ပၟတ်တအ်။

ပ္ဍဲ ဂိတုမာတ် ၂၉၊ ၂၀၂၂ အခိင်လဒေါဝ်တ္ၚဲ ၁၁း၀၀ ဂှ် နကဵု ရဲဒပ်ဏအ် ဒှ်ပန် ကုပၞာန်အလဵုအသဳတုဲ ပ္ဍဲၜဳလေင် (ဘီးလင်းရွှေရောင်ပြ) ပ္ဍဲပေါဲဗတိုက်ဂှ် ကောန်င္ၚာ် မောင်ကြယ်စင်မင်း အာယုက် ၆ သၞာံ၊ ကဵု မောင်ညီညီဇော် အာယုက် ၉ သၞာံ နူကဵု ကွာန်မြေနီကုန်း ၂ တၠဒးသေနာတ်တုဲ ဒးချိုတ်အာရ။

ပ္ဍဲဂိတုမေ ၁၀၊ ၂၀၂၂ အခိင်သဝ်တ္ၚဲ ၅ နာဍဳဂှ် နကဵု ရဲဒပ်ဏအ် ပန်ဂစိုတ်ထောအ် ကောန်ကွာန်သဗ္ဗာန်၊ မနွံယၟု သားငယ် ပ္ဍဲကွာန်ဓနုညာဓဝယ်။ အတိုင်ညးတအ် လလောင်တြးလဝ်မ္ဂး သားငယ်ဂှ် ဒှ်မၞိဟ်မကဵုပရိုင် ကုအလဵုအသဳပၞာန်မွဲတၠရ။

နကဵု ရဲဒပ်ဏအ် ပ္ဍဲကဵု ဂိတုမေ ၂၉၊ ၂၀၂၂ ဂှ် လလောင်တြးလဝ် ဘပဠလဝ် အစာဘာဂမၠိုင် ဒဒှ်ရ အစာဘာတအ်ဂှ် ဒှ်မၞိဟ် မပၠုပ်ဗီု ညံင်ကောန်င္ၚာ်တအ် ဂွံလုပ်ဇာတ်ဍိက်ပၞာန်တုဲ နကဵု ဒပ်ညးတအ် သ္ဒးကေတ်ဒုဟ် ဗွဲမထေက်ကြိုက်ရောင်။

ဂိတုဂျောန် ၁၀၊ ၂၀၂၂ ဂှ် နကဵု ယၟုစဳရေင်ပၞာန် နန်းထိုက်အောင်တုဲ နကဵု ဒပ်ဏအ် ခတိုဟ်ပလီုထောအ် ကိရိယာထိင်စၠောအ်ပၟတ်လလဳ (Transformer) ပ္ဍဲကွာန်ဂေါအ် (ဂေါ့ကျေးရွာ)ရ။ ဂိတုဂျောန် ၁၃၊ ၂၀၂၂ ဂှ်လေဝ် ခတိုဟ်ပလီုထောအ် ကိရိယာထိင်စၠောအ်ပၟတ်လလဳ (Transformer) ပ္ဍဲကွာန် အောင်းစိုင် တောင်စွန်း ကီုရ။

ပ္ဍဲဂိတုဂျူလာင် ၁၅၊ ၂၀၂၂ ဂှ် နကဵု ဒပ်ဏအ် ပန်ဂစိုတ်ထောအ် ဦးလှတင် ညးဇၞော်ကွာန်ဂေါအ် (ဂေါ့ကျေးရွာအုပ်ချုပ်ရေးမှူး)

ပ္ဍဲ ဂိတုသေပ်တေမ္ဗာ ၅၊ ၂၀၂၂ ဂှ် နကဵု ဒပ်ဏအ် ခဍိုန်ပန်ဏာ နကဵု အမၠံက် ၄၀မမ ဒၞာဲဂိတ်ကင် အလဵုအသဳပၞာန်၊ ဆဂး လပါ်ပၞာန်ဍုင်ကွာန် ညးဍုင်ကွာန်ကီု မွဲဟွံဒး။

ပ္ဍဲဂိတုသေပ်တေမ္ဗာ ၉၊ ၂၀၂၂ ဂှ် နကဵု ရဲဒပ်အာ အာကၠဟ်စုတ် ဗုမ်တဲၜါမ ပ္ဍဲရုင်ပၟတ်လလဳ ပွိုင်ဍုင်သဓီု (သထုံမြို့နယ် မီတာရုံး) ကောန်ရုင်ၜါ ဒးအာဝပ်ညိည။

ပ္ဍဲဂိတုသေပ်တေမ္ဗာ ၂၉၊ဖ ၂၀၂၂ အခိင်နူဂယး ၇း၄၀ ဂှ် ဦးဖိုးထောင် (ခ) စိုးဝင်းဂှ် အဃောမဂဇအ်ဒၟံင် ပ္ဍဲဆေင်ဍာ်လက်ဖက်ဂှ် နကဵုရဲဒပ်ဏအ် ပန်ဂစိုတ်ထောအ်ရ။ နကဵု ရဲဒပ်ဟီု ဦးဖိုးထောင်ဂှ် ဒှ်ရဲဂကောံပျူစောထီး မဒှ်ဂကောံသၟဝ်အလဵုအသဳပၞာန်ရ။

ပ္ဍဲဂိတုအံက်တဝ်ဗါ ၂၅၊ ၂၀၂၂ ဂှ် ရဲဒပ်ဏအ် ပန်ဂစိုတ်ထောအ် ဗၠာဲသၟိင်မွဲ မနွံယၟု အောင်ဝင်းထွန်း ပ္ဍဲဆေင်ဗဳယာ။

ပ္ဍဲဂိတုဇာန္နဝါရဳ ၁၃၊ ၂၀၂၃ အခိင်သဝ်တ္ၚဲ ၀၃း၄၀ ဂှ် ရဲဒပ်အာ အာပန်ဂစိုတ်ထောအ် ညးဇၞော်ကွာန် တောင်စွန်း၊ ဦးစိုးသိန်း ကဵု စာရေၝောအ်မွဲရ။ နကဵု ရဲဒပ်ဏအ် ဟီုကဵု ပရိုင် RFA ဂှ် ဒဒှ်ရ ညးၜါဝွံ ကေတ်ဒၟံင်စရင်မၞိဟ် သွက်သဘင်မာဲ။ နကဵု ဒပ်ညးတအ် ဒစဵုဒစး သဘင်မာဲအလဵုအသဳမသကၠောန်ဂတဂှ်တုဲ အရာမဆေင်ကဵု ကမၠောန်မာဲဏအ် အလုံအိုတ်သီုဂှ် သပလီုဖအိုတ်ရောင်ရ။