ကျာ်ဒဵုမာံပလအ်
နွံပယျာံမွဲတ္ၚဲ ပ္ဍဲတွဵုရးဍုၚ် ရာဇရဋ္ဌ သၟိၚ်ဘောဂရေန် သ္ပသၟိၚ် ပ္ဍဲဍုၚ်တီခၠၚ်ရ ကာလဂှ် ပ္ဍဲဍုၚ်မန် မဒှ်ဒတန်သာသနာပိပြကာ ပရိယတ္တိ ပဋိပတ္တိ ပဋိဝေဓကီု သီုမဂ္ညိဂ္ညာတ် ကေုာံ ဝေါဟာအိုတ်ဿီုမစိုန်သကီုတဴ ကေုာံစက္ကပန်နာနာ ရုပ်ပါဒလက္ခဏ ပဋိမဏ္ဍိတ တၠဳမၞုံကုပိုန်ကျာ်တြဲ မၞုံကဵုဂၠးဇိုၚ်ၜါ ကေုာံစက်ၜါ ဒရာလ္ၚီ ရုပ်ကၠံဒ္စာံ မွဲဟာန်ကေုာံအရှန်ၜါလက် မဂ္ညိဂ္ညာတ်တဴ နရတ်လျးတြဴသာ် မဂါံကွာ်ကၠောံကၠုၚ် နူဍုၚ်သိၚ်ဃဵုတုဲ မက္ညသ္ပဒတဴ ပ္ဍဲဒဝါဲ ပ္ဍဲရးနိရာဂါံဂဵုဂှ်ရ။ ပ္ဍဲကာလကျာ်တြဲမသ္ပဒတူ ပ္ဍဲရးနိရာဂါံဂဵုဂှ် တၠရသိပိဇကု မွဲဂှ်ကၠုၚ်နူရးလဂုၚ် မွဲဂှ်ကၠုၚ်နူအသး မွဲဂှ်ကၠုၚ်နူသဓီု မပတၠကြဳဇှ် ၛာန်အဘိညာဏ် မကဠာၚ်ကၠုၚ်စိုပ် ကျာ်သပ္ဗညုရးပၞောဝ်တၠရသိပိဇကုဂှ် မွဲဂှ်မၞုံယၟုတၠရသိနဒဳ မွဲဂှ်မၞုံယၟုတၠရသိဂါရ တၠရသိနာဂီုရ။
| Kyaik Day Mehm Palawt Pagoda | |
|---|---|
| ကျာ်ဒဵုမာံပလအ် | |
  Myanmar ဒၞာဲဒတန် မနွံ | |
| တင်ဂၞင်ဂမၠိုင် | |
| ဒတန်ဒၞး | 15°04′55″N 97°53′38″E / 15.0819716°N 97.8937512°E 97°53′38″E / 15.0819716°N 97.8937512°E |
| မဆေင်စပ် ကုဘာသာ | ဗုဒ္ဓဘာသာ |
| ဂိုဏ် | ထေရဝါဒဗုဒ္ဓဘာသာ |
| သဘင် | သဘၚ်ကျာ်ဒဵုမာံပလအ်(တ္ၚဲအတးတိုန်) |
| ပွိုင်ဍုင် | ဍုၚ်ရေဝ် ဟံၚ်ဂါမ်၊ ကွာန် |
| ရး | တွဵုရးမန် |
| ကၟိန်ဍုင် | ဍုၚ်ဗၟာ |
| အကာဲအရာလၟုဟ် | active |
| ပရေင်ပကင်ရင် | ဂကောံဂေါပက ဟံၚ်ဂါမ်၊ ကွာန် |
ဝၚ်ကျာ်ဒဵုမာံပလအ်ဗွဲခမၞောန်
တၠရသိပိဇကုဝွံ အာစိုပ်ဇရေၚ်ကျာ်တြဲတုဲ ဗွဲပဉ္စဝန္ဒနာ မဆိုပ်ပရာပ် မသုန်ပြကာ လ္ၚောဝ်ကျာ်ကၠာတုဲ ဂရၚ်ပ္တီတိုန် ကုတၠဳမၞုံကုပိုန်ကျာ်တြဲရ၊ ယွံတၠဳပသာ်ပိုဲဍိက်သဂွံပအဲပရဲ ဌာပနာဓာတ် စၞးဇကုသဗ္ဗညုညိရော ရဴဝွံအာတ်ဓာတ် သဗ္ဗာညု ပ္ဍဲဒၞာဲ ညးမကော်ခဴစ မရာၚ်တေံရ၊ ကျာ်သဗ္ဗညုဂွံမိၚ်ဂလာန် ဣသိတအ်ဂှ် မဂြၚ်ပ္တီတုဲ မၞးတအ်ညးပိ ဓါတ်သော်ဒ္စိတ်တၞုၚ် ကေတ်ဏာဌာပနာရ ရဴဂွံကျာ်သဗ္ဗညုဟီုတုဲ နတဲသတုံမပြဲ ဇွိတ်သမၠုၚ် ဓါတ်သော်ဒ္စိတ်တၞုၚ်မဒုၚ်ကဵု တၠရသိပိဂှ်ရ၊ တၠရသိပိ ဂွံဓာတ်သော်ဒ္စိတ်တၞုၚ်တုဲ သီုမမိပ်စိုတ် ဗွဲမလောန်ယဵုဒုၚ်ကေတ်တုဲ နကဵုကြောတ်ထဝ် စုတ်လဝ်ဓာတ်ရ။
ကြဴနူဂှ်တုဲ တၠရသိပိဟီုရေၚ်သ္ကအ်ရ ပိုဲသၟဟ်မေတ္တာတုဲ ပိုဲအာနူဝွံတုဲ ပိုဲသ္ပဇနူပ္ဍဲတွဵုရးဍုၚ် ရာဇရဋ္ဌ ရဴသာ်ဝွံတၠရသိနဒဳ ဟီုကဵုတၠရသိၜါဂှ်ရ၊ပ္ဍဲဇိုၚ်ဂၞိၚ်အၚ်တိုၚ်ဂှ် ပိုဲဒီုရ၊(ဇိုၚ်ဂၞိန်အၚ်ဒိုၚ်ဂှ် မဒှ်ဇိုၚ်ဂြိုပ်တၞံအၚ်ဒိုၚ်ရ။)ပ္ဍဲဇိုၚ်ဂြိုပ်အၚ်ဒိုၚ်ဂှ် တၠရသိမွဲမၞုံယၟု သဳရိမာ မမံၚ်ပ္ဍဲတၟံဂၞိၚ်လမ်စံက်ဂှ်ရ၊(တၟံဂၞိၚ် လမ်စံက်ဂှ် မဒှ်တၟံဂြိုပ်လမ်စံက်ရ။) တၠရသိပိဂှ် ပြာပ်ကၠုၚ်စိုပ် ပ္ဍဲဇိုၚ်ဂြိုပ်အၚ်ဒိုၚ်ဂှ်ရ။ တၠရသိ သဳရိမာ ညာတ်တၠရသိပိဂှ်တုဲ သၟာန်တိုန်ရ၊ ယွံတၠရသိပိ မုနူဌာန်မွဲ တၠတံမပြာပ်ကၠုၚ်ဂှ်ရော တၠရသိနဒဳသ္ဂး အဲဍိက်ကၠုၚ်နူလ္ဂုၚ်ရအဴ၊ တၠရသိ ဂါရသ္ဂး အဲဍိက်ကၠုၚ်သဓီုရအဴ၊ ပိုဲဍိက်တအ်ညးပိအာအာတ်ဓာတ်သဗ္ဗညု ပ္ဍဲမရာၚ်တေံတုဲ သဗ္ဗညုကဵုဓာတ်သော် ဒ္စိတ်တၞုၚ် ကုပိုဲဍိက်တအ်ညးပိရအဴ တၠရသိ သဳရိမာ ဂွံမိၚ်ညာတ်ဓာတ်သော်ဒ္စိတ်တၞုၚ်တုဲ အာတ်ကေတ်ဓါတ်သော် ပ္ဍဲတၠရသိပိဂှ်ရ။
ယွံတၠရသိပိ အဲဂှ်မဒှ်ကၞောတ်အယုက်ရ၊ ဓါတ်သော်တၠအဲတအ် မဂွံနၚ်ဂှ်ကဵုအဲဂွံဌာပနာမွဲၜါတၞုၚ်ကီုညိ ရဴဝွံသ္ဂးတုဲ တၠရသိပိကဵုဓါတ်သော် ပိတၞုၚ်တုဲ စုတ်လဝ်ပ္ဍဲကြောတ်ထဝ်တုဲ ပ္ဍဲဌာန်မ္ဒးရးဂှ်ဌာပနာလဝ်ရ။
ကြာနူဂှ်တုဲ တၠရသိ သဳရိမာ ဗ္ကန်ကဵုတၠရသိပိဂှ်ပၠန်ရ၊ ယွံတၠရသိပိ ကာလအဲမစဴဍုၚ်ဗြီုမ္ဂး အဲဗှ်ဗၞုဟ်မေတ္တာကဵု တၠအဲတအ်ညိပိရ တၠအဲတအ်ညိပိဂှ် ညံၚ်ဂွံကၠုၚ်စိုပ်အဲဍိက်ညိအဴ ရဴဝွံသ္ဂးတုဲ တၠရသိပိဂှ် သီုကဵုဓါတ်သော်သေဟ်မံၚ်တြဴတၞုၚ်ဂှ် ကလေၚ်စဴအာဌာန်ဒၟံၚ်ဇကုဇကုအိုတ်ရ၊ လအ်အာပိသၞာံအခါတုဲ တၠရသိ သဳရိမာ ဗၞုဟ်မေတ္တာကဵုတၠရသိပိဂှ်ရ၊ တၠရသိပိ ကဠာၚ်ကၠုၚ်စိုပ်ရ၊ ယွံတၠရသိပိ အဲသၟိက်စဴဍုၚ်ဗြီုရ ဓာတ်သော်ပိတၞုၚ်ဝွံ တၠအဲတအ်ညးပိကေတ်ဏာတုဲ ဒေဝ်လဝ်ညိ ရဴဝွံသ္ဂးရ။
တၠရသိနဒဳ ဂွံဓာတ်သော်မွဲတၞုၚ်စုတ်လဝ်ကဵု သၠိုၚ်ထဝ် ဂဒဵုလဝ်တုံမြတုဲ တိုပ်လဝ်ပ္ဍဲကဵုဇိုၚ်ဂြိုပ် အၚ်ဒိုၚ်ဂှ်ရ၊ ဒၞာဲတိုပ်စွံလဝ်ဓါတ်သော်ဂှ် တိုၚ်တၟံမွဲ တိုၚ်လဝ် တၟာသၠက္ဍိုၚ်တုပ်သၟဟ်ရ၊ ဒၞာဲဂြိုပ်ဂှ် အၚ်ဒိုၚ်ဂှ် ဝိပတ်အာတုဲ ဗ - တတ် ညးကော်စလၟုဟ်ရောၚ်။
တၠရသိဂါရ ဂွံဓာတ်သော်တၞုၚ် စုတ်လဝ်ကဵုကြောတ်ဗိုတ်တုဲ အာစွံလဝ် ပ္ဍဲကဵုတၟံဂြိုပ် အၚ်ဒိုၚ်ဂှ်ရ၊ တၟံဂြိုပ်အၚ်ဒိုၚ်ဂှ် ဝိပတ်အာတုဲ တၟံသိုၚ်သ္ဂးရောၚ်။
တၠရသိနာဂဵု ဂွံဓာတ်သော်မွဲတၞုၚ်တုဲ စုတ်လဝ်ကဵုသၠိုၚ်မြ ဂဒဵုလဝ်ကဵုတၟံနဳလာတုဲ အာဒေပ်စွံလဝ်ဒဵုမၠအ်တၟံထဝ်တေံရ။
ကာလဌာပနာဓာတ်သော်ဂှ် တၠရသိပိကီုသီုသၟိၚ်အိန် တၠသွဝ်ၜါကီု စတုမဟာရာဇ် ပန်ကီု အိုတ်ကဵုဒေဝတဴအိုတ်သီုကီု သၟိၚ်သွဝ် သၟိၚ်မှာဗဳသၞု သၟိၚ်ဒေဝတဴဝေဿဝဏ် ဗြီုသီုဂၞကျာ် သီုဂၞကျာ်အိန်ပန် သီုတွဳဝါရအိုတ်သီု ဒေဝတဴ အိန်ဗြီု ကၠုၚ်ကောံမွဲဟာန်အိုတ်တုဲ ကြဳဇှ်ဓါတ်သော်သဗ္ဗညုကီု ကြဳဇှ်တၠရသိပိကီု ဒေဝတဴ အိန်ဗြီု မၞိဟ်ဂမၠိုၚ် မ္ဒးကၠုၚ်စိုပ် သ္ပပူဇဴဓာတ်သော်တုဲ ပ္ဍဲလတူ က္ဍိုပ်တၟံသမၠိုၚ်ဂှ် အိန်စဳရေၚ်လဝ်ဓါတ်သော်ရ။
သၟိၚ်အိန် သီုမဂ္ညိဂ္ညာတ်လဝ် မပြဲပြဲ ပ္ဍဲတဲရပ်ကွဵုဗိုတ် တၚ်မဏိက် လကံက်ဗၠဲ ခါဲကတိုၚ်ဓာတ်သော်ရ၊ ဂၞကျာ်အိန်ပန် မဂွးကတိုၚ်ဓါတ် ရသိပိဂှ် မဒုၚ်တိ ဒေဝတဴဂမၠိုၚ် မၜုၚ်သကးတိသီဂှ်ကီု (တိသီဂှ် တိအရှာံဂှ်မ္ဂးရ)။ ဒေဝတဴ ကျာ ပိုက်နၚ် သဂေဟ်ဒကှ်ဗၞတ်ဗၞတ်က္ၜံၚ် လယိုဟ်က်တိုၚ်ဓာတ်ဂှ် ထပှ်ဟတ်သာံဒံၚ် (ဟိုတ်သာံဒံၚ်ဂှ် စှ်ဒ္စိတ်ၝောံတဲ ကဝက်)။ သၞာဓါတ်ဗၠဲ မွဲမၞိဟ်လးသမ္မထိုက် မဒှ်ဒကိုဝ်ကြောတ် မၞိက် - မြ - ဗိုတ်- ဗဂဲ - မသၠိုၚ်လဝ်ဓါတ် မွဲဟတ်သာံဒံၚ် ထ္ၜောံဓါတ် တၟာတဝ်ဥပဵုဗ္ကေတ် ထၞိက်ထဝ်သြန်အိုတ်ကဵု ဒြပ်ရတ်ထပှ်ပြကာဝွံ မသၠိုၚ်ကသဵုလဝ်ကတိုၚ်ဓါတ်ဂၠိုၚ်သန် တၟံမြသာံဖြာဏဳ သတီုမွဲဟတ်သာံဒံၚ် ဇမၠိၚ်မွဲဟိုတ်သာံဒံၚ် လၞၚ်မွဲဟိုတ်သာံဒံၚ်ဂှ် မဒှ်ဂဒဵုဓါတ်ရ။
ဗိုတ်အာပၠာ သတီုမွဲဟတ်သာံဒံၚ်၊ ဇမၠိၚ်မွဲဟတ်သာံဒံၚ်၊ လၞၚ်မွဲဟတ်သာံဒံၚ်၊ ဗိုတ်ဂှ်မလးလဝ်ဂတာ ကတိုၚ်ဓာတ်ရ၊ ပ္ဍဲကတိုၚ်ဓါတ်ထပှ်ဟတ်ဂှ် ၜိုန် - ပိဟတ်ဂှ်ဒှ်ကြက်ဒြပ်ဖအိုတ်ရ၊ လ္တူဂှ် အိန်ပကဲလဝ် လက်ပိတန် ဒကဴပန်ဒိုဟ်ဂှ် ပၞာၚ်ဒိပ် ပန်တၞုၚ်လ္တူဂှ် တက်ကြောတ်လဝ်ဇာထဝ်ဇာသြန်တုဲ လဒေါဝ်ဂှ် ဌာပနာလဝ်ဓာတ်ရ သၟိၚ်အိန် သၟိၚ်ဗြီုဒေဝတဴဂမၠိုၚ် မၚ်မွဲလဝ်ရ ဒၞာဲစွံလဝ်ဓါတ်ဂှ် ဗတ်လဝ်ကဵုတၟံကီု သီုကဵုတိ ညံၚ်ကဵုဗဝိုဟ်အုန်ကီုရ။
ဒၞာဲဒဵုဝွံ ဒဵုမၠအ်တၟံထဝ် ညးသ္ဂးလဝ် ပ္ဍဲအာဒိကိုပ်ကၠာတေံရ ဒဵုဝွံ ဒဵုမၠအ်တၟံထဝ်ဂှ် ဝိပတ်အာတုဲ ဒဵုမၚ်မၠအ် ညးမ္ဂးပၠန်ရ၊ ဒဵုမၚ်မၠအ်ဂှ် ဝိပတ်အာတုဲ လၟုဟ်ဝွံဒဵုမာံပလအ် ရဴဝွံညးကော်ခဴစအိုတ်ပၠန်ရ။
သၠိုၚ်ဓါတ်သော်ဏအ် တုဲဒှ်အိုတ်တုဲ တၠရသိပိကီု သ္ပလဝ်အဓိဌာန် ကဵုဓါတ်သော် သာ်ဝွံရ၊ ခမဳနွံကဵုဓရ်သဳလကီု ခရှ်နွံကဵုဓရ်သဳလဂှ် ကဵုဂွံဌာပနာ မၚ်မွဲရေဟ်သေဟ်အာ အနာဂတ်ညိဂးတုဲ တၠရသိပိဇကု ကဠာၚ်စဴကၠုၚ် ဂြိုပ်အၚ်ဒိုၚ် စဴယိုက်ဇွ ဂြဇုတ်တၠရသိ သဳရိမာ ရ၊ ဒၞာဲစံၚ်ဇွတၠရသိဂှ် ဒက်လဝ်စေတဳမွဲ သဳရိမာစေတဳမ္ဂးယၟုရ၊ ဒက်စေတဳဂှ်တုဲ တၠရသိပိ ကၠေၚ်စဴအာဌာန်ဒၟံၚ်ဇကုကု အိုတ်ရ။
ဝၚ်ပရောပရာကျာ်ဒဵုမာံပလအ်ဗွဲခမၞောန်တုဲဆဝွံရောၚ်။
နိဿဲ
This article uses material from the Wikipedia မန် article ကျာ်ဒဵုမာံပလအ်, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). ပရောပရာတၚ်လညာတ်တၞဟ်ယဝ်ရဟွံမွဲတှ်ေပ္ဍဲ CC BY-SA 4.0 မဒုၚ်ကေတ်မာန်ရ။ Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki မန် (DUHOCTRUNGQUOC.VN) is an independent company and has no affiliation with Wiki Foundation.