ဝှုက်ဗောက် (အၚ်္ဂလိက်: Facebook) နကဵုယၟုကမ္မဏဳ Facebok, Inc.
(NASDAQ: FB) ဝွံ ဒှ် အဆက်စလောအ် ပရေင်မၞိဟ် နကဵုအန်လာင်တုဲ မုက်လိက်ဝေပ်သာ်ဂှ် မၞိဟ်အလုံမွဲဂၠးတိ မလုပ်ဗဵု ပါလုပ်ဂၠိုင်အိုတ်ရ၊၊ အကံက်မုက်လိက် မချဳဓရာင်ဒၟံင် သီုဖအိုတ် နွံၜိုတ် ၜါအသံင်္ဃဲ (၂.၀၀၀.၀၀၀.၀၀၀)တုဲ ဇၟာပ်ဇၟာပ်တ္ၚဲ မုက်လိက်တၟိ တိုန်ဒၟံင် ၜိုတ် ၂၅၀.၀၀၀ ဒှ်ရ၊၊ ယၟုမ္ဂး ဝှုက်ဗော်Facebook ဂှ် ဒုင်သဇိုင် ကုအခိုက်လိက် ကွးဘာတက္ကသိုလ်အမေရိကာန် မစုတ်လဝ် ဗီုရုပ်ကွးဘာတအ် ကေုာံ ပရူတင်ဂၞင်ပူဂိုလ်တအ် သွက်ဂွံ ကေတ်အဆက်ရေင်သကအ်လောဲသွာရ၊၊ ယဝ်ကၠာဲဘာသာတပ်တပ်မ္ဂး (Face မဂွံအဓိပ္ပါယ် မုက်၊ book မဂွံအဓိပ္ပါယ် လိက်) လိက်မနွံကဵု မုက်ရုပ်မၞိဟ်၊၊ ဝှုက်ဗောက်ဂှ် မၞိဟ်တအ် ဗွဲမဂၠိုင် စကာနဒဒှ် သွက်ဂွံပတိုန်ဗီုရုပ် ချဳဓရာင်ဇကုဂၠိုင် ကုရဲဇကုရ၊၊ မွဲမွဲတ္ၚဲဂှ် ဗီုရုပ်တိုန်ဒၟံင် ပ္ဍဲဝှုက်ဗောက် ၜိုတ် ၁၄ ပြကောဋိကိုဋ် ဒှ်တုဲ မဒှ်မုက်လိက် မၞိဟ်မစကာ မၞိဟ်မတိုန်ဗဵုဂၠိုင်အိုတ် ပ္ဍဲဂၠးတိဏအ်ရ၊၊
ဝှုက်ဗောက် Facebook, Inc. | |
---|---|
Screenshot ဝှာင်:Facebook user page (2019).png မုက်လိက် ညးမခၞံဗဒှ် ဝှုက်ဗောက် မာရ်က် ဇြောက်ကာဗောက် (Mark Zuckerberg) | |
ဝေပ်သာ် | https://www.facebook.com |
ကမြဴ | 'If you think we're not good for your business, leave' |
ပရေင်ပိုန်ဒြပ် | ယွံ |
ဂကူမုက်လိက် | အဆက်စလောအ် ပရေင်မၞိဟ် |
ဘာသာ | ဘာသာနာနာ ၁၄၀ ဘာသာ |
ညးမပိုင်ပြဳ | NASDAQ: FB (Class A) |
ညးမခၞံဗဒှ် |
|
သၞာံမစတြး | ဖေဖဝ်ဝါရဳ ၁၅၊ ၂၀၀၄ |
ၚုဟ်မး | US$ 55.838 billion (2018) |
အကာဲအရာ လၟုဟ် | မုက်လိက် မၞိဟ်မစကာဂၠိုင် |
ဝှုက်ဗောက် ဂှ် မာရ်က် ဇြုက်ကေရ်ဗုက် (Mark Zuckerberg) ခၞံကၠောန်လဝ် ပ္ဍဲဂိတုဖေဖဝ်ဝါရဳ သၞာံ ၂၀၀၄ အခိင်ညးတေအ် မတိုန်ဒၟံင် တက္ကသိုလ်ဟာရ်ဝါဒ် (Harvard)ရ၊၊ ကရောမ်ညးတေအ်ဂှ် အေန်ဒရေဝ် မက်ကောလ်လုမ် (Andrew McCollum) ကေုာံ အိဒုရ်ဒဝ် သဝေရိန် (Eduardo Saverin)တအ် ဗိုင်ပါလုပ်လဝ်ကီုရ၊၊ စကိုပ်ကၠာဂှ် ကွးဘာတက္ကသိုလ် ကေုာံ ကဝ်လိက် မလုပ် နကဵုအဳမေလ် ဘာဟေင် စကာဂွံရ၊၊ စနူဂှ်တုဲ ဝှုက်ဗောက်ဂှ် လုပ်ဂွံအာ ဇၟာပ်မၞိဟ်ရ၊၊ အဆက်စလောအ်လဵု ဇကုမိက်ဂွံပါလုပ်ဂှ် မၞိဟ်တအ် ရုဲစှ်ကေတ်တ်ရ၊၊ မၞိဟ်တအ် ရုဲစှ်ကေတ်တ် ညးလဵု အခေါင်ဗဵုမုက်လိက်ဇကုဂွံ၊ မုက်လိက်ညးဂှ် လုပ်စိုပ် ပ္ဍဲမုက်လိက်ဇကုဂွံရ၊၊ တုဲပၠန် ပ္ဍဲလိက်ညးတၞဟ်မပတိုန်လဝ်ဂှ် ဇကုမိက်ဂွံချူ ပတိုန်ဂလာန်လေဝ် ချူပတိုန်ဂလာန်ဂွံကီုရ၊၊ ပ္ဍဲဝှုက်ဗောက်ဂှ် မၞိဟ်တအ် ရုဲစှ်ကေတ် အပ်ပလိက်ကေရှေန် ဇကုမဒးစိုပ် စပ်ကဵုဝေင်ဂေမ်၊ ရုပ်ဒမျိုင်တအ်ဒှ်တမ်ရ၊၊ စတမ်နူဂိတုဨပြဳ သၞာံ ၂၀၀၈ ဂှ်တုဲ ဓရီုဆာတ် ရေင်သကအ် ပ္ဍဲဝှုက်ဗောက်လေဝ် ဂွံကၠုင်ကီုရ၊၊ လၟုဟ်မ္ဂး နကဵုဝှုက်ဗောက်ဂှ် ဓရီုကျာ ကော်ဖုင်နကဵုရမ္သာင်သၟးကီု သီုကဵု ကော်ဗဳဒဳယောလေဝ် ဂွံကီုရ၊၊
ဝှုက်ဗောက်ဂှ် ဒှ်မုက်လိက် မၞိဟ်မစကာ လုပ်ဗဵုဂၠိုင်အိုတ်. မွဲမွဲဂိတုမ္ဂး ဗီုရုပ် ၂.၅ အသံင်္ဃဲပြင်င်ဂှ် ပတိုန်တြးဒၟံင် ပ္ဍဲဝှုက်ဗောက်ရ၊၊. တုဲပၠန် ဝှုက်ဗောက်ဂှ် ဒှ်မုက်လိက် မဒးဒုင်ကၟာတ်လဒဵုဂၠိုင်အိုတ် ပ္ဍဲကဵုဒၞာဲကမၠောန်ဂမၠိုင်ရ၊၊.
ဝှုက်ဗောက်ဂှ် ဆိင်ကေတ်မ္ဂး နွံကဵု ၚုဟ်မးဗွဝ်ဖျာ ၜိုတ် ၅၀၀ အသံင်္ဃဲ ဒဝ်လာအမေရိကာန်. ယျာဟူ (Yahoo) ကီု သီုကဵု မိခရဝ်သပ်တ် (Microsoft) မိက်ဂွံရာန်ကေတ်ဒၟံင် ဝှုက်ဗောက်ကီုလေဝ် မာရ်က် ဇြုက်ကေရ်ဗုက် ညးတေအ် ဟွံသွံရ၊၊ မိခရဝ်သပ်တ် ရာန်ဂွံအာ ကမ္မဏဳမွဲကရေက်ဍောတ်ကီုရ၊၊.
စတမ်နူ ဂိတုမေ ၁၂၊ ၂၀၁၂ ဂှ်တုဲ ဝှုက်ဗောက်ဂှ် ဒှ်အာ ကမ္မဏဳ နကဵုရှလ်ယျာတုဲ ဇၟာပ်မၞိဟ် လုပ်ရာန်ကေတ်ရှလ်ယျာဝှုက်ဗောက် ပ္ဍဲကဵု ရှလ်ယျာအမေရိကာန်ဂွံမာန်ရ၊၊
ကၠောန်ဂကောံဝှုက်ဗောက်ဂှ် ဟိုတ်နူ မဒှ်အရာသက်ကုၚုဟ်မးတုဲ မၞိဟ်တအ် ကၠောန် အကံက်ဂကောံဝှုက်ဗောက်တုဲ ဆက်စၠောအ် ရေင်သကအ်အိုတ်ရ၊၊ နကဵုဂကောံဗီုဏအ်ဂှ် ပလံင်ဗစိုပ်ပရိုင် ဗွဲမပြးမာန်တုဲ ပရးဝါဒပရူမွဲမွဲလေဝ် ဂွံပြဟ်ကွေဟ်ဟ်ကီုရ၊၊ နကဵုဝှုက်ဗောက်ဂှ် ဖန်ဇန်ကဵု ပရေင်ဆက်စၠောအ် အရာမွဲကုမွဲဂွံ ဗွဲမလောဲသွာတုဲ ၜိုတ်ပၟိက်ဆန္ဒမၞိဟ်တအ် မနွံဂှ် ဝှုက်ဗောက်ပါလုပ် ရနုက်ဗပေင်ကဵုရ၊၊.
ဝှုက်ဗောက်ဂှ် နူကဵုစတေအ်ဂှ် ဒဒှ်ရ နကဵုမုက်လိက်ဝှုက်ဗောက်ဂှ် ချူပရး ဟီုဂး ဂလာန်မရုန်မဵု ဂလာန်မဗျုတ်ပဒေက် ညးတၞဟ်ဟွံဂွံတုဲ ပ္ဍဲဂှ်ပၠန် မဒက်ဂကောံမရုန်မဵု သွက်ဂွံချူ ပရူဂကူမၞိဟ်မွဲမွဲပရေအ်ဟွံဂွံရ၊၊ ၜိုန်ဂှ်လေဝ် ဝှုက်ဗောက် ဗွဲမရီုဂပ် စိုပ်တရဴဂှ် ရပ်စပ် ပ္ဍဲအရာဏအ် ဟွံမာန်ရ၊၊
မၞိဟ်အဓိက ကေုာံ မၞိဟ်မခၞံဗဒှ်ဝှုက်ဗောက် မာရ်က် ဇြုက်ကေရ်ဗုက် ဒးဒုင်သၟာန် ကုကောန်ဂရေက် အမေရိကာန် ဒဒှ်ရ ဝှုက်ဗောက် ဒှ်အရာအဓိက သွက်ဂွံဆဝ်မ္ၚုဟ် ပ္ဍဲအရာမဂစိုတ်ပဠက်ဂကူရဝ်ဟေန်ဂျာ ပ္ဍဲဍုင်ဗၟာရ၊၊
ဝှုက်ဗောက် ဒးဒုင်ပါ်ပါဲ နကဵုလပါ်နာနာသာ်ရ၊၊ ပၞောဝ်တအ်ဂှ် ဗီုရုပ် မပတိုန်လဝ် လတူဝှုက်ဗောက်တအ်ဂှ် ညးဂှ်ကလိဂွံ အခေါင်ပိုင်ပြဳရောတအ် ဒှ်တမ်ရ၊၊ စပ်ကဵု ကိစ္စအခေါင်ပိုင်ပြဳဏအ်ဂှ် ဥပဒေ မွဲဍုင်ကဵုမွဲဍုင် ဟွံတုပ်ရေင်သကအ်တုဲ ကမ္မဏဳဝှုက်ဗောက်ဂှ် နွံပ္ဍဲဍုင်အမေရိကာန်တုဲ သၞောဝ်ဥပဒေ နူဍုင်မပ္တံကဵု ယူရောပ်တအ်ဂှ် ဟွံဆက်စပ် ကုကၟိန်ဍုင်အမေရိကာန်ရ၊၊ ပါဲနူဂှ်တုဲ ဗီုရုပ် မဒစဵုဒစး ကုသၞောဝ်ဥပဒေ မပ္တံကဵု ဗီုရုပ် အင်္ဂလိင်ကောန်ၚာ်၊ ဗီုရုပ်မရုန်မဵု မစိုပ်အာ လတူဝှုက်ဗောက်တအ်ဂှ် ဝှုက်ဗောက် သီုဟွံပလီုမွဲသာ် ကဵုပြးဒၟံင် လတူလာင်ဂှ်ရ၊၊
ဝှုက်ဗောက် ကေုာံ သကအ်ပရေင်ပိုန်ဒြပ် မွဲစွံ ကုဝှုက်ဗောက်တအ် ပံင်တောဲတုဲ အောပ်မင်ရံင်ဒၟံင် မုညးတၞဟ်မလုပ်ဗဵု ပ္ဍဲကဵု ဝပ်သာ်တအ်ရ၊၊ ဥပမာ မၞိဟ်မွဲ နကဵုသမာတ်ဖုင်ဇကု ဇကုလုပ်ဂၠာဲ ပရူကပေါတ်မွဲမွဲ ဟီုထောအ်ရ ဇကုဂၠာဲကျောဝ်ဒၞပ်မ္ဂး တင်ဂၞင်ဇကု မလုပ်ဂၠာဲဒၞပ်ဂှ် (နူကဵု အာပ် Apps မွဲကဆံင်) ဝှုက်ဗောက်ကၠတ်ကေတ်တုဲ ပ္ဍဲမုက်ဝှုက်ဗောက်ဇကု အကြီုဒၞပ်၊ ဒၞပ်လဵု ၚုဟ်မူစိ၊ ဖျေဟ်လဝ်ၚုဟ် ဗီုလဵုဂှ် မံက်တိတ်ကၠုင်ရ၊၊ ဆ နူကမ္မဏဳဒၞပ် မကဵုလဝ်လှုဲ ကုဝှုက်ဗောက်ဟေင် အကြီုမံက်ကၠုင် ပ္ဍဲမုက်ဝှုက်ဗောက်ဇကုရ၊၊ ဟိုတ်သာ်ဂှ်ရ ဝှုက်ဗောက်ဂှ် ဒှ်ဒၞာဲ မၞိဟ်မစကာဂၠိုင်တုဲ ကမ္မဏဳ ဟွံကဵုလှုဲ ကုဝှုက်ဗောက်မ္ဂး ဇကုဟွံဒှ်ကမၠောန်ဂှ် ဝှုက်ဗောက်ဂှ် ဒှ်အာ စက်ဇြောတ်လှုဲ နူကဵုကမ္မဏဳမပတိတ်ကပေါတ်တအ်မွဲရ၊၊
ပ္ဍဲသၞာံ ၂၀၁၂ တၠရှလ်ယျာ ပ္ဍဲကမ္မဏဳဝှုက်ဗောက်
သၟေဟ် ၃၀ ﹪ဂှ် ဒှ်ကောန်ကမၠောန် ဝှုက်ဗောက်ဂမၠိုင်ရ၊၊
ပ္ဍဲမၞိဟ်ပကင်ရင် အဓိကတအ်ဂှ် ဒှ် Chris Cox (Chief Product Officer), Sandberg (Chief Operation Officer), Zuckerberg (Chairman and Chief Executive Officer), David Wehner (Chief Financial Officer) ကေုာံ Elliot Schrage (Public Relations Head) တအ်ရ၊၊ ပ္ဍဲသၞာံ ၂၀၁၁ ဂိတုဨပြဳဂှ် ပ္ဍဲကမ္မဏဳဝှုက်ဗောက်ဂှ် သၟာကမၠောန် သီုဖအိုတ် နွံ ၇၀၀၀ ပြင်တုဲ ရုင်နွံပ္ဍဲဍုင် ၁၅ ဍုင်ရ၊၊ ဝှုက်ဗောက်ဂှ် ဒှ်ဒၞာဲ မကၠောန်ကမၠောန်ခိုဟ်အိုတ် ပ္ဍဲဂၠးတိဏအ် မရနုက်ကဵု ၃ ရ၊၊
အဓိက ပၞောက်သြန်လုပ် ဝှုက်ဗောက်ဂှ် ဒှ်ကမၠောန်အကြီုရ၊၊ သၞာံ ၂၀၁၄ ဂှ် သြန်လုပ် ဝှုက်ဗောက် စိုပ်အာ စဵုကဵု သြန်ဒဝ်လာအမေရိကာန် ၁၂,၄၆၆ ပြကောဋိကိုဋ်ရ၊၊
သၞာံဘဏ္ဍာ | သြန်လုပ် (ဒဝ်လာအမေရိကာန် နကဵု ပြကောဋိကိုဋ်) | လၟိဟ်မဇၞော်မောဝ် |
---|---|---|
၂၀၀၄ | ၀.၄ | - |
၂၀၀၅ | ၉ | ၂၁၅၀ % |
၂၀၀၆ | ၄၈ | ၄၃၃ % |
၂၀၀၇ | ၁၅၃ | ၂၁၉ % |
၂၀၀၈ | ၂၈၀ | ၈၃ % |
၂၀၀၉ | ၇၇၅ | ၁၇၇ % |
၂၀၁၀ | ၂,၀၀၀ | ၁၅၈ % |
၂၀၁၁ | ၃,၇၇၁ | ၈၆ % |
၂၀၁၂ | ၅,၀၈၉ | ၃၇ % |
၂၀၁၃ | ၇,၈၇၂ | ၅၅ % |
၂၀၁၄ | ၁၂,၄၆၆ | ၅၈ % |
၂၀၁၁ လပါ်စဂှ် ဂအုပ်ရုင်ဝှုက်ဗောက်ဂှ် ညးတအ် ပြံင်ဏာ ဇရေင် မေန်လဝ် ပက် (Menlo Park) ပ္ဍဲခါလဳဝှောနဳယျာ (California) ကၟိန်ဍုင်အမေရိကာန်ရ၊၊ သွက်မၞိဟ်မစကာ ဝှုက်ဗောက် မ္ၚးဍုင်အမေရိကာန် ကဵု ကနေဒါဂှ် ညးပံက်လဝ် ဆပ်ရုင် ပ္ဍဲဍုင်ဒါပ်ပလေန် ဍုင်အာင်ယျာလာန် "Facebook Ireland Limited" ရ၊၊
သၞာံ ၂၀၁၀ ဂှ် ဝှုက်ဗောက်ပံက်ရုင်ညး မရနုက်ကဵုပန် ပ္ဍဲအိန္ဒိယ ဟာ်ဒရာဘာတ် (Hyderabad) တုဲ မဒှ်ရုင် ပ္ဍဲအာရှကၠာအိုတ်ရ၊၊ ဟိုတ်နူ မၞိဟ်စကာဂၠိုင် စိုပ်အာ စဵုကဵု ၇၅၀ ပြကောဋိကိုဋ်တုဲ ရုင်ပ္ဍဲဟာဒရာဘာတ်ဂှ် သီုဇၞော်ပတိုန် နဒဒှ် ရုင်မဂိုင်တင်ဂၞင်ဒါတာဂမၠိုင်ကီုရ၊၊
သၞာံ ၂၀၁၇ ဂှ် ဝှုက်ဗောက်ပံက် ရုင်ဗဟဵုလာန်ဒါန် ပ္ဍဲကဵု ဖိတ်ဇြရဝ်ဗဳယျာ (Fitzrovia) မွဲရ၊၊
ဂအုပ်ရုင် ဝှုက်ဗောက် မ္ၚးဍုင်အမေရိကာန်ဂှ်
This article uses material from the Wikipedia မန် article ဝှုက်ဗောက်, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). ပရောပရာတၚ်လညာတ်တၞဟ်ယဝ်ရဟွံမွဲတှ်ေပ္ဍဲ CC BY-SA 4.0 မဒုၚ်ကေတ်မာန်ရ။ Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki မန် (DUHOCTRUNGQUOC.VN) is an independent company and has no affiliation with Wiki Foundation.