Rumahgadang Minangkabau Ado Di Surabaya

Ciri rumahgadang adolah atok babantuak gonjong. Ayoknyo tabuek dari ijuak. Salain di ranah Minang nan barado di Sumatera Barat, rumah gadang minang kabau ado di lua daerah. Di antaronyo di Taman Mini Indonesia Indah (TMII) Jakarta. Sakain itu ado di Surabaya, Jawa Timur. Bahkan ado nan di lua nagari, di antaronyo Sremban, Negeri Sembilan jo Kuala Lumpur Malaysia. Rumahgadang nan di ranah Minang, ado di tiok nagari. Namun nan paliang tamusahua ado di Batusangka. Sadangkan nan di Surabaya, badiri sajsk taun 1987. Didirikan dek masyarakaik parantau Minang nan bahimpun di organisasi Gebu Minang. Asanyo Gebu itu singkatan dari Gerakan Saribu Minang. Kini barubah manjadi Gerakan Ekonomi dan Budaya Minang. Latak rumahgadang Minangkabau di Surabaya ado di Kelurahan Gayungan, Kecamatan Gayungan, Jalan Gayung Kebunsari 64 Kota Surabaya. Rumahgadang nan punyo duo rangkiang dan surau tu, talatak di ateh tanah 3.500 meter pasagi. Asa usua tanah tu, adolah tanah hibah dari kaluarga almarhum Rahman Tamin, nan punyo pabirik kain PT.Ratatex singkatan dati Rahman Tamin Textil. Orang kayo nan manjadi tokoh urang awak Minang di zaman pamarintahan Sukarno-Hatta, di tahun 1957 sampai 1974. Kini rumah gadang nan di Surabaya ko sadang disiapkan manjadi destinasi wisata di Surabaya, Jawa Timur. Manuruik Ketua Umum Yayasan Gebu Minang Jawa Timur, Haji Muhammad Yousri Nur Rajo Agam, rintisan untuak jadi salah satu obyek wisata di Surabaya alah lamo diminta Dinas Kebudayaan dan Pariwisata (Disbudpar) Pemerintah Kota Surabaya. Namun, karano masih dalam proses panyalasaian, mako masih basipaik samantaro. Kalau nanti ukiran jo sagalo macam dekorasi alah salasai baru dilewakan manjadi salah satu obyek kunjungan wisata budaya di Surabaya. Manuruik Pak Rajo Agam nan alah manjadi tokoh Kota Surabaya sajak tahun 1975 tu, rencana rumahgadang di Surabaya ko manjadi etalase budaya Minang alah mandapek dukungan dari tokoh urang Minang. Di antaronyo, mantan gubernur Sumatera Barat Harun Zain, Azwar Anas, Hasan Basri Durin jo Irwan Prayitno. Baitu pulo tokoh urang awak Minang nan paranah manjadi tokoh di Jawa Timur. Indak hanyo urang Minang, tokoh jo pajabaik Jawa Timur ko Kota Surabaya, alah siap pulo maagiah dorongan sarato mandorong sagalo persiapan. Mulai dari gubernur Sularso, Wahono, Basofi Sudirman, Imam Utomo, Sukarwo sampai ka Khofifah Indar Parawansa. Baitu pulo ko Walikota, sajak Purnomo Kasidi, Sunarto Sumoprawiro, Bambang Dwi Hartono sampai ka Tri Rismaharini.