Katto-Katto

Mainan iko dimainan dengan caro diayun baiak sacaro lambek maupun sacaro capek hinggo saliang babanturan dan manghasiaan bunyi khas. Pamainan iko barasa dari Amerika Serikat nan disabuik Clackers Balls Toys dan ado samanjak era 1960-an, dan kamudian kian populer padaoera 1970-an.

Asa-usua

Katto-Katto atau Latto-Latto marupoan pamainan nan asanyo dari Amerika Serikat. Pamainan iko mulai muncua pado maso era 60-an hinggo samakin populer pado maso awa 70-an. Katiko itu urang-urang manyabuiknyo mulai dari clackers, click-clacks, knockers, ker-bangers, dan clankers, panamaan iko kabanyakan badasarkan dengan merek jo namo nan alah diagiaan dek pabrik pambueknyo masiang-masiang. Katiko pamainan iko mulai masuak ka Indonesia, Clackers Balls Toys disabuik Katto-Katto. Di Indonesia, kabanyakan namo pamainan iko hanyolah proses asimilasi dan panamoan dari warga lokal di babagai daerah. Katto-Katto iko muncua sasudah puluahan tahun silam pernah populer di Sulsel. Bagi anak kalahiran 90-an pasti pernah mamainkan pamainan iko.

Bahan jo jinih

Awanyo, duo buah bola nan ado di Clackers Balls Toys tabuek dari kaco. Katiko duo buah bola pacah, hal itu dapek mambahayoan pamainnyo. Karano itulah, duo bola pado Clackers Balls Toys diubah manjadi bahan plastik nan mampunyoi tekstur kareh jo padek nan babantuak bulek dengan pamukaan nan haluih. Warna pado bola adolah warna mancolok. Salain itu, Clackers Balls Toys dilengkapi jo tali.

Sacaro rinci, Katto-Katto di Indonesia alah mangalami modifikasi pado asa usuanyo. Tali nan digunoan indak sataba tali clackers sahinggo akselerasi nan dihasiakannyo labiah capek. Baitu pulo dengan varian ukuran bola ado nan labiah ketek atau labiah gadang pado umumnyo. Tadapek pulo jinih Katto-Katto dengan efek manyalo. Sahinggo jiko dimainkan pado tampek galok atau malam hari taliek manariak.

Meski sempat hilang atau redup pamainan Katto-Katto atau Latto-Latto banyak baliak dimainkan dek kasado kalangan baiak anak-anak hinggo remaja di babagai daerah balakangan iko. Katto-Katto pernah rami dimainkan dek anak-anak Indonesia pado maso era 1990-an. Pamainan Katto-Katto iko viral baliak balakangan iko. Banyak urang nan mancubo manunjuakan kaahlian jo kalincahannyo mamainkan Katto-Katto malalui video nan mereka unggah di media sosial. Banyak pulo urang nan mangaku banostalgia, karano Katto-Katto iko adolah pamainan tempo dulu nan kini kambali viral baliak.

Duo bulan tarakhia tahun 2022 iko, Katto-Katto manjadi pamainan nan digandrungi indak hanyo dek anak-anak. Tapi urang dewasa jo urang tuo mamainkan juo. Fenomena iko indak hanyo marak di wilayah Pulau Sulawesi, tatapi juo di babarapo daerah di Indonesia, sarupo di Pulau Jawa, jo Pulau Kalimantan.

Di Sulawesi Selatan, satiok hari suaro bisiang dari Katto-Katto tadanga dimano-mano. Bahkan fenomena Latto-Latto iko pun marak dilombaan, sarupo di Bulukumba, Palopo, Soppeng, Sinjai, Makassar. Salain karano haragonyo murah, mainan iko dapek dengan murah ditamuan di pasa-pasa tradisional, toko-toko kelontong ataupun di toko-toko mainan di babagai wilayah Sulsel.

Pamainan iko mampunyoi banyak sakali namo nan tagantung daerah masiang-masiang panamoannyo. Di Amerika Serikat, pamainan iko dinamoi Clackers Balls Toys, Britania Raya manyabuiknyo Clackers atau Clackers Knockers, Kanada manyabuiknyo Click Clacks, Spanyol manyabuiknyo Tiki-Taka, Portugal manyabuiknyo Bolimbolacho, Belanda manyabuiknyo Klikklak atau Klik-Klaks, Jerman manyabuiknyo Klick-Klack-Kugeln, Polandia manyabuiknyo Riki-Tiki atau Klik-Klak, Prancis manyabuiknyo Tac-Tac, Yunani manyabuiknyo Taka-Taka (Τάκα-Τάκα), Brasil disabuik juo jo 'Bolas, dan Mesir manyabuiknyo Sisi.

Sajumlah daerah di Indonesia mampuyoi istilah babedo untuak manyabuiknyo Katto-Katto badasarkan onomatope, marujuak pado bunyi nan dihasiakan pado mainan tasabuik dan baciri khas kato reduplikasi. Masyarakaik Sulawesi Selatan mandangakannyo bunyi taktok-taktok, sahinggo mereka manyabuiknyo Katto-Katto. Masyarakaik Sulawesi Selatan, Sulawesi Barat, jo Sulawesi Tenggara manyabuiknyo Katto-Katto (dek suku Makassar) atau Latto-Latto (dek suku Bugis). Masyarakaik daerah Jawa manamoinyo Etek-Etek (Ethek-Ethek) atau Tak-Tik-Tok, Buol, Palu Sulawesi Tengah jo Maluku manyabuiknyo Tok-Tok, Sulawesi Utara manyebuiknyo Toki-Toki, sadangkan di Luwuk, Sulawesi Tengah disabuik Nok-Nok. Namo Makatto-Katto' atau Mallatto-Latto juga disabuikan masyarakaik Sulawesi Selatan. Tambahan ma- pado namo tasabuik marupoan prefiks baiak dalam bahasa Makassar maupun dalam bahasa Bugis nan bamakna malakuan atau mamainkan.

Katto-Katto dimainkan indak tabateh pado gender jo umua. Kasado kalangan dapek mamainkan pamainan iko. Pamainan iko sangaik alamiah dan dapek dilakukan di ruang tabukak atau tatutuik, duduak atau tagak. Caro mamainkan Katto-Katto cukuik murah. Cukuik dengan mangayunkan duo bola di bawah jo ateh tangan sahinggo kaduo bola salalu batubrukan tanpa maleset dan manghasiakan suaro. Itulah sababnyo pamainan Katto-Katto mambutuahan kalincahan jo kaahlian manyaimbangkan duo bola di sauteh tali.

Meski taliek sapele caro mamainkannyo, pamainan Katto-Katto indak buliah ragu-ragu dalam mangayunkannyo sarato mambutuahan konsentrasi/fokus, katarampilan/teknik tinggi, jo kasabaran. Pamainan iko mampunyooi risiko tangan atau jari dapek manjadi memar jiko indak piawai mamainkannyo. Caro:

1. Masuakan jari tangah tangan suok pado cincin Katto-Katto.
2. Lalu ukua samo panjang.
3. Saimbangkan duo buah bola Katto-Katto.
4. Ayunkan ka ateh jo ka bawah sacaro palahan hinggo saliang babanturan manghasiakan bunyi.
5. Mainkan dengan tempo hinggo manjadi capek atau lambek.

Pamainan Katto-Katto alah banyak diadopsi sabagai sabuah ajang palombaan atau turnamen di babagai daerah, tarutamo di Pulau Sulawesi. Pamainan iko dijadian bahan palombaan pado acara pesta rakyat, parayoan hari gadang, bahkan di acara panikahan jo acara lainnyo. Jinih palombaan nan umum dipatandiangkan barupo durasi mamainkan Katto-Katto, kategori kalompok umua, free style, dengan teknik jo gaya nan ditantuan dek juri.

Efek positif

Prof. Hamdan Juhannis, MA, Ph.D. nan marupoan rektor Universitas Islam Negeri Alauddin Makassar maagia tanggapan manganai sisi positif dari viralnyo pamainan Katto-Katto atau Latto-Latto iko. Dalam tulisannyo nan alah tapublikasi di babagai media dengan judul "Latto-Latto Melawan Game Online", Hamdan mangutarokan bahwasanyo kahadiran Latto-Latto sacaro signifikan dapek mangurangi sasaurang pado katagantuangan mamegang HP main game online dan nonton baragam sajian di telepon genggam. Latto-Latto manjadi alaik komunikasi di antaro anak-anak. Mereka dapek mamainkan sacaro basamo-samo, saliang mampaliekan inovasi bunyi nan dikuasainyo. Babeda tantunyo dengan anak-anak nan bamain dengan HPnyo, salalu sibuk surang diri. Efek buruak nan ditimbulkan pado game online pado HP ko, mulai dari sikap asosial, pamahaman nan distortif tantang kahidupan nyato, sampai pado gangguan panglihatan.

Efek negatif

Indak saketek dari pamainan Katto-Katto manimbulkan efek negatif. Pamainan iko dapek maagia sisi buruak jo bahayo, tarutamo bagi panggunonyo jiko indak mahia mamainkannyo, akan mangalami kasalahan nan akan mangakibatkan cedera atau memar di sakujua pagalangan tangan. Babarapo kasus tatantu sarupo bola nan lapeh dari tali dan manganai wajah anak-anak nan mamainkan atau urang nan ado di dakeknyo. Suaranyo dapek manimbulkan kabisiangan apolai jiko dimainkan basamo-samo pado sabuah kalompok. Hal tasabuik kadang-kadang mambuek urang tuo lanjuik usia taganggu.

Pado 1970-an di Amerika Serikat, pamainan iko sempat dilarang untuak dimainkan dek pejabat sekolah New Bedford Amerika Serikat karano babahayo. Bahkan salah satu portal tanamo di Amerika Serikat manerbitkan tulisan tentang fenomena Clackers di kalangan anak Amerika Serikat. Pangguno takadang mambanting Clackers begitu kareh hinggo pacah, mambuek pacahan plastik batabangan, sarupo pacahan paluru ka sagalo arah. Katiko itu banyak set Clackers asli tabuek dari kaco temper duo inci, mambueknyo labiah rentan pacah, sahinggo baraliah ka plastik akrilik. Di Amerika Serikat, mainan iko dibaratian dek Food and Drug Administration (FDA) nan kiro-kiro samacam Badan POM (Pengawas Obat-obatan dan Makanan). Bahkan Departemen Sekolah New Bedford mangatuak palu untuak mambarantannyo.

Talibaik kontroversi politik di Mesir

Talapeh dari babagai hal menarik dari pamainan iko, sayangnyo untuak anak-anak nan mamainkan Clackers di Mesir sakitar tahun 2017 harus marasaoan campua tangan isu politik nan bahkan manyababkan palarangan. Hal iko bamulo katiko para warga satampek acok manyabuik pamainan tasabuik dengan "Sisi's balls" atau "Bolanya Sisi", kata iko mangacu pado buah zakar punyo Presiden Mesir katiko itu Abdel Fattah el-Sisi. Tantu sajo, begitu "Sisi's balls" manjadi populer, polisi mulai manangkok panjua dan manyita ribuan pasang mainan tasabuik hanyo untuak babarapo alasan aneh, yaitu mereka dianggap manyingguang pamarintah.

• Clackers dalam film judul Beware the Blob tahun 1972.
• Clackers adolah titik plot dalam episode "Love and Sausages" tahun 1993 dari serial TV The Kids in the Hall.
• Clackers digunoan sabagai senjata dek Joseph Joestar dalam serial manga JoJo's Bizarre Adventure tahun 1980-an.

•  
  Saurang anak-anak sadang bamain Katto-Katto di sakitar kolam aia mancua, Kota Amsterdam, 19 Agustus 1971
•  
  Saurang anak-anak sadang bamain Katto-Katto di sakitar kolam aia mancua, Kota Amsterdam, 19 Agustus 1971
•  
  Saurang anak-anak sadang bamain Katto-Katto di sakitar kolam aia mancua, Kota Amsterdam, 19 Agustus 1971
•  
  Saurang anak-anak sadang bamain Katto-Katto di sakitar kolam aia mancua, Kota Amsterdam, 19 Agustus 1971
•  
  Saurang wanita sadang bamain Katto-Katto di Kota Amsterdam, 20 Agustus 1971
•  
  Saurang wanita sadang bamain Katto-Katto di Kota Amsterdam, 20 Agustus 1971
•  
  Saurang wanita sadang bamain Katto-Katto di Kota Amsterdam, 20 Agustus 1971
•  
  Saurang wanita sadang bamain Katto-Katto di Kota Amsterdam, 20 Agustus 1971
•  
  Saurang wanita sadang bamain Katto-Katto di Kota Amsterdam, 20 Agustus 1971
•  
  Saurang wanita sadang bamain Katto-Katto di Kota Amsterdam, 20 Agustus 1971

• Templat:Internetquelle
•   Katto-Katto melekat pada jari manis di YouTube
•   Katto-Katto dengan ibu jari dan telunjuk di YouTube

Templat:Permainan-stub