Павлов, Василий Николаевич

Василий Павлов 1958 ийын вӱдшор тылзын 15-ше кечынже Марий АССР Шернур кундем Овдасола ялеш шочын. Кандаш классым Марисола школышто тунем пытарен.

Школыштак футбол денат сайын модын, хоккей площадкыштат чулым лийын, ече дене куржталмаштат ойыртемалтын. Йолташыже-влак ялысе да оласе профтехучилищыш каяш кумылаҥыныт. А Василийын кумылжым музыкант паша алгаштарен.

Газетыште республиканский культпросветучилищыш тунемаш налме нерген увертарымашым ужешат, Йошкар-Олашке толеш. 1975–1977 ийлаште тиде училищын оркестровый отделенийыштыже тунемеш. Вара кок ий армий радамыште служитла.

Армий гыч толмеке, Марисола тӱвыра пӧртыштӧ директорлан пашам ышта. Уш-акылым пойдараш манын, Марий кугыжаныш университетын историко-филологический факультетышкыже йодмашым пуа. 1986 ийыште дипломым налмек, ик жап калык усталык рÿдерыште пашам ышта, а 1987 ий гыч – Марий телевиденийыште. Ондак ассистент, вара режиссёр лиеш. Тиде профессий дене шинчымашым нӧлталаш Москваште эртарыме курсышкат коштын толын.

Икымше гана Вячеслав Абукаевын мутшылан Валерий Кульшетовын возымо «Сирень пеледме годым» мурым калык ончыко мураш лектын. Школыш коштмо годымак Василий гитарым шокташ тунемын. Университетыште тунемме жапыште самырык-влак коклаште гитарым шоктен мурымаш кумдан шарлен улмаш. Василият тыге ышташ тунемын. Йолташыже-влак – «Гитарым шоктен мурымет пеш сылнын йоҥгалтеш, тылат тидым радио дене шергылтараш кÿлеш», – маныныт. Василий тыгак ыштен. Радиокомитетыште тудым порын вашлийыныт. Ик мурыжым пленкыш возен, радио дене йоҥгалтареныт. Тудо чылалан келшен. Тулеч вара радиошко вес мурым, кумшым конден. Василийлан композитор-влак В. Захаров, С. Маков да молат шке у мурыштым радиошто возашлан темлаш тÿҥалыныт.

Василий Павлов илыш дене 2005 ий 27 августышто кастене чеверласыш. Чаманаш гына кодеш, пеш шуко фонограммыжым возен шуктен огыл...

• А лум лумеш.
• Воктекет омешем.
• Выжгыкта ош лум.
• Илыш.
• Канде шулдыр.
• Кузе мый тыйым йӧратем.
• Ломбо.
• Морко сем.
• Олмапу воктене.
• Палемыс.
• Серенада.
• Сирень.
• Теле касын.
• Титакан мый.
• Тый улат мыланем ныжыл йӱр.
• Тылат.
• Шочмо вер нерген муро.
• Шочмо мландына.
• Мужыр шӱшпык (Светлана Дмитриева дене пырля).

• Василий Павлов.