Leonardo da Vinci (Vinci, 15 'e abbrile 1452 – Amboise, 2 'e maggio 1519) è stato nu pittore, ngegnere e scienziato taliano.
Ommo 'e ngegno e talento aneverzale d'ô Rinascemiento taliano, rapprisentaje 'o spirito 'a ll'ebbreca soja, sperementanno 'e cchiù grandi fforme d'espressione dint''e cchiù vvarie campe 'e ll'arte e d'â canoscenza. Fuje pittore, disegnatore, scultore, architetto, ngegnere, scenografo, anatomista, alletterato, musecista, pruggettista e mmentore, ed è cunsiderato une d''e cchiù granne genie 'e tutt'e tiempe.
Leonardo jera 'o figliuolo 'e nu nutaio, Piero di Antonio, ca cercatte 'e dargle na bbona educazzione, mpure musecale. Int'ô 1469 trasette int'â puteca d'ô Verrocchio, a Sciorenza. Nzemmola 'a isso accumenciatte a ffà esperienza cummo pittore 'e pale 'e autare e quatre ncopp''a tavula, e cummo scurtore 'e avrunzo e marmularo. Int'ô 1472, steva ggià messo int''a Cumpagnia 'e San luca, na chiumma 'e pitture sciurentine, ma 'e rappuorte cu 'o Verrocchio fernettero sulamente int'ô 1476: int'ô Battesemo 'e Cristo (1475-1478), se penzaje verè 'a mano 'e Leonardo int''o paisaggio e ll'anghelo addenucchiato 'ncopp'o lato 'e smerza.
Int'ô 1478, aprette na puteca e avette 'mpurtante servizie. 'E monace 'e San Dunato a Scupeto (abbeceno â Sciurenza) 'o facettero pittà na Adorazione dei Magi (mmo cunservata int'â ll'Uffizzi), ca mperò accumenciaje ô 1481 sanza 'a fernì maje. Ll'ate fatece 'e guaglione 'e Leonardo songo nu ritratto 'e Ginevra Benci, n'Annunciazzione, 'a Maronna 'e Benois, 'a Maronna 'e Garofano e San Girolamo, pur'isso fernuto maje.
Int'ô 1482, Leonardo jette â faticà pe Ludovico o' Moro, 'o duca 'e Milano, aroppo ca je screvette na lettera pe trasì nt'â corte soia. Pigliaje na fateca 'e ngegnere d''e campagne meletare d'ô duca e disegnaje tante apparate p''e ffeste 'e celebrazzione. Ntramente, pigliaje amicizzia ch'o matemateco Luca Pacioli. Sempe â Milano facette tante pruggette 'e guerra, maje rializzate, sturianno 'o cuorpo 'e ll'anemale e d'ê cristiane e scrivenno.
Na d’’e ffatiche cchiù mpurtante d'ô periodo milanese è 'a primma verzione d'â Vergine d'ê Rrocce, a Femmena cu ll'arminio, 'o ritratto d'â dama (canosciuto mpure co 'o nomme La bella Ferronière) e 'o ritratto 'e nu museco. Leonardo, forze scuntente 'e chello c'aveva accumenciato, turnava spisso ncopp'ê ffateche soie. Int'ô 1495 e nfino ô 1497 fatecaje ncopp'â pittura 'e ll'Urdema cena, affriscata ncopp’’a nu muro d'o refettorio d’’o cunviento 'e Santa Maria dd'ê Grazie â Milano. Tuttavòta, 'e speremiente suoje ncopp'ê ttempere facettero sgarrupà 'a fateca ggià quacch'anno aroppo. Grazzie a nu 'mpurtante programma 'e restauro, int'ô 1977, na parte d'â pittura reggenale venette ricuperata, luanno â miezzo chello ca facettero e malecuonce restaure 'e primma. Songo addonce vvenute â luce 'e cculure brillante e 'e pennellate reggenale 'e Leonardo.
Int'ê tiempe milanese, Leonardo fatecaje mpure ncopp''a ati quatre, disegni e scenografie, sturianno 'a ngegnarìa e 'e pruggette pp'ô Duomo d'â cità. Ludovico 'o Moro 'o facette fà na statua equestre 'e avrunzo. 'A statua raffegurava 'o pate 'e Francesco Sforza, ma int'ô decembre 1499 'e Sforza venettero vuttate â fora â Milano p'ê ll'eserceto franzese e 'o avrunzo d'a statua venette pigliato ppe nce fà 'e cannune. Leonardo fujette primma ppe Mantova e Venezia, p'aroppo turnà ô 1500 a Sciorenza.
Int'ô 1502, commo ngegniere meletare, Leonardo trasette 'e servizzie 'e Cesare Borgia, duca 'e Romagnia e Ummbria. Int'à premmavera d'ô 1503, a Sciorenza, avette na commissione ppe ll'affrisco d'a Battaglia 'e Anghiari po' Salone dd'ê cincuciento int'o Palazzo Vecchio. Ll'opera nun venette maje fernuta, ma Leonardo ce facette nu cartone, ca venette sturiato p''e cchiù granne artiste nfin'ô Setteciento, quanno fuje ristrutto. Mmo se pò veré 'o prugietto p'e mmiezo dd'ê ccopie, e a cchiù famosa è chella ca facette Pieter Paul Rubens. 'O dipito heva essere miso azzeccato â n'affrisco 'e Michelangelo Buonarroti, 'a Battaglia 'e Cascina, ma nun venette fernuto maje manco chisto.
Int'ó siconno periodo sciurentino suio, Leonardo facette vvarie immaggene â devierze femmene, comm'a Monna Lisa, canusciuta ch'o nomme 'e Gioconda, p'o cognomme d''o marito, Franceso Bartolomeo d'ô Giocondo. Leonardo portaje cu isso granne interesse speciale ppe chisto ripinto, 'a Gioconda, purtandolo cu isso int’’a tutte 'e sfratti suoie.
'O grande artista tornaje a Milano into o' 1506, chiamato ra ô guvernature francese Charles d'Ambroise, e venette annominato pitture 'e corte d'ô rrè 'e Franza. Faticaje a opere 'e ngegnaria e a n'ato monumento equestre.
A Milano facette Sant'Anna, a Maronna, 'O criaturo e San Giuannino, ppe chisto heva fatto già nu cartone, e a secunna versione d'â Vergine d'ê rrocce.
Leonardo morette into 'o castiello e Cloux a Ambroise, int’’o 1519 aroppo nu longo periodo 'n Franza c'ô rrè Franceso I.
This article uses material from the Wikipedia Nnapulitano article Leonardo da Vinci, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Cuntenute suggiette a licienza 'e auso CC BY-SA 4.0 se nun fuje ritto atro. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Nnapulitano (DUHOCTRUNGQUOC.VN) is an independent company and has no affiliation with Wiki Foundation.