Корчемкина, Вероника Николаевна

Морко кундемын Ӱшӱттӱр ялеш шочын-кушкын, ӱдыр годсо фамилийже - Сидоркина. Изиж годым Вероника шукырак жапшым коваж пелен (ачажын аваже марий ӱдырамаш лийын) эртарен. Шке манмыжла, туддечак марла чын кутыраш, шомакын чевержым, нелытшым палаш тунемын. Кован каласкалыме ятыр йомакше ушеш лакемыныт да ӱдырым шонаш таратеныт. Аваже Киров кундем гыч толшо руш еш гыч лийын, но марий йылмым сайын пален.

Авам руш ӱдырамаш лийын гынат, марий йылмым пеш сайын пален. Тудо жапыште марий еш гыч лекше икшыве-влак руш йылмым сайын палыдымыштлан урокышто рушла каласкалымым тӱрыс умылен кертын огытыл. Авам, тудо туныктышылан ыштен, урокым ондак рушла вӱда. Вара уэш тидымак марла каласкален умылтара ыле.

Авам руш, садлан шукыжо рушла мурым муренам, почеламутым рушла возенам. Варарак марла возаш тӱҥальым. Тыге шочо мыйын икымше почеламутем да мурем - "Ачамлан". Почеламут почеш муро-влак шочаш тӱҥальыч…

Вероника Сидоркина 1983-1988 ийлаште Марий кугыжаныш пединститутын филологический факультетыштыже шинчымашым пога. Тунем лекмек, Морко школышко руш йылмым да литературым туныкташ кая. Тунамак "У муро" ансамбльышке кошташ тӱҥалеш. Творческий корныжо лач тиде ансамбль гыч тӱҥалеш. Марлан лекмек, пелашыже Вячеслав Андреевич Корчемкин дене У Торъял кундемыш илаш куснат. Ныл ийым Масканур школышто ыштымеке, пелашыжын шочмо поселкыш, У Торъялыш, куснат. Коктынат школышто туныкташ тӱҥалыт: Вероника Николаевна - марий йылмым, Вячеслав Андреевич - физикым да информатикым.

• Корчемкинмыт ешын сайтше

• Вячеслав Корчемкин