Васильева, Анна Георгиевна

Анна Васильева 1952 ийын ӱярня тылзын 7-ше кечынже Марий АССР Юлсер-Олаш служащий ешеш шочын. 1969 ийыште 6 №-ан кыдалаш школым пытарымек, Н.К. Крупская лӱмеш МГПИ-н историко-филологический факультетышкыже пурен. 1973 ийыште Юлсер-Оласе интернат-школышто руш йылмым да литературым туныктышылан пашам ышташ тӱҥалын, вара 7-ше №-ан школыш куснен. 1980 ий гыч 1-ше №-ан школышто ыштен.

Поэт семын йол ӱмбак шогалашыже А. Васильевалан А. Ахматован творчествыже да япон классик поэзий дене палыме лиймыже полшен. Пединститутышто студентке улмыж годым антик литературым туныктышо, литератур кружокым вуйлатыше Соломон Ройтман тудын тӱҥалтыш усталык пашаже-влаклан кумылаҥдыме мутым ойлен. Студенткын почеламутшо-влак дене палыме лиймек, тудо манын:

18 ий деч вара возымым от кудалте гын, ӱмырет мучко возаш тӱҥалат.

А. Васильева тыгак поэт В. Панов дене вашлиймым кӱлешанлан шотла. Лач тудын темлымыж дене 1984 ийыште «Молодой коммунист» газетыште поэтессын «Прислушиваюсь к шороху дверей» икымше почеламутшо савыкталтын. 1985 гыч 1996 ий марте А. Васильева «Сылнымут шыже» семинар-каҥашлаште лиеден.

2008 ий марте кок поэзий книгам луктын. Почеламутшо-влак «Радуга над Волжском», «Зелёная лампа» тӱшка сборниклаште, «Ончыко» журналыште савыкталтыныт. Рушлашке А. Богдановын «Крылатый хор» почеламут книгажым кусарен.

А. Васильева Волжскысо «Зелёная лампа» сылнымут ушемын чулым еҥже. Школышто «Литературное творчество» кружокым вӱден.

А. Васильеван поэзий йӱкшӧ ий гыч ийыш пеҥгыдем толын. Тудын лирический героиньыже эртак чыным кычалмаш корнышто.

Туныктымо пашаште суапшылан I категориян туныктышо А. Васильева «РФ тӱшка образованийын почётан пашаеҥже» знак дене (2000), Юлсер-Ола оласе администрацийын да туныктымаш пӧлкан чап грамотышт дене палемдалтын. 2007 ийыште Россий писатель ушемыш пуртымо.

• Стихи // Радуга над Волжском. Волжск, 2000. С. 32—36.
• Меню на любителя : стихи. Йошкар-Ола. 2002. 40 с.
• Безымянные дороги : стихи. Волжск. 2004. 52 с.
• Стихи // Зеленая лампа. Йошкар-Ола, 2006. С. 26—45.

• Йӧратымаш : почеламут/ пер. Э. Анисимова // Ончыко. 2003. № 9. С. 132.

• Богданов А. Крылатый хор: стихи / пер. с мар. // Йошкар-Ола. 2005. 24 с.

• Калинкин Г. С музою в союзе // Городская газета. 1998. 20 марта.
• Калинкин Г. Вся жизнь — поэзия и дети... // Волжская правда. 1998. 5 окт.
• Климов А. Секретарская дочка // Волжская правда. 2005. 3 марта.
• Марышев В. С благословления муз — в Союз // Мар. правда. 2006. 7 марта.

• Россий Федераций общий образованийын Почётан пашаеҥже оҥ тамга (2000).
• Юлсер-Ола оласе администрацийын да туныктымаш пӧлкан Чапкагазше (2000).
• Россий Серызе-влак ушемын йыжъеҥже (2007).

• Писатели Марий Эл: биобиблиографический справочник / сост.: А.Васинкин, В.Абукаев и др. — Йошкар-Ола: Марийское книжное издательство, 2008. — 752 с. С. 134-135.