Беляев, Александр Иванович
Александр Беляев (Александр Иванович Беляев) (1955 теле 15, РСФСР, Марий АССР, Шернур кундем, Тамшэҥер ял) – марий мурызо, опер артист, Марий Эл Республикын сулло артистше.
| Александр Иванович Беляев | |
|---|---|
| Александр Беляев | |
| Шочмаш дене лӱм | Александр Иванович Беляев |
| Шочын | 1955 ий 15 теле (68 ий) |
| Шочмо вер | РСФСР, Марий АССР, Шернур кундем, Тамшэҥер ял |
| Чап пӧлек да премий | |
Илыш корныжо
Александр Беляев 1955 ийын теле тылзын 15-ше кечынже Марий АССР Шернур кундем Тамшэҥер ялеш шочын. Торешкӱвар тӱҥалтыш школ деч вара Лажъялыште тунемын, 10 классым Параньга кундемысе Кугу Пумарийыште пытарен. Школышто тунемме жапыште йолташыж-влак коклаште моткоч чолга рвезе лийын.
Тувыра паша деке лишеммаш
Эре художественный самодеятельностьышто шуаралтын, сылнын сўретлашат усталыкым поген шуктен. Кыдалаш школым тунем пытарыме деч вара армийыште служитла, 1974–1976 ийлаште Чехословакийыште лиеш. Армий гыч толмеке, музыкальный училищыш мураш тунемаш пура. Тушто республик мучко кумдан палыме педагог Ф.Е. Олейникован классыштыже тунемеш. Училище деч вара кок ий музыкальный театрын хорыштыжо мура. 1984–1989 ийлаште шке шинчымашыжым Озаҥ консерваторийыште нӧлта.
Тӱвыра аланыште тыршымаш
Александр Беляев бас йӱкан. Кӧ театрыш коштеш, тудо пала: тыгай йӱканже мемнан театрыште кокыт веле – Александр Беляев да Владимир Александров. А чылт мэрий еҥ кокла гыч тымарте – шкетын гына. Мурызын ойлымыж гыч тыге лектеш: тудын ачажат нугыдо да кӱжгӱ йӱкан лийын. Очыни, тиде йӱкшӧ эргыж дек ачаж дечак куснен. Изинек мураш йӧратен, школысо концертлаштат шуко гана мурен. Марий театрыш толмекыже, Александр Беляев «Дорогая Памела» опереттыште врач рольым модын. Тиде рольышто тудлан негр лияш пернен, сандене сценышке эртак шӱргым грим дене шемемден лектын. Турлӧ чиям кучылтман огыл, садлан ик шем гримым шӱрен да йӧрен. Тиде сомылым мый шкетынак ыштылынам, манеш мурызо. Вара «Евгений Онегин», «Кармен» оперыштат мураш ӱшаненыт. Элина Архипован «Алдиар» оперыштыже марий карт Памын рольжым модеш. Дж.Вердин "Риголетто» оперыштыжат мура. Александр Беляев оперлаште мурымо дене гына огеш серлаге, турлӧ концертлаштат участвоватла. Тудын репертуарыштыже руш муро-влак улыт, но марий семлызе-влакын мурыштым утларак пагала манашат лиеш. Эрик Сапаевын, Алексей Искандаровын, Иван Егоровын, Юрий Евдокимовын, Вениамин Захаровын возымо муро-влакым куанен, кумыл нӧлтын мура. Оперыште мураш келша гынат, марий композитор-влакын мурыштым ончыл верышке шында. Нуным шочмо калыклан пӧлеклаш уло мастарлыкшым да вийжым пуаш тырша.
Еш
Александр Беляев ешан. Пелашыж дене коктын ик ӱдырым ончен куштат.
Чап
Кылвер-влак
This article uses material from the Wikipedia Олык Марий (Olyk Marij) article Беляев, Александр Иванович, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Контентым CC BY-SA 4.0 лицензий почеш кучылт кертыда (весым возымо огыл гын). Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Олык Марий (Olyk Marij) (DUHOCTRUNGQUOC.VN) is an independent company and has no affiliation with Wiki Foundation.