東京都: 日本一級行政區及中央政府所在地

東京都（粵拼：dung1 ging1 dou1；日文：東京都とうきょうと^{(Tōkyō to)}）係日本本州關東地方嘅一個政區，係日本事實上嘅首都。喺1943年設立，當中包括咗東京都23區、多摩地區（26市3町1村）、伊豆群島同埋小笠原群島。都廳所在地係新宿區。

東京都分成東京都區部（或者叫23區）、多摩地區（26市3町1村）同島嶼部（2町7村）。主要係喺關東西南部嘅東西幼長嘅地域，東臨東京灣，西部係關東山地。

唔單只行政、立法等機關集中喺度，呢度亦都係日本甚至東亞經濟、傳媒、學術、交通等等嘅重心所在。人口大約有1403萬（2022年），係日本人口最多而且人口密度最高嘅嘅都道府縣。

東京同周圍七個縣組成首都圈。其中包含東京都、神奈川縣、千葉縣、埼玉縣嘅東京大都市圈總人口有大概三千五百萬人口，佔全日本大概三成人口，係世界上最多人口嘅都市圈。

舊陣時被稱之為「江戶」，明治時代開始變成日本嘅重心。1943年7月1號，東京重新劃分，東京府同埋東京市合併做東京都，東京都今日嘅範圍自此定咗落嚟。1947年，東京都正式誕生。包括23個特別區、26個市、1個郡、5個支廳、8個町、5個村。

23個特別區如下：

26個市如下：

1個郡、5個支廳、8個町、5個村，如下：

東京都氣候屬副熱帶濕潤氣候。東京都喺夏季受太平洋高氣壓影響，氣候高溫潮濕；冬季受西伯利亞高氣壓溢出嘅西北季風影響，氣候少雨乾燥。東京都大多數降水分佈喺梅雨同秋季嘅颱風時期。春季同秋季受到低氣壓同高氣壓交替通過日本上空嘅影響，每隔幾日有變化。

鐵路

東京都嘅鐵路站多過650座，係所有都道府縣入面最多嘅，同面積最大嘅北海道相比，東京都嘅鐵路站多過佢100個以上。東京嘅鐵路基建喺全世界都係首屈一指嘅。

東京都區部有JR東日本（東日本旅客鐵路）嘅環狀山手線，呢條線連結東京站、上野站、池袋站、新宿站、品川站等等重要嘅鐵路樞紐。山手線東側同京濱東北線、橫須賀・總武快速線同上野東京線（東海道線・宇都宮線・高崎線・常磐線）並行，而西側就同崎京線同湘南新宿線並行。山手線嘅內側有中央線快速、中央・總武緩行線之外，仲有東京地下鐵同都營地下鐵13條多個方向嘅地鐵路線共同組成縱橫交錯嘅鐵路網絡。部分地鐵路線同其他鐵路線相互直通運行，有直通列車服務埋多摩地區以及埼玉縣、千葉縣同神奈川縣。

全世界最多乘客使用嘅嘅車站係喺都心西部（新宿副都心）嘅新宿站，除咗中央線之外仲有京王線同小田急小田原線連接多摩地區。東京站係東海道新幹線同東北新幹線嘅總站，亦有山手線同其他路線嘅站，所以亦都係東京嘅中央車站。

除咗東京地下鐵大部分路線網都喺區部入面，小田急電鐵、京王電鐵、京急電鐵、京成電鐵、西武鐵道、東急電鐵、東武鐵道等等大手私鐵嘅路線都有進入到區部並且多數主要路線都同山手線接駁。另外東武依勢崎線雖然有超過100公里嘅長途路線，不過就冇接駁到山手線，為咗確保便利性，喺1962年佢同地下鐵日比谷線喺北千住站開始互相直通運行。北千住站係山手線以外嘅區部最多乘客使用嘅車站，有五條路線喺呢度設站。大手私鐵之中唯一喺東京都內冇自社路線嘅相模鐵道喺2019年開業嘅相鐵・JR直通線可以直通到新宿站。另外，喺首都圈開業嘅第三部門鐵道筑波快綫去到秋葉原站，係屬於放射鐵路網嘅其中一條路線。