Wyoming

Su Wyoming (/waɪˈoʊmɪŋ/) est unu istadu federadu de sos Istados Unidos de Amèrica chi s'agatat in sa regione de sos montes, in s'Ovest de sa natzione. Sa capitale e prus manna tzitade est Cheyenne.

Su nòmene de Wyoming benit de unu faeddu in limba Munsee, xwé:wamənk, chi cheret nàrrere a su frùmene mannu e alladiadu.

Allàcanat in su Nord cun su Montana, in s'Est cun Dakota de Sud e Nebraska, in su Sud cun su Colorado, in su Sud-Ovest cun su Utah, in s'Ovest cun su Idaho.

Est su de 10 istados prus istèrridos e su segundu prus pagu populadu de sa federatzione.

Sas duas partes otzidentales de tres de su Wyoming sunt cumpostas mascamente de montes, in sa parte orientale s'agatant imbetzes praterias de campeda, chi pigant nòmene de High Plains (campuras in artària).

Su 10 de nadale 1869 su Wyoming, chi tando fiat galu Territòriu e no istadu, est istadu su primu logu in sos USA a dare deretu de votu a sas fèminas. Su wyoming est istadu fintzas su primu a ddas ammìtere in polìtica, in sas giurias de tribunales, su primu a nde tènnere a giuighes de paghe, e su primu, in su 1924 a elèghere guvernadore fèmina.

Fiat su de 44 istados a intrare in s'Unione su 10 de trìulas 1890.

Su nomìngiu de su Wyoming, chi no ispantat bida s'istòria, est "The Equality State" (S'Istadu de sa Paridade).