Protestantissem

Questa pagina è scritta en puter.

Ils aderents dal protestantissem sun ils protestants. Quist pled vain druvo in Svizra ed i'l territori rumauntsch sinonimamaing cun refurmos, pü d'inrer cun evangelics.

La noziun protestants deriva da la protestaziun da Speyer a Speyer in Germania in occasiun da la dieta imperiela dal 1529. Quella vouta protestaivan ils stedis evangelics cunter il schogliamaint da lur drets tres l'imperatur tudas-ch zieva ch'üna tscherta liberted in reguard a la tscherna da la confessiun i'ls pajais singuls vaiva valieu daspö trais ans. Medemmamaing daivan els perdütta da lur cretta.

Il protestantissem es caracteriso da la manchaunza d'ün cunfin traunter preirs e laics. Mincha battagio es immediat vers Dieu. La grazcha da Dieu operescha tuot, l'umaun nu so güder tal salvamaint. La cretta as fixa vi da las impromischiuns dal Segner dinuonder ch'ella artschaiva la tschertezza da salvamaint.

A nun es üngüna oneraziun da senchs straordinaris, bgeraunz sto Gesu Crist i'l center sulettamaing ed in möd exclusiv.

A's disferenzescha varquauntas lingias dal protestantissem chi as separaivan già i'l temp da la refuorma: l'ela dretta vain furmeda da las baselgias luteranas e refurmadas, l'ela schnestra dals battageders.

Ün fenomen dal temp modern es la creschentscha svelta da baselgias da Tschinquaisma impustüt in America latina, in Africa ed in parts dad Asia.

• Friedrich Wilhelm Graf: Der Protestantismus. Geschichte und Gegenwart (= Il protestantissem. Istorgia e temp preschaint). Beck, München 2006, ISBN 978-3-406-46708-0.
• Ernst Troeltsch: Die Bedeutung des Protestantismus für die Entstehung der modernen Welt (= L'importanza dal protestantissem pel svilup dal muond modern). Schutterwald, Baden 1997, ISBN 978-3-928640-28-2.