Unner den Naam vun Protestantismus sund an un for sik de verschedenen Karken un jem ehre Anhängers tohopenfaat, de dör de Reformatschoon in dat 16.
Johrhunnert">16. Johrhunnert tostanne kamen sünd. Dor höört de Luthersche Karken, de Reformeerten Karken, de Unieerten Karken un de Dööpers to.
Man, mehr allgemeen, weert dor ok de Karken un Sekten torekent, de desülvigen Grundsätz vertreden doot, as de Karken vun de Reformatschoon un de sik vun de Röömsch-kathoolsche Kark afscheedt hefft, as de Anglikaansche Kark. Ok de evangeelschen Freekarken weert to den Protestantismus torekent un seht sik sülms as „Arven vun de Reformatschoon“ an.
De protestantschen Karken vun de verschedenen Bundslänner hefft sik in Düütschland tohopenslaten in de EKD. In de Nedderlannen gifft dat vun dat Johr 2004 af an de Protestantsche Kark in de Nedderlannen (PKN).
De Naam Protestanten hett to kriegen mit de Protestatschoon vun Speyer. Up den Rieksdag to Speyer 1529 hefft de Evangeelschen Stänn protesteert gegen den Besluss, dat de Afscheed vun Speyer upböört wurrn is. In düssen Afscheed weer de Länner, de sik de Reformatschoon to egen maakt harrn, toseggt wurrn, se schollen tofreden laten weern. De Protestanten hefft sik 1529 bi ehren Protest beropen up de Glovensfreeheit vun jedeen Minschen.
Eerst mit den Augsborger Religionsfreden vun 1555 hett dat Hillge Röömsche Riek de lutherschen Karken gellen laten un dat duer denn noch bit to'n Enne vun'n Dartigjöhrigen Krieg 1648, bit ok de reformeerte Karken in dat Riek gellen laten wurrn is.
Hüdigendags meent de Wöör Protestantsch un Evangeelsch in de düütsche (un plattdüütsche) Umgangssprake datsülvige.
This article uses material from the Wikipedia Plattdüütsch article Protestantismus, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Der Inhalt ist verfügbar unter CC BY-SA 4.0, sofern nicht anders angegeben. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Plattdüütsch (DUHOCTRUNGQUOC.VN) is an independent company and has no affiliation with Wiki Foundation.