Il Pape a l'è il vescul di Rome e la pui alte carghe religjôse da Glesie Catoliche. Al pos iessi clamât ancje cui titui di "Pâri sant", "Sô santitât" opur dome cun "Santitât".
Seont il dirit canonic a l'è il "Sorestant dal consei dai vescui, il vicjari di Crist e Pastôr da Glesie universâl; duncje a l'à il podei ordenari massim, plen, imediât e universâl da Glesie, podei cal pòs simpri doprâ in maniere libare" e, dopo dai Pats di Lateran, ancje il sovran assolût dal "Stât da Citât dal Vatican".
A l'è elet di une assemblee di cardinâi, ca sielgin di un tra di lôr cui fâ diventâ Pape .
La sô particolâr impuartance ta Glesie Catoliche a esist parcè ch'al è considerât il sucessôr di San Piêri che, seont la tradizion cristiane, Crist a i à dât il compit di guidâ la Glesie e par chest, San Pieri al varès, in efiets, diret la comunitât cristiane di Rome, diventant il prin vescul e murint achì.
Il pape atuâl al è Pape Francesc (Jorge Mario Bergoglio), diventât, cul 13 di març dal 2013, il 266esin pape ta storie da Gleisie.
Pape, a è une traduzion da peraule taliane "Papa". Cheste, però, no si è inmò dal dut sigûrs di dulà cal vegni; las dôs posibilitâs pui probabiles a son: cal derivi dal aramaic "אבא" (abbà, pâri), ca l'ere cemût che las primes comunitâs di cristians a clamavin i lôr vescui, e dato che chescj a clamavin i lôr patriarcjis ta stesse maniere, cul pasâ dal timp la int a à tacât a dâ l'apelatîf baba (βαβα) o papa (παπα) al Patriarcjie di Alessandrie e, a la fin, a chel di Rome o cal derivi di πάπ(π)ας (pap(p)as), ca l'ere un mût dropât tas famees par dî "pâri", e che comunque al sêti pasât tal inprin par chel di Alessandrie e dopo par chel di Rome. A samein mancul credibiles, invesit, las etimologjies ca viodin "Papa" come acronimos di "Petri Apostoli Potestatem Accipiens" (chel cal cjape il podei dal apuestul Pieri) o di "Pater Patrum" (pâri dai parîs)
Pape, però, a nol'è dome il vescul di Rome, ma al'è doprât ancjimò ancje pal Patriarcjie di Alessandrie dai Coptis e par chel grêc-ortodos.
Il pape, come ca si scriveve al inizi, a è la pui alte carghe religjôse ta Glesie Catoliche e par chest a l'à autoritât su la Diocesi di Rome e "Su dutes las Glesies in particolâr e su ducj i lôr ragrupaments".
In ta Glesie ortodosse, al pape (come vescul di Rome) no l'è dât un particolâr podei di decidi o di "comandâ", ma dome pui onôr e impuartance di chei atrîs.
In ta Glesie protestante, invesit, a no i dan nissune particolâr impuartance, parce ca no lu ritegnin conformi a las Scritures
This article uses material from the Wikipedia Furlan article Pape, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Il contignût al è disponibil sot de licence CC BY-SA 4.0 se nol è specificât in altre maniere Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Furlan (DUHOCTRUNGQUOC.VN) is an independent company and has no affiliation with Wiki Foundation.