Fiteny Malagasy Ôfisialy

Tsy misy lalàna manery mandrakariva ny hampiasan' ny sampan-draharaham-panjakana (ny rantsamangaika ao amin' ny governemanta, ny fitsarana, ny boky firaketana ny raharaham-panjakana, sns) ny fiteny malagasy ôfisialy fa miankina amin' ny mety ho filan' ny vahoaka izany. Ny mpanoratra sy ny mpampianatra koa dia tena mpampiasa ny teny malagasy ôfisialy, ary ny ankamaroan' ny boky natonta hatramin' izay dia amin' ny teny malagasy ôfisialy.

Tsy misy lalàna mamaritra ny tokony ho endriky ny fiteny malagasy ôfisialy nefa fantatra fotsiny fa mifototra amin' ny fiteny merina (na eo amin' ny voambolana na eo amin' ny fitsipiteny) izay efa nampiasain' ny Fanjakana Merina sy ny fivavahana kristiana teto Madagasikara tamin' io vanimpotoana io ary notohizan' ny mpanjana-tany frantsay sady namporisihin' ny fitondram-panjakana malagasy taty aoriana, indrindra tamin' ilay atao hoe fanagasiana, ka hatramin' izao.

Raha vao miresaka ny amin' ny hoe "teny malagasy" manoloana ny fiteny hafa dia ny teny malagasy ôfisialy no tonga ao antsaina voalohany ary io no anomezana ohatra izay heverina fa mahasolo tena ny endriky ny fiteny malagasy isam-paritra amin' ny ankapobeny, na dia tsy marina mandrakariva izany. Tsy azo lazaina ho endrika manambatra ny fitenim-paritra malagasy rehetra koa izy io satria ny tetikasa saika hirosoana amin' izany dia foana ho azy teny, tsy inona izany fa ilay atao hoe fiteny malagasy iombonana.

Marihina fa tsy ny fiteny malagasy irery no ôfisialy eto Madagasikara fa ao koa ny fiteny frantsay izay voalaza ao amin' ny lalàm-panorenanaha. Nisy koa fotoana naha ôfisialy ny fiteny anglisy teto Madagasikara (taona 2007-2010).

• Fiteny malagasy iombonana

• Fitenim-paritra malagasy
• Fiteny ôfisialy
• Fitenim-pirenena
• Fanagasiana
• Fiteny eto Madagasikara