Tendrombohitra Hôreba

Lazaina hoe "Tendrombohitr'Andriamanitra" koa io toerana io ao amin'ny Bokin'ny Eksôdosy sy ny Boky voalohan'ny Mpanjaka. Teo koa no voalaza fa toerana nihaonan'ny mpaminany Elia tamin' Andriamanitra.

Ny anaran'ilay tendrombohitra

Ao amin'ny Baiboly

Ny teny hoe Horeba dia fanagasiana ao amin'ny Baiboly amin'ny teny malagasy ny anarana hoe χωρηβ / Khorêb ao amin'ny Baiboly jiosy amin'ny teny grika atao hoe Septoajinta na Septanta na ny hoe חֹרֵב amin'ny teny hebreo.

Fiforonan-teny

Misy ny mihevitra fa midika hoe "midorehitra" na "hafanana" izay mety mampahatsiahy ny Masoandro, fa ny hoe Sinay kosa dia mety avy amin'ny anarana hoe Sin, andriamanitra Volana nivavahan'ny Someriana , ka noho izany ny hoe Sinay sy Horeba dia mety ho ny tendrombohitry ny Volana sy ny Masoandro.

Hôreba sa Sinay ?

Ny soratra sasany ao amin'ny Baiboly dia mitantara ireo zava-nitranga ireo tao amin'ny Tendrombohitra Sinay (na Sinaia), ka na dia heverina ho anaran-toerana iray ihany ny hoe Horeba sy Sinay dia misy ny mihevitra fa toerana roa samy hafa ireo. Araka ny petra-kevitra ara-tahirin-kevitra dia vokatry ny tsy maha mpanoratra ny Pentateoka an'i Mosesy no nahatonga io tsy fitoviana io.

Ny fandinihana nataon'ireo mpikaroka dia milaza fa olona efatra samy hafa no nanoratra ny Pentateoka: ny roa mampiasa hatranihatrany ny anarana hoe Sinay fa ny ny roa hafa mampiasa ny hoe Hôreba, dia ireo atao hoe Elôhista sy Deoterônômista.

I Hôreba ao amin'ny Baiboly

Isan'ny andalana itrangan'ny anarana hoe Hôreba ao amin'ny Baiboly ireto tanisaina manaraka ireto:

Ao amin'ny Bokin'ny Eksodosy

Eks. 3.1: I Mosesy sy ilay roimemy mirehitra.
Eks. 17.6: Nikapoka ilay harambato teo amin'ny Tendrombohitra Hôreba i Mosesy mba hampifantsintsitra ny loharano raha nangetaheta nila rano ny Zanak'i Israely.
Eks. 33.6: Teo amin'i Hôreba no nanesoran'ny Zanak'i Israely ny firavaka teny aminy noho ny alahelony vokatry ny fahatezeran'Andriamanitra amin'izy ireo.

Ao amin'ny Bokin'ny Deoteronomia

Deo. 1.2; 1.6; 1.19: Ny anarana hoe Hôreba no ampiasaina hilazana ny fivezivezen'ny Zanak'i Israely tao amin'ny tany efitra.
Deo. 4.10; 5.2; 9.8; 18.16; 28.69: Teo amin'ny Tendrombohitra Hôreba no nadraisan'i Mosesy ny Didy Folo avy amin'Andriamanitra.

Ao amin'ny Boky voalohan'ny Mpanjaka

1Mpanj. 19. 8: Teo amin'ny Tendrombohitra Hôreba no nihaonan'i Elia tamin' Andriamanitra.

Jereo koa:

Loharano sy fanamarihana

This article uses material from the Wikipedia Malagasy article Tendrombohitra Hôreba, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Mitondra ny lisansa CC BY-SA 4.0 ny votoatiny raha tsy misy zava-kafa ambara. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Malagasy (DUHOCTRUNGQUOC.VN) is an independent company and has no affiliation with Wiki Foundation.