Ny fiteny tseky dia anisan' ny fiteny slava andrefana, miaraka amin' ny fiteny kasoba, ny fiteny pôlôney, ny fiteny slôvaka, ny fiteny sôraba, izay sampan' ny fianakaviam-piteny indô-eorôpeana.
Tenenina indrindra ao Tsekia io fiteny io, izay tenenin' ny olona miisa 11 tapitrisa any ho any. Atao hoe čeština io fiteny io amin' ny fiteny tseky.
Ny fiteny tseky dia manakaiky ny fiteny slôvaka sy ny fiteny pôlôney ary ny fiteny rotena (na roteniana). Ny ankamaroan' ny olon-dehibe tseky sy slôvaka dia afaka mifankahazo fiteny. Izy ireo mantsy, tamin' ny andron' i Tsekôslôvakia, dia nifanerasera lalandava amin' ireo fiteny roa ireo tamin' ny alalan' ny fampielezam-peo sy ny fahitalavi-pirenena. Ny sekoly koa dia nanolotra angano ho an' ny ankizy amin' ny fiteny faharoa mba hanazarana azy. Samy niteny amin' ny fiteny roa ny olona tsirairay ary tsy nifarana izany raha tsy tamin' ny fivakisan' i Tsekôslôvakia tamin' ny Janoary 1993 ka namorona an' i Tsekia sy i Slôvakia. Ankehitriny, ny Tseky sy ny Slôvaka dia mbola manana fandaharana am-pahitalavitra iraisana. Na dia izany aza, ny ankizy sy ny tanora izay tsy mahalala ny fotoanandron' i Tsekôslôvakia dia sahirana amin' ny fahazoana rehefa mampiasa teny sasany tena hafa, na rehefa mihaino fitenenana haingana.
Noho ny hasaro-drafitry ny fiteny tseky dia heverina ho sarotra ny mianatra azy. Izany hasaro-drafitra izany dia vokatry ny endri-pandrafetan-teniny sy ny rafi-pifehezanteniny. Toy ny fiteny slava rehetra (afa-tsy ny fiteny bolgariana vaovao sy ny fiteny makedôniana vaovao), ny teny (anarana, mpisolo tena, mpamaritra) dia miova endrika arakaraka ny anjara asa sahaniny ao amin' ny fehezanteny. Amin' io lafiny io, ny fitsipiteny tseky sy slava dia akaiky kokoa ny fiaviana indô-eorôpeana raha ampitahaina amin' ny fiteny indô-eorôpeana hafa, izay nanjary nihavitsy ny fiovan' endrika araka anjara asa (toy izay mitranga amin' ny fiteny alemàna), na nanjavona mihitsy aza (toy izay miseo amin' ny fiteny frantsay).
This article uses material from the Wikipedia Malagasy article Fiteny tseky, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Mitondra ny lisansa CC BY-SA 4.0 ny votoatiny raha tsy misy zava-kafa ambara. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Malagasy (DUHOCTRUNGQUOC.VN) is an independent company and has no affiliation with Wiki Foundation.