Sikidy Asorotà

Misy vaniny efatra toy ny tsanganan-tsikidy malagasy rehetra ny Asorotany, misy "lohany" sy "tratrany" sy "vaniany" ary "tongony".

Ny Asorotany dia mety hiseho ao amin'ny iray amin'ireo sora-tsikidy enina ambin'ny folo toy ny Tareky (1 1 1 1), ny Jama na Asombola (2 2 2 2), ny Asorasady (2 2 1 1), ny Alahasady (1 1 2 2), ny Alitsimay (2 1 1 2), sns.

Aorian'ny fahazoana ny tsanganana Lalana no ahazoana ny tsanganana Asorotany: Tsy manao tokom-boan-tsikidy intsony ny mpisikidy fa manambatra ny isam-boan-tsikidy ao amin'ny soratry ny Fahatelo sy ny an'ny Bilady, ka ny fitambaran'ny lohan'ireo tsanganan-tsikidy roa ireo no lohany, ny fitambaran'ny tratran'ireo tsanganan-tsikidy roa ireo no tratrany, ny fitambaran'ny vanian'ireo tsanganan-tsikidy roa ireo no vaniany, ary ny fitambaran'ny tongotr'ireo tsanganan-tsikidy roa ireo no tongony.

Apetraka somary ankavia kokoa eo ambanin'ny fàfana misy ny renin-tsikidy, eo ankavanan'ny Lalana, ny Asorotany nefa atao mielanelana izy ireo mba hanatsofohana ny tsanganana Tovolahy (faha-14). Ny fampifanampiana ny isan'ny voan-tsikidy mifanandrify ao amin'ny soratry ny Asorotà sy Lalana no ahazoana ny tsanganana Tovolahy (faha-14).

Ny Asorotà dia manondro ny fanahin'ireo havana efa maty na razana.

Tsanganan-tsikidy

Tale, Maly, Fahatelo, Bilady, Fianahana, Abily, Alisay, Fahavalo, Fahasivy, Ombiasa, Haja, Zanahary (na Haky), Asorotà, Tovolahy (na Saily), Lalana, Trano (na Kiba).