I Andrea dia iray amin' ny apôstôly, Jiosy galileana sady rahalahin' i Petera (na Piera) izy.
Mpianatr' i Joany mpanao batisa izy taloha. Atao hoe Prôtôkleto ("Ilay Nantsoina Voalohany") koa izy satria nanaraka an' i Jesoa (na Jesosy) raha vantany vao vita batisa (na batemy) ity farany.
Ny hoe Andrea dia fanagasiana ny anarana amin' ny teny grika hoe Ἀνδρέας / Andreas. Andreas ihany koa no fiantsoana azy amin' ny teny latina. Andrew amin' ny teny anglisy fa André kosa amin' ny teny frantsay.
Araka ny voalaza ao amin' ny Baiboly dia teraka tao Betsaida tao Galilea (na Galilia) tao amoron' ny farihy Tiberiasy (na Tiberiada) i Andrea. Mpanjono tahaka an' i Simôna Petera rahalahiny izy. Tamin' ny voalohany dia mpianatr' i Joany Batista izy nefa rehefa nasehon' i Joany mpanao batisa fa i Jesoa no "ilay Zanakondrin' Andriamanitra izay hitondra ny fahotan' izao tontolo izao" (Joa. 1.29-40), dia nanaraka an' i Jesoa izy ka tsy nisaraka taminy intsony. Izy no mpianatra voalohany notaomin' i Jesoa hanaraka azy.
Mpanelanelana an' i Jesoa tamin' ny olon-kafa no tena ahafantarana an' i Andrea. Izy no naneho an' i Simôna rahalahiny tamin' i Jesoa. Tamin' ny nampitomboana isa ny mofo sy ny hazandrano dia izy no nitondra ilay zazalahy nanana mofo dimy sy hazandrano roa teo amin' i Jesoa. Tamin' ny fotoana te-hifanatrehan' ny Grika amin' i Jesoa dia tamin' i Andrea no nitenan' izy ireo an' izany.
This article uses material from the Wikipedia Malagasy article Andrea (apôstôly), which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Mitondra ny lisansa CC BY-SA 4.0 ny votoatiny raha tsy misy zava-kafa ambara. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Malagasy (DUHOCTRUNGQUOC.VN) is an independent company and has no affiliation with Wiki Foundation.