Ярмакне илякс Ярмакт (кунардонь мокшень урт) — башка товар, конань вельде мольфтеви семботь ункстамац, марстонь эквивалент, коса няфтеви лия товархнень питнесна.
Кунардонь пингть ярмак вастс мольсть питни кеднятне, меле появасть кшнинь ярмакне — серень, сиянь ди зрнянь.
Ульсь пинге, мзярда мокшэрзятнень ширеса ярмаконь вастс мольсть уронь кеднятне. Кшнинь ярмакне появасть X сядокизот. Эста питнень пандомакс ульсь дирхемсь, кшнинь ярмакне ди кармасть тяфта лемневома. Ярмак валсь моли тюркскяй кяльста, сон шарьхкодема кода полафневи, керсеви. Тя валсь мокшетнень и эрзятнень кяльс ётась волжскяй булгархнень эзда. Содаф, ярмаконь лувкссь ладяфоль ни эста, мзярда Равать — Камать ёткса монголхне нинге ашельхть.
Васенце и омбоце тёжянь кизотнень ёткста мордвась лама торгавась арабонь Шинь стяма ширесть мархта. Эста Равать кучка видесонза тифоль ни Булгаронь масторсь. Аф кржа мокшэрзяда повсь булгархнень ёткс. Булгаронь ошнень эса ламоль шинь стяма ширде ускф товарда, кшнинь ярмакта. Тяниень Мордовиять масторса муфт кунара прдаф ярмакт. Тоса лама X — XI сядокизонь арабонь монетада. Сембода лама тяфтама ярмакта муфоль Теньгушевскяй райононь Нароватова велеть маласа.
Виде, венгерскяй археологть Ч.Балинтонь тянь колга сонцень мялец. Сонь койсонза, дирхемтне Восточнай Европаса повфневсть мазоптомка вастс крганятненди, ярмакокс ашесть уле. Сон сёрмады, кле «поволжскяй фиттне, балттне, скандинавецне, восточнай ди западнай славяттне синь ярмакокс ашезь лувонда». Тянь мархта аш кода согласиндамс. Лама кодама ярмак повфневсь крганятненди, но вдь синь ульсть ярмакокска. Фкясь омбоцети ашезь шоря. Мокшетнень ди эрзятнень крганясост кодама аньцек ярмакт аф няят, синь ульсть эрь-мезень инкса пандомбялькска.
Ярмакне Википърдафксса |
This article uses material from the Wikipedia Мокшень (Mokshanj Kälj) article Ярмакне, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Сёрматфсь ули кода мумс CC BY-SA 4.0-са, кда илякс апак аст. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Мокшень (Mokshanj Kälj) (DUHOCTRUNGQUOC.VN) is an independent company and has no affiliation with Wiki Foundation.