Nataçon

La nataçon ye ua atebidade que puode ser simultaneamente útele i recreatiba. Las sues percipales outelizaçones son recreatibas, balnears, pesca, eisercício i çporto.

 

La nataçon ye coincida zde tiempos pré-stóricos, l registro mais antigo subre la nataçon bénen de las pinturas rupestres de a a cerca de 7.000 anhos atrás. Las refrencias scritas bénen de 2000 AC. Alguas de las purmeiras refréncias stan ancluídas an obras stóricas cumo la Eipopeia de Gilgamesh, la Eilíada, la Odisseia, la Bíblia (Ezequiel 47:5, Atos 27:42, Isaías 25:11), Beowulf, i outras sagas. An 1538, Nikolaus Wynmann, un porsor alman de lhenguística, screbiu l purmeiro lhibro subre nataçon, “L Nadador ó l diálogo subre la arte de Nadar”” (Dar Schwimmer oder ein Zwiegespräch uver die Schwimmkunst). La nataçon de cumpetiçon na Ouropa ampeçou por buolta de l anho de 1800, na sue maiorie outelizando l stilo bruços. An 1873 John Arthur Trudgen, apersentou l stilo Trudgen, passado tener copiado l stilo Crawl ousado puls Índios Natibos Norte-amaricanos, criando ua lhigeira bariante de l mesmo. Debido al repudio de l Británicos puls salpicos, Trudgen ampregou la pernada de bruços ne l lhugar de l batimiento de piernas cumbencional de l Crawl. La nataçon fizo parte de l purmeiros Jogos Oulímpicos de la era moderna an 1896, an Atenas. An 1902 Richard Cabill antroduziu l Crawl i an 1908, fui fundada la FINA (Federaçon Anternacional de Nataçon). L stilo mariposa fui zambolbida na década de 1930, ne l ampeço apareciu cumo ua bariante de l bruços, até que fui aceite cumo un stilo çtinto, an 1952.

Muitos animales ténen la halbelidade de nataçon por anstinto, cumo tamien ye l causo de l home. Ne ls mamíferos, esta nataçon por anstinto ten l nome de "Nataçon Padron Mamífera". Este tipo de nataçon define-se por ser eisecutada cula cabeça fuora de auga, batimientos dianteiros de l braços (patas anteriores) cun un ángulo próssimo de l 90 graus i pernas (patas posteriores) an lhebe flexon (rializando un mobimiento parecido cul pedalar). Bulgarmente coincido por “nadar a perro”

Por mobimentar praticamente todos ls músclos i articulaçones de l cuorpo, la prática de la nataçon ye cunsidrada un de l melhores eisercícios físicos eisistentes.

Cumo atebidade recreatiba, la nataçon ye mui difundida. Muitos nadadores éntran na auga solo para se adbertir, tanto an pecinas arteficiales cumo ne ls mares, lagos i rius.

anque ls stilos de nataçon tamien séian outelizados ne l lhazer, ye mui quemun que ls nadadores recreatibos outelízen stilos menos técnicos, giralmente mantendo la cabeça fuora de auga.

Eisísten 7 modalidades çtintas na specialidade de nataçon.

• Nataçon pura
• Polo aquático
• Saltos para la auga
• Augas abiertas
• Nataçon sincronizada
• Masters
• Mergulho Aquático