Rabi'ah Al-Adawiyyah

Rabi'ah panèka klan (bhâsa Arab: Mawlat) dâri klan Al-Atik suku Qays bin 'Adi, Rabi’ah otara kalabân sebbuddhan al-Qaysiyah.

Rabi’ah èkennal mènangka orèng sufi binè' sè zuhud, yakni ta' lèbur dhâ' kaodi'ân dhunnyah, saènggha Rabi’ah ngabdhi’aghi odi’na coma ghâbây èbâdâ mongghu Allah. Rabiah è kèra aghin bhâbbhâr antara taon 713 - 717 Masehi, otabâ 95 - 99 Hijriah, è kottah Basrah, Irak bân sèdhâh kèndhâ' taon 801 Masehi / 185 Hijriah. Nyama ghenna’na panèka Rabi'ah binti Ismail al-Adawiyah al-Basriyah. Rabi’ah panèka sufi binè' sè noro' alèran Sunni teppa' masa dinasti Umayyah sè dhâddhi pemimpin dâri red-mored binè’ bân zahidâh, sè ngabdhi’aghi dhi'na ghâbây panâlètèyan hokom kasoccèyan sè cè' tako’en bân taat dhâ' pangèran. Rabi'ah Al-Adawiyah èjhulughi mènangka "The Mother of the Grand Master" otabâ Ebhu Para Sufi Rajâ polana kazuhudhânna. Rabi'ah jhughân dhâddhi panodhân para ahli sufi sèlaèn kadhi Ibnu al-Faridh bân Dhun Nun al-Misri. Kazuhudhân Rabi'ah jhughân è kennal sampè' ka Eropa. Panèka aghâbây bânnya' cendikiawan Eropa nâlete pamèkkèran Rabi'ah bân nolès riwayat odi'na, kadhi Margareth Smith, Masignon, bân Nicholoson.

Bhâbbhâr

Rabi'ah bhâbbhâr è kottah Basrah, Irak, rèna abad ka bâllu' taon 713-717 Masehi. Rabi’ah bhâbbhâr dâri kâluwarga sè cè’ mèskènna bân dhâddhi pottrè ka empa’ dâri empa' tarètan, saèngghâ salèrana è nyama'è Rabi’ah sè artèna pottrè ka empa’. Ramanah anyama Ismail, nalèka malem para' bhâbbhârâ Rabi'ah, kabâdâân ekonomi kâluwarga Ismail cè’ bhuru'en saèngghâ Ismail ta’ andi' pèssè bân telèmpèh ghâbây ngancaˊè rajinah sè bhâdhih bhâbbhârâ. Ella' bârâmpa arè marènna Rabi'ah bhâbbhâr, Ismail amèmpè tatemmoh kalabân Nabbhi Muhammad,dâlem mèmpèna Nabbhi adhâbu ka Ismail sopajâ jhâ' nalangsa polana pottrèna, Rabi'ah, bhâkal dhâddhi orèng binè’ se moljâ, saèngghâ bânnya’ orèng sè bhâkal ngarep safaat-na.

Dhâddhi jatèm piatu

Sejjhek kènè' Rabi'ah la è kennal mènangka ana' sè mengka bân taat aghâma. Namong ta’ abit, Ramanah, Ismail, adâ’ omor pas è sosol sareng èbhuna, saèngghâ Rabi'ah bân tello' tarètan binè'na dhâddhi ana' jatèm piatu. Rama bân èbhuna coma adhina aghi artah aropa parao sè pas eghâbây nyarè napkah sareng Rabi'ah. Rabi'ah alako dhâddhi tokang narèk parao sè manyabbhrâng orèng dâri teppèh Songay Dajlah ka teppèh songay sè laèn. Samantara tello' tarètan binè’na alako è roma atennon kaèn otabâ apèntèh bennang.