Paolo Sizzi
El Paolo Sizzi (Pont San Peder, 5 de otover 1984) a l'è un teoregh politegh e blogger italian, in tra i pussee cognossud pensator de l'etnonazzionalism irredentista lombard.
 | Quest articol chì l'è scrivud in lombard, con la Noeuva Ortografia Lombarda |
Biografia
Gioventura
Nassud a Pont San Peder, el se diploma grafegh di reclam in del 2003, el se svesina al penser etnonazzionalista in del 2006, per pœu sgiontàss al Front Independentista Lombard del Max Ferrari in del 2008.
In del 2009 el se slontana de la fed catolega per andàgh adree al razzionalism pagan, e 'l derva el so prim blog, indova che 'l scriv sgiò i prim bas de la soa ideja politega.
Vers de la fin de l'ann a l'è indagad per vilipendi e œudi razzial, dopo che l'éra stad denonziad de la sinistra universitari per i post in sul sò blog in di revard di sgiudee e di zingher.
In del 2010 el romp cont i independentista bressan, che andarann poeu a fà su Pro Lombardia Independenza, e 'l se met insema a l'Adalbert Roncari, cont el che, in del 2011, el fonda el Moviment Nazzional Lombard, che in del 2013 el se slarga in Granda Lombardia.
In del 2012 l'è intervistad del programa "Le Invasioni Barbariche" de La 7, indova che 'l cunta su la soa vision del mond, e grazzia a quella intervista chi el deventa anca pussee cognossud foeura de l'Internet.
In del 2013 a l'è condanad in prim grad per oeudi razzial e vilipendi al Capo de Stat ai lavorà sociai, condana poeu confermada in Cassazzion pussee inanz.
El period italegh
In del 2014 el se svesina al penser etnonazzionalista italegh, a sostegnì che gh'è minga Lombardia senza de Italia, e 'l se conliga a di posizzion romanocentreghe, comunque con l'ideja de 'n Italia federal in su bas etnega di popoi, in polemica cont el stat central italian.
El se laurea dotor magistral in del 2017 a l'Università di Studi de Bergom, in Colture Moderne Comparade.
In del 2019 l'è intervistad an'mò de la television, 'sta voeulta de la trasmission Piazzapulita, semper de La 7, indova che fann vidé di so vegg video e tweet e poeu vann a parlàgh. El Sizzi a l'è stad assee critegh de 'sta intervista, perchè l'è stada presentada con di video vegg, del so period independentista radical, a so dì con l'obietiv de fàll paré un nazista, e che l'ha tirad in mez la soa mama, preocupada quand che l'ha vist de la sgent andàgh dent in del sò cortil.
El tornà a l'independentism lombard
El torna vesin a l'independentism lombard in l'autun del 2021, per nonzià in l'otover de havé bandonad l'italianism in favor del so lombardesim, cont el sarrà di vegg blog e la vertura de 'n sit nœuv, ciamad Lombarditas, del che 'l derva anca un canal YouTube e Twitch.
Penser politegh
El Sizzi el sostegn 'na forma de etnonazzionalism ciamada lombardesim, o ben 'n ideja völkisch relativa a la Gran Lombardia, de intender 'me tuta l'Altitalia gallo-romanza, ered de la Gallia Cisalpina e de la Langobardia Maior.
'Sto lombardesim a l'è nazzional-social, contrari al conservatorism, al progressism e al liberism. I so pont carden a inn l'etnonazzionalism, cioè el ligam de sangh e de terra con la Lombardia, l'irredentism, l'identitarism, el tradizzionalism, l'etnicism, l'econazzionalism, el pan-lombardism, el razzionalism, el socialism nazzional, el comunitarism, el ruralism, l'indoeuropeismo, l'europeism di popoi, el presidenzialism, el dirigism e 'na vision religiosa conciliatoria in tra cristianesim pre-concili Vatican II e paganesim.
Riferiment
This article uses material from the Wikipedia Lumbaart article Paolo Sizzi, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). El contegnud a l'è disponibil sota la licenza CC BY-SA 4.0, se l'è minga indicad diversament. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Lumbaart (DUHOCTRUNGQUOC.VN) is an independent company and has no affiliation with Wiki Foundation.