Vichinghi

E fonte nordiche adœuvian o terme Vichinghi pe quelli che se diressan verso sud e ovest; quelli che se dirizettan verso i paixi slavi e Bizançio fun invece ciammæ Variaghi.

Graççie a-i noteivi amegioamenti tecnichi inte l'arte da navegaçion, inte 'na primma faze i Vichinghi razonsan tutte e coste de l'Œüropa, o Nordaffrica, Bizançio, i paixi slavi, a Perscia e o Turkestan. I Norvegin se diressan verso e Færøer, l’Islanda, e Shetland, i Orcade, a Scoççia do Nord, l’izoa de Man, l’Irlanda, con di intenti de colonizzaçion otra che de sacchezzo; carattere escluxivamente piratesco ebban invece e impreize in sce-e coste françeize, in Spagna, in Marocco e in Itallia (coste toscañe).

I Daneixi, che mesciavan in vee e proppie armæ, se diressan solo verso l’Inghiltæra e l’impêo carolingio (che co-a conquista da Sassonia o-i menaççava da-a vexin). Tra l’866 e l’890 fondon o Regno de York inte l'Inghiltæra orientâ (da pœu notto comme Danelaw) e into 911 o ducato de Normandia, ma o re do Wessex Arfredo o Grande o l'ariescì a battili a Edington, bloccandoli inta parte orientâ de l'Inghiltæra. L'attivitæ corsâ di Vichinghi a l'aspresciò a dissoluçion de struttue politiche e sociæ de l'impêo carolingio. L’unica difeiza eficaxe da-i so attacchi a l'ea sciu base locâ, e de conseguença inte l'Œüropa ocidentâ sorzette numioxiscimi castelli. L’atra stradda percoribile a l'ea quella do pattezzo, sciben che-o scistema de pagâ un tributo a-i pirati vichinghi o l'ea peigoozo perché o tendeiva a diventâ stabile. Inte 'na fase sucesciva, quande i paixi invaxi fun stremæ, i Vichinghi domandon de tære onde insediâse, vegnindo manenti: coscì feççan, prez., into Danelaw e inta Normandia e l’aspetto commerciâ de so impreize o fu un semplixe sottoproduto de l'attivitæ de predatoî.

A differença di Vichinghi, i Variaghi (Svedeixi) vègnan ben fito merçenai e mercanti. Remontando o corso do IX secolo. i grandi sciummi rusci, razonzettan o Mâ d’Azov e o Mâ Caspio; attaccon inte l'860 e into 941 Bizançio, e a Perscia ascì. A Bizançio formon a guardia personâ de l'imperatô. I Variaghi costruin de baze permanente longo i sciummi da cianua ruscia pe commerciâ scciavi, pelliççe e amê con l’impêo bizantin. E fonte slave i dexignan co-o nomme de Rus´: l'è probabile che i so insediamenti seggian a l'origgine da nascita di primmi stati rusci, i regni ò canati de Novgorod e Kiev, che into 10° sec. se fuzan into Regno de Kiev.

Tra o 930 e o 980, inte 'na paoza inte l'attivitæ di Vichinghi, in Inghiltæra Etelstan, re do Wessex, o l'ariescì a sottomette i Daneixi de York unificando l'izoa sotta a so aotoitæ. Inte questo periodo s'inandiò ascì a crestianizzaçion di Vichinghi. Quande, poco primma do Mille, començò torna e spediçioin vichinghe, queste no razonsan ciu l’importança di periodi precedenti. I Norvegin compin arcuñe ardie impreize mainæsche, quæ a colonizzaçion da Groenlandia (985) e a scoverta, verso o 1000, de coste americañe, dove fu fondao pe breve tempo una colonia into Vinland, in sce-a costa nord de l'izoa de Tæranœuva.

Into 1014 a battaggia de Clontarf a marcò a fin da prezença vichinga in Irlanda. I daneixi Aroldo II Dente Azuro e Sven I Barbaforcua començon invece a conquista de l'Inghiltæra; o figgio do Sven, Canúo o Grande, o s'impadronì de l'intrega izoa, construendo un impêo marittimo ch'o l'includeiva ascì a Danemarca, a Norveggia e e izoe a nord da Scoççia. A dominaçion daneize in sce l'Inghiltæra, però, a se desciorvè pochi anni doppo a morte do Canúo: in gio a-o 1015 l'etæ vichinga a poeiva dîse davei concruza, a ovest comme a est, dove i Variaghi ean stæti zœumoæ inglobæ da-a maggiorança slava.

•   Wiki Commons a contêgne di files in sce Vichinghi