Stoccarda

A l'è a capitâ du Land du Baden-Württemberg e a gh'à 626.275 abitanti (a-i 31 de dexénbre du 2021).

Questa çitæ a se trêuva vexìn a-a Furesta Neigra. In tu mëzu da çitæ ghe passa u sciümme Neckar. A süperfice a mezüa 210 km².

 

A parte de Stucarda ch'a se ciamma Cannstatt, che in tu pasòu a l'ëa 'na çitæ pe cuntu sêu, a l'ëa abitâ zà in ta preistoia. I antighi Rumâni ghe sun restæ scin' a l'annu 260 doppu Cristu quande sun arivæ i barbari. A vëa Stucarda a l'è stæta fundâ tra u 926 e u 948. In tu 1495 Stucarda a l'ëa diventâ a sede du dücca ch'u l'arezeiva u dücatu de Württemberg (Virtemberga). In tu 1806, durante a guæra cuntra Napuliùn, u Württemberg u l'ëa diventóu in regnu e Stucarda a l'ëa a sêu capitâ cumme u l'à cunfermóu u Cungressu de Vienna in tu 1815. In te l'annu 1871 u Württemberg u l'è diventóu parte du regnu da Germania. In ta segunda guæra mundiale Stucarda a l'è stæta quæxi cunpletamente destrüta da-e bumbe di Americhen e anchêu a l'è 'na çitæ muderna.

A gêxa ciü impurtante de Stucarda a se ciamma Stiftskirche e in te l'annu 1534 a l'è stæta a primma gêxa prutestante du Baden-Württemberg doppu che l'ëa cumensòu a rifurma du Martin Lutéru. Gh'è u castellu vëgiu ciammóu altes Schloss e gh'è ascì quellu nêuvu, neues Schloss, in sciâ ciassa prinçipâ ch'a se ciamma Schlossplatz.

 

Stucarda a l'è famusa perchè chì gh'è nasciüa a primma automobile du sciù Daimler in tu 1887. Gh'è a fabrica da Daimler Benz e ascì quella da Porsche, tütte due cu-i sêu müsei de l'auto.

A Stucarda se parla u "svêvu" (Schwäbisch), ch'u l'é 'n dialettu tedescu.

 

Due votte in te l'annu gh'è 'na grande e famusa festa da bira ch'a se ciamma Wasen e a s'asümeggia a quella de Mùnegu de Bavëa.

•   Wiki Commons a contêgne di files in sce Stoccarda